Matiye 7
7
ꞌGangəje tar dɔ dəwje gə ang
Lug 6.37-38,42
1ꞌGangəje tar dɔ dəwje gə ang, mba kar ꞌgangə tar dɔ si ang tɔ. 2Pa gangə tar gə aw gangəje ne tar dɔ dəwje gə ja tɔ d-a gangə ne tar dɔ si gə, ngo gə sisəy ɔjije ne ne ja tɔ d-a kɔji ne ne kar-si. 3Mba ɗi ɓa ꞌi o biya̰ mu gə to dɔ kəm ngon ko̰-i gə ɗaa kagə gə kəm-i gə le o ang wa? 4Ose to gə ban ɓa ꞌi pa ar ngon ko̰-i na: Ar-m m-un mu gə to kəm-i m-ar-i, ngaa ne gə boy gə to kəm-i gə ɓa o ang wa? 5Njetar mula, un kagə gə to kəm-i kede nam ɓa, a ko ɗəw kun ne mu gə kəm ngon ko̰-i gə ɓi.
6Unje ne gə to gə losang-ɛ ar-je bisije ang, mba d-a təl to̰ si. Unje mər kila gɔsə gə lə-si ila no bərəje gə ang n-a d-a tuba nangə gə mba ꞌtəl kɔsə si.
7ꞌDəjije ne nama d-a kar-si, ꞌsangəje ne nama a kingaje, undaje ta kəy nama d-a kɔr kar-si. 8Mba dəw gə dəji ne ɗaa d-ar-ɛ, dəw gə sangə ne ɗaa inga, ngaɓa dəw gə unda ta kəy ɗaa d-ɔr d-ar-ɛ. 9Dəw gə ɗa ja ɓa horo-si gə ɓo ngon-e dəji-e mbə nama a kun kɔr ər kar-ɛ wa? 10Ose dəji-e kənji ɗaa a kar-ɛ li wa? 11To gə ɓo sisəy gə ꞌtoje dəwje gə kṵra̰y baa ja, ꞌgərəje karəje ngan si neje gə may-may ngaa ɓədə ɓa Bɔ-sijee Luba gə isi dara a kar ne gə may dəwje gə ꞌdəji-e ang wa?
Ɗa ne kar njemar-i
Lug 6.32
12Be ɓa neje tɔ̰y gə sisəy njigije kar dəwje ꞌɗa mba-si le, sisəy kara ꞌɗaje bənəng ja mba-je tɔ, mba to torondu Moyiji nəm ɓa to tarje lə pajambərəje nəm tɔ.
13Andəje gə ta ɗəw kəy gə njondəro̰ mba ta ɗəw kəy gə tadə ngaɓa ɗəw gə to bəndəng le aw gə lo tuji gə, ɗaa ye ɓa dəwje bula d-andə ne. 14Ngaa ta ɗəw kəy gə məm gə ɗəw gə to njondəro̰ le ɓa aw ce lo kisi kəm baa gə, ngaa dəwje bula d-andə ne ang.
15Aje rɔ-si rɔ pajambərəje gə gə mbɔr-ɛ baa. ꞌƊa rɔ-je to gə badəmje be ngaa ꞌto njagəmanjɛrje njekusa da dɔngɔr gə je dɔ ɓəngərə-je gə. 16Kula ɗa-je ja sisəy a gərəje neje. Dəw a kunja kandə tungu dɔ kagə ꞌngɔgɔrɔ gə ang nəm ɓa, a kunja kandə sam dɔ kagə madə gə ang tɔ. 17Kagə gə may nama kand-e may tɔ, a ɓo kagə gə kṵra̰y nama kand-e kṵra̰y tɔ. 18Be ɓa kagə gə may le kand-e a kṵra̰y ang nəm ɓa, kagə gə kṵra̰y kara kand-e a may ang nəm tɔ. 19Kagə gə ɗa-ɗa ja ɓa kand-e kṵra̰y nama d-a tuga kula pədə. 20To gə be ɓa a gərəje ne pajambərəje gə gə mbɔr-ɛ baa gə go kula ɗa-je.
21Dəw gə pa t-ɛ gə na: Mbayɓe, Mbayɓe baa ɓa a kandə ne mə ɓeko̰ gə dara ang, ngaa dəw gə ɗa mə njigi lə Bɔy gə isi mə dara gə ja ɓa a kandə ɓeko̰ gə lə-a. 22Dɔ ndɔ gangə tar nama dəwje bula d-a pa kar-m na: Mbayɓe, Mbayɓe, j-a pa tar lə Luba gə ri-i ang wa? J-a tɔbə njilje gə kṵra̰y gə ri-i ngaɓa j-a ɗa nemisije dang-dang gə ri-i ang wa? 23Lo-e gə əng ɗaa m-a pa karəje təsərə na: M-gərə-si ndɔ kara ang, sə-i nje ɗa ne dɔ buguruje, ɔdəje ta-m gə gə nu.
24Gəl-e gə nee ɓa, dəw gə ɗa-ɗa gə o tar gə m-pa nee ɓa ɓo ta ɗa ne kula nama, nj-ɛ nay ɗəw kara baa gə dəw gə unda kəm karə dɔ rɔ-ɛ gə, ɗa kəy lə-a dɔ ranga gə. 25Nji ər, ar man nji ula gə singa ya̰ unda kəy le ngaɓa ləl kara ula gə singa ya̰ nəm nee kəy lə-a nee le oso ang, mba n-unda dɔ ranga gə. 26Ngaa ɓo dəw gə o tar gə m-pa nee le ɓa ɗa ne kula ang nama, nj-ɛ to asə naa gə mbə gə unda kəy lə-a dɔ ꞌnangəra̰ gə. 27Lo gə nji ər, ngaɓa ləl kara ula gə singa ya̰ nəm ɗaa kəy lə-a le unda nangə mburugu ar tor-e to to gə kəm wəəl be.
28Logə Jeju tɔl ta tar lə-a to gə be tɔ̰y ɗaa dəwje tɔ̰y gə d-o le, lo tar igi-je sɛl, 29mba n-tɔji ne gə dəw gə inga singamongə ɓo to gə njekɔr gəl toronduje be ang.
Chwazi Kounye ya:
Matiye 7: lap
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2020, ATALTRAB. All rights reserved