Lukas 15
15
1Na jaman looy siꞌ, meka ga tukang ninga sukay ka ga jama sarī ma tanyag du baldusa sigi-sigi pa man si Isa pakale ni umanat na. 2Pag ndaꞌ siga Parisi ka ga guru saraꞌ agama meꞌ looy, buwatan da magdubdub, yuk da, “Uy, lalla naa, guru oy doꞌ na meꞌ naa? Buwatan na ngahasi siga baldusa sampay mmeꞌ lagi pahaboy mangan ninsila!”
Bili-bili lungay
(Matiyu 18.12-14)
3Dari lay si Isa ngandalil ninsila, yuk na, 4“Bong sawpama luu kam disu magbili-bili dahatus, boꞌ lay lungay disu, saꞌ ba, mbanan bi doꞌ ilooy ma siyampuꞌ-siyam mangan taꞌ buntuꞌ, boꞌ bi miha ilooy disu ma bay lungay ngkod-ngkoran yaꞌ gi bay tatammu bi? 5Na pag ilay mintu tatammu bi, tud gāk sina kam sampay panangkit bi na binoo moleꞌ. 6Pag takka bi pa lumaꞌ, saꞌ ba, bbuwatan bi ngaddoꞌ ga kabagayan bi sampay jama bihing lumaꞌ bi binoo nginum-mangan? Yuk bi, ‘Maglami-lami doꞌ kitabi sabap luu na tatammu ku bili-bili ku ma bay lungay!’ 7Na baan ta kam, meꞌ naa du sina kagakan ni sulgaꞌ luu-luu disu baldusa ntuu ni junyaꞌ nawbat. Mas mehe kagakan ndooy ni disu jama meꞌ looy man siyampuꞌ-siyam jama intong ma yaꞌ gunahan ninsila nawbat.”
Dublun pilak porol bay lungay
8Yuk si Isa lagi, “Damikiyan, bong sawpama luu danda magdublun sapū ma pilak porol, boꞌ bay lungay disu, saꞌ ba, magti du ya nantikan palitaan, boꞌ na ngoheyan lumaꞌ na labbasakayi supaya tatammu na? 9Pag lay jaꞌ ilay mintu tatammu na, bbuwatan na ngaddoꞌ ga kabagayan na ka ga jama bihing lumaꞌ na binoo nginum-mangan. Yuk na, ‘Maglami-lami doꞌ kitabi sabap luu na tatammu ku dublun ku ma bay lungay!’ 10Na baan ta kam, meꞌ naa du sina kagakan siga malaikat Tuhan pag takita da disu baldusa nawbat.”
Subul bay lakka man jawom okoman mmaꞌ na
11Pag-anu siꞌ, ngandalil na baw si Isa pabalik, yuk na, “Luu disu jama anakan duwa lalla. 12Na disu llaw, yuk ilooy ma siyali, ‘Maꞌ, bong siꞌ kadarihan ningkau, deanun na aku mimon bahagiꞌ ku ni altaꞌ nu.’ Dari lay na binahagiꞌ meꞌ mmaꞌ da altaꞌ na ni ga anak na sikaduwa.
13“Yaꞌ hallom, lay na pinaballihan meꞌ ilooy ma siyali bahagiꞌ na boꞌ lay na boo na ballihan na lakka pa lahat disu salawak-lawak na. Takka ndooy, lay jaꞌ pakaat na sīn na ni jinisan karupangan. 14Katis jaꞌ siꞌ mimon sīn na, luu na baw takka gotom mehe ni lahat looy sampay tiksaꞌ na ga ya. 15Dari lay ya buwat ni disu jama lahat looy. Sukuꞌ na makan baanan bawi. 16Na sabap tud lingantu na ya, ilohan na ga ya minsan ni makanan ga bawi looy, batan yaꞌ luu jama ndooy muwanan iya balanjaꞌ.
17“Song hallom, bohoꞌ tabista na bay karupangan na, maka honaꞌ-honaꞌ na, ‘San bilay ga tindog mmaꞌ ku labbasakayi, balanjaꞌ da maglabi-labi man kakan da. Boꞌ aku itu agon-agon kabobowan na ntuu. 18Gam na ku pabeleng pa mman mmaꞌ ku. Takka ku mintu, yuk ku, “Maꞌ, tud mehe dusa ku pa Tuhan sampay ningkau. 19Yaꞌ na san ku pataꞌ inawnan anak nu. Sugaꞌ bong anu, buwatun na jaꞌ ku tindog nu.” ’
20“Dari lay na ya pabeleng moleꞌ pa mman mmaꞌ na. Sasang na ni tangngaꞌ lān, lawak-lawak gi man lumaꞌ, takita na ya meꞌ mmaꞌ na. Dari kapaluuy na mmaꞌ na sampay magti sonse pa mman na, boꞌ na ngakkop sambayan na ngūk iya. 21Yuk anak na niiya, ‘Maꞌ, tud mehe la dusa ku pa Tuhan sampay ningkau. Yaꞌ na san ku pataꞌ inawnan anak nu.’
22“Sugaꞌ ni kagāk mmaꞌ na, lay linganan na siga tindog na, yuk na, ‘Kaddoun bi deꞌ-dēꞌ juba looy ma ayad banahan boꞌ papatukan bi anak ku. Pasim-siman bi ya maka patumpaan bi. 23Maka kaddoun bi sapiꞌ baddung looy ma bay pinalammok, boꞌ sumbaliun bi man tabi maglami-lami. 24Batan anak ku itu subay ga lay na matoy, pag batnaa llum na pabalik. Bay na ya lungay, pag batnaa luu na ya tatammu.’ Dari siꞌ, lay na sila ballang maglami-lami.
25“Na kuwan anak na siꞌ ma siyaka, lay masi buwat njawom huma. Pag tapit jaꞌ siꞌ ya pa lumaꞌ lān na moleꞌ, ilooy ma kale na ya halling kulintangan ka jama maglami-lami. 26Pag-anu, lay linganan na disu tindog da, boꞌ na nilaw bong ongoy na lay meꞌ looy na. 27Yuk tindog looy, ‘Luu na la takka ariꞌ nu. Dari lay sohoꞌ mmaꞌ nu sinumbaliꞌ sapiꞌ looy ma bay pinalammok, batan luu na pabeleng ariꞌ nu, boꞌ yaꞌ du bay kongoy-kongoy.’
28“Sugaꞌ pag takale ilooy ma siyaka meꞌ looy, tud bay lasu ya sampay yaꞌ na ga ya kuhi paasok. Dari lay pōꞌ mmaꞌ na ngug-ngugan iya nohoꞌ paasok. 29-30Sugaꞌ yaꞌ ya kuhi. Yuk na ni mmaꞌ na, ‘Uy, yaꞌ bina Maꞌ sikatuwaꞌ! Anak nu bilay, bay jaꞌ makaat altaꞌ nu man na magdanda. Meꞌ looy na bay karupangan na, pag takka na, lay gi sumbaliꞌ nu niiya sapiꞌ looy ma bay pinalammok! Boꞌ niyaku, san lasa disu kambing, yaꞌ bay luu dean nu aku man kami maglami-lami ka ga kabagayan ku. Yaꞌ sina sikatuwaꞌ, batan daka dangon taun na ku bay ngintu kau sampay ngasip ni oy-oy jaꞌ panohoan nu!’
31“Pag-anu, yuk mmaꞌ na, ‘Kau bina Toꞌ, ndang ndiyoꞌ dakan ku du man sibuwa lagi. Oy-oy sadjaꞌ ma luu niyaku, mastiꞌ ningkau du. 32Pasal ariꞌ nu ina, pataꞌ subay paglami-lamihan ta ka ballang mehe sabap iya ina, sibuꞌ du kadari na ka jama bay na matoy llum na pabalik. Bay na ya lungay, pag batnaa luu na tatammu.’ ”
Chwazi Kounye ya:
Lukas 15: sjm
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc. All rights reserved.