LUKA 21
21
1Nao kairia meso, kawona chando wasuṟi wechiwika shindo sha nnga ipfo sandukunyi lya njodambiko. 2Kawewona na mka umu mkiwa, ai mkusu kechiwika-pfo shisenti shiwi. 3Kahamba, “Nyi kya lohi ngambia, Mka-chu mkiwa ai mkusu, nyi awika-pfo kya ngoseṟa kota wose. 4Chakipfa iwo wose nyi wawuta ipfo mfoeṟenyi fo masaa hawo, kyaindi ichu, ipfo wukiwenyi woke, nyi adambika shose ashiwode, isho shiwechimbanza moo foke.”
Yesu ahamba kya isaramaya lya Hekalu
(Mat 24:1-2; Mar 13:1-2)
5Na wandu wengi nyi wawei ikapa sumu tsa hekalu lilya chando liweishele necha na maho mecha na mchopie ingi iwenji sanzie-pfo nao kahamba. 6“Kya ishi muyambuya wulalu, nyi kochikaa kuche shiheri, kulechideo ma iho huya iho lingi lilaiwunduye wanda.”
Mawukiwa
(Mat 24:3-14; Mar 13:3-13)
7Wakambesa wakahamba, “Mlosha, nyi indi isho shechikaa shishike; na kitaanyio kyasho nyi kiki ili shechikaa shiwe?” 8Nao kahamba, “Ambuyenyi mlawone mochidetseṟo; kipfa nyi kochicha wafoi kui rina lyako wahambe nyio inyi; wawehamba, Kiheri kyamesembelya. Manya mulahende ilungana nawo! 9Nanyo ili mochiicho mbonyi tsa shida na tsa shipfulu-pfulu sha wandu, ma mlawuko nyi madima. Kipfa shindo-shi na shikaki na shikae shiwooke iwutika, indi, imarisio lyechicha owinyi lidopfo.” 10Naalyo kawawia, “Wandu wa mbaṟi imu nyi wechiapfinyiana na mbaṟi ingi, na wumangi na wumangi wungi. 11Na handu hengi na hengi nyi kochiwoneka na shidihinyisha-shi shing'anyi, na kungi na kungi njaa na ndaaṟe tseambukia, kuwewoneka na makindo hechikangaṟitsa wandu; na riho tsing'anyi tsioweshie tsiwoneke huye ruwehu. 12Kyaindi kuwooka, isho shose shilameshika, nyi wechimuitsa kiterengionyi wamukape na imufuna, wawemduo masinagogenyi na mengenyi, wamuhoṟotse oshangunyi lo wamangi na lo wachili waitoṟi, nakyo nyi kipfa kya rina lyako. 13Ishi nyi shechimuwonekia nyo kundu muidime injiṟingishya. 14 Mukuteṟye ipfo mrimenyi konu ke mulawooke ihia kekuashuo. 15Kipfa ipfo madumbunyi hanu nyi inyi njechimbikia-pfo madedo ha wuṟango, na iwo wemkaṟuo wose, wechidima ihakaṟuo ma ihakanapfo. 16Nanyo nyimocheṟiingio na nyi wafee na wanawamaanu, na wodoyanu wa kishari na wakunde wanu. 17Nanyo nyi mochisuikia wandu wose kui kipfa kya rina lyako. 18Kyaindi ma ochui lumu lochimdekia mdonyi konupfo. 19Damiṟenyi mrima yanu kui ikutirisya.”
Yesu ahamba kya inyamaṟo lya mṟi fo Yerusalemu
(Mat 24:15-21; Mar 13:14-19)
20“Kyaindi ili mochiwona mṟi fo Yerusalemu fochitengetio nyi masiṟi, wutenyi-ho imanya, kiheri kyafo kenyamaṟo kyamshika. 21Kiherikyo sa wakeri kulya Yudaya, wadichie nja; na iwo wai nja, ma walawuye napfo. 22 Kipfa shiherisho, nyisho shewuwuya kisecha, kundu shilya shii shiṟehie shishike shose. 23Kyaindi ochia nyi lo waka walya wekooyo waai walemo na weonza mandi-ho! Kipfa iya wuyana nyi kochiwada kiwi king'anyi, ili wa oshari-lu wechiwuwuyo kui nyashi ing'anyi. 24Wengi nyi wechiwooho kui njoshu, wengi wadao wafungo njosharinyi tsose. Na Yerusalemu ideo yechichumo-chumo nyi wandu wa mbaṟi njihenu, itane shiheri sha mbaṟi-tso njihenu shainutsio.”
Icha lya mana o mndu
(Mat 24:29-31; Mar 13:24-27)
25 “Kochiwoneka na ṟiho tsa njofano ipfo mnengeṟinyi na merinyi na nyenyerinyi, na iya wuyana wandu wa mbaṟi tsose nyi wechikapo ngoo walechimanya kimaduma, kipfa masinanu ha ipalyipalyi nyi hechiengeṟa ihaluka-haluka na idihina. 26Wandu nyi wechiuma ndadya kwi kitewe kya wuowu na iwedia shilya shechihoya wuyana; kipfa pfinya tsa ruwehu nyi tsechisingitso-singitso. 27 Kiheri-kyo, nlyondo wechiwona Mana o mndu kechicha ario nyi ipuchi, awode pfinya na kiṟumi king'anyi. 28Kyasia, ili isho shechiwooka iwa, kekuheluonyi, mbeiria mdo yanu huye, kyamba momshika hafui na iletso.”
Kuloshe kui mkuyu
(Mat 24:32-35; Mar 13:28-31)
29Kawawia ifanano, “Keambuyenyi mkuyu-fo, na orio mashidi hengi hose. 30Mukamewona haoṟa, nyi mokemanya mbenyi ke, kiheri kya masambuyonyii kyameshika hafui. 31Nyi wudo nanyo, mkamewona shindo-sho shamewooka iwa, manyenyi ke, wumangi wo Ruwa womshika afui. 32Nyi lohi ngambia; Oshari-lu lochiarisika manya-lepfo, na kutane ishi shawutika. 33Ruwehu na oruka nyi shechikaa shimande, kyaindi madedo hako hechimandapfo.”
Kiwaṟi ilaa dembo
34“Kyasia, kuṟisenyi, mulawone ngoo tsanu tsechilemeṟo nyi itandaluo ndeu na wunanzi na mawinyisha ha wanda-i, mfiri fulya fuwone fochimutowokia mulakusirie. 35Kipfa chando mdeho fokerakuo, nyi kechichea wose handu hose wai kunu wuyana. 36Nanyo, laenyi dembo mfiri yose mochiterewa, kundu muidime ikuashuo isho shose shikundi iwa, na ihoṟoka alya sumuhana na Mana o mndu.” 37 Kyasia, nao orio mkonu, ili mfiri, nyi awekewa molosha kulya hekalunyi, kukameila kakure-pfo kahenda ilaa kulya fumvunyi lya mashidi ha msinepfu. 38Wandu wose wakawemchea ngamenyi kilawo kundu wamwadanyie.
Kyama kewaaha Yesu
(Mat 26:1-5; Mar 14:1-2; Yoh 11:45-53)
Chwazi Kounye ya:
LUKA 21: KIM2
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Kimochi Bible © Bible Society of Tanzania, 2016.