MATIYE 4
4
Nərtitiŋ ke ku Yeesu
(Mar. 1.12-13; Liki 4.1-13)
1Adordə kel teŋa kəyaŋ, Tiiru Cetcetaŋ kooroŋ də Yeesu warna giidə ful na minti Nərtitiŋ kaw ku la bə gulu kuɗu. 2Yeesu yaakaŋ kusru də tay, duugŋ də daaway hiti hor-hor waaɗe, kəya tay əsəŋ bə ɗəmu. 3Kəya Nər kə ku kaŋ zeŋ suru da, a wəətunu minti: «Tam jəəne kormə Pepeŋ gəəziŋ, waatə pərki la laka minti wə kolə la wəra so.» 4Wə harna kel minti: «Kefter kə Pepeŋ wəra bə jeerə-jeere minti: ‹Hulum ji caw dədərgə ha'aŋ, paapa də so təwa ba, wə doo haa la də kel gə minti Pepeŋ bə wəətiyaŋ keɗe gəm .›» 5Kəya a kooroŋ duuru giidə vil də Zeruzalem. A usnu apəya a lewlew də *Kuli kə Pepeŋa. 6A wəətunu minti: «Tam jəəne kormə Pepeŋ gəəziŋ, gaa kusrum la warna adawra na, gud bə minti Kefter kə Pepeŋ jeereŋ wəra minti: ‹Pepeŋ waate *kaa kə digi nuutuŋ yaŋ cəərəma, yə ləgam yaŋ kəəsi minti kampəram a dese a pərki ba .›» 7Yeesu minti: «Kefter kə Pepeŋ wəra bə jeerə-jeere pa minti: ‹Tam a gole koɗ Barkaŋ Pep nəmtiŋ ba.›» 8A haraŋ bə koore duuru cəərə pərki kimpili-kimpili pa. A gəənu duru cəərə seŋkaŋa keɗe də məyan, də hurma dəŋ gəm. 9A wəətunu minti: «Kar teŋ gila keɗeŋ, tam vaŋ ne də gəgəərəm tiinina bə kan awalnaŋ, ten ayam di wəra keɗe.» 10Kəya, Yeesu waatəna minti: «*Sataŋ, zee la wəra sarəna tooto! Gud maa mo Kefter kə Pepeŋ wəra bə jeerə-jeere minti: ‹Kaa awalnaŋ la a Barkaŋ Pep nəmtiŋ, jəətə digiŋ la a nuunu təwa .›» 11Də ko toŋ máŋ kəyaŋ, a yəəkunu faɗi. Kaa kə digi kə Pepeŋ bəŋ suru bə jəw guudu gəm.
Yeesu mele gud joŋre nuutuŋ Galile
(Mar. 1.14-15; Liki 4.14-15)
12A ko toŋa kəyaŋ, Yeesu əskəŋ minti yə gaŋ Zaŋ a daŋgaya. Kəya wə kooroŋ giidə seŋka də Galileŋ na faɗi. 13Wə əsəŋ giidə vil də Nazaretiŋa ba, wə kooroŋ a isi warna giidə vil də Kapernam na də minti agəjaŋ də kan kəmtəŋ gə Galileŋaŋ. Kapernam a haa giidə seŋka də Zabuloŋa də seŋka də Neftaliŋ. 14Wə jəŋ bədoona ana haa minti kel gə minti Ezay, *hulum bə jogte ku mini kə Pepeŋ a wəətənəy, doo kuy la wəra minti:
15«Ten waate kel haa cəərə kaa gə giidə seŋka də Zabuloŋ,
daana seŋka də Neftaliŋ, yə ɓasi keɗe giidə seŋka də Galileŋa.
Yə gə əsə-isi maŋ ku kan kəmtəŋ gə Galileŋa agal nayta də vor bə Zurdeŋ na.
Gə əsə-isi ada haa kaa gə minti paapa a kaasaw də kaanə Ziwifiŋa baŋ.
16Kaa gə minti ɗe dər tilməŋa bə ase pəɗaki mooto-mootoŋ yaŋ bə welɗe ciiri.
Kaa té gə minti ɗe dər tilməŋa damdi kaa kə mee-me anaŋ,
Pepeŋ bəŋ də pəɗakiŋ a niini .»
17Bə minti Yeesu tuluŋ Kapernama anəkay, wə əsəŋ bə waate kela a kaŋ minti: «Aŋ kolə kerkeŋ la a baymele nəətiŋ, gud maa mo *Kumna kə Pepeŋ wəra maŋ.» Wə dugtunuy kel kə waateŋ bədoona ana.
Yeesu mante kaa kə tope aska guudu waaɗe
(Mar. 1.16-20; Liki 5.1-11)
18Dəyaŋ hõy bə minti Yeesu bə gəryi ajaŋ də kan kəmtəŋ gə Galileŋ naŋ, wə asaŋ anə Simoŋ (yə məntu minti Piyer) də siinu Andereŋ ku kana bə wi amaaya, gud maa mo yə kaa kə golde vor. 19Yeesu wəətənəy minti: «Aŋ bəəda guudən da, ten bə koloŋ yaŋ wəra kaa kə golde kaa da.» 20Kəya yə yaakaŋ amaaya neeteŋ wəra, yə təpaŋ guudu faɗi. 21Kəya wə raawaŋ ajew na ada na anə ta'i, wə asaŋ karmə Zebedeŋ anə Zaki də siinu Zaŋ laki. Yə a giidə turtiŋa bə ɗampe amaaya neeteŋa də biri Zebedeŋ keɗe'i. Yeesu məntənəy minti yə bəəda gud tó da. 22Té anə Zaki də siinu Zaŋ yaakaŋ turtiŋ daana biri, yə təpaŋ guudu faɗi.
Yeesu seere kaŋ
(Mar. 1.39; Liki 4.44; 6.17-18)
23Kəya Yeesu ɗeeteŋ wəra giidə seŋka də Galileŋa keɗe bə hate kaŋa giidə *kuli bə toose kə kaanə Ziwifiŋa. Wə waatətaŋ *Kel pəsaŋ kəmarwaŋ wəra cəərə *Kumna kə Pepeŋa. Wə seerteteŋ kaa kə ɗemeŋ daana kaa kə dagtə-dagteŋ wəra keɗe gəm. 24Kəya kaŋ uskunu səmu wəra giidə seŋka də Siriŋa keɗe. Yə pəətəŋ wəra suru də kaa gə minti gidiirə ɗemeŋ siri də kaayaŋ gə minti gidiirə kar bə ləsəyaŋ: kaa gə minti kəwal ciiriŋ, kaa gə meete zəlaŋ, də kaa gə hurufiŋ gəm. Kəya wə siirtiniy wəra. 25Kaa kə ablaw kooroŋ guudu. Yə pəətəŋ warda haa Galile da, Vil Horaŋ da, Zeruzalem da, giidə seŋka də Zudeŋ da, daana warda cakaɗi cəərə vor bə Zurdeŋ da gəm.
Chwazi Kounye ya:
MATIYE 4: KERNT05
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Texte de la Bible: Kera © Alliance Biblique du Tchad, 2004.