PUDUT 26
26
Isak Tebawang Déi' Gerar
1Kareb ineh inan iru' bang bawang ineh, ieh ineh baken ratnan iru' luk bang kareb Ibrahim. Idi Isak iné' matun Abimelek, raca' lun Pilistin déi' Gerar. 2Idi Tuhan nesilagan ni Isak, kebalaNeh, “Aleg iko amé' déi' Masir; do' iko tudo déi' tana' luk miak badénKu namu. 3Do' iko tudo segageh bang bawang ini, idi Ui sikal ngedengan namu idi ngeperuan namu; Ui maré amung tana' ini kuanmu idi kuan inulmu. Ui miak ngeletep jani'Ku luk pijani'Ku ni Ibrahim, tamanmu ineh. 4#Pud 22.16–18 Idi Ui sikal ngula' inulmu mepad kudeng gituen déi' langit, idi Ui maré amung tana' ini kuan inulmu ineh. Idi amung-amung pupu bang tana' ini miak ngalap peruan ratnan inulmu: 5ieh ineh ngaceku Ibrahim pangeh nemaya' balaKu, idi nengimet bada'Ku, idi ukumKu.”
6Idi Isak tudo déi' Gerar. 7#Pud 12.13; 20.2 Kareb lun bang bawang ineh nengitun neneh ratnan awanneh, idi kebalaneh, “Ieh ineh kinanakku,” ngaceku ieh matot mala neneh awanneh, keterawéneh, “Kudeng ui mala neneh awanku, ideh miak ngaté negku ngaceku Ribeka do' taga.” 8Kareb Isak mio tudo déi', idi Raca' Abimelek ineh nenier rat bang tabukneh, idi ieh nekali' Isak idi Ribeka pegapel. 9Idi Abimelek nenawar ni Isak, kebalaneh, “Siruh, decur ini awanmu; kudeng apeh balamu, ‘Ieh ini kinanaku'?”
Idi kebala Isak neneh, “Ngaceku bang terawéku, ‘Kian lemulun ngaté negku ngaceku ieh.’ ”
10Idi kebala Abimelek, “Anunké luk ruenmu kuan kai? Seburur lemulun bang bawang ini malé amé' pamung dengan awanmu. Ratnan luk kudeng ineh, iko miak ngacing sala' kuan kai.” 11Idi Abimelek nemebpeng nelun mula', kebalaneh, “Idé-idé luk ngesusa' lemulun ini dengan awanneh miak pitayen.”
12Idi Isak nenganau' lati', idi bang lak ineh ieh nengalap meratu kua' kinula' luk inisakneh, ngaceku Tuhan nengeperuan neneh. 13Idi ieh megéi' ngalap mula' uli', pad ieh mangun ku lun do'. 14Lun Pilistin megateh neneh, ngaceku ieh inan mula' amék, sapi', idi demulun teh. 15Idi amung-amung subuk luk pangeh inukat demulun tamanneh bang kareb Ibrahim, tamanneh ineh, pipen lun Pilistin idi pinu'deh ku tana'.
16Idi kebala Abimelek ni Isak, “Do' iko buro rat nekai, ngaceku iko iuk meluun lalud rat nekai.” 17Idi Isak nenalan rat déi', idi ieh nelupo luun raked déi' Gerar, idi ieh netudo déi'. 18Idi Isak nenuneb amung-amung subuk ineh luk inukat bang kareb tamanneh, Ibrahim, luk pipen lun Pilistin muci ratnan até tamanneh. Idi Isak neneten ngadan amung-amung subuk ineh maya' luk inau' tamanneh.
19Idi lun duken Isak ineh nengukat aceh subuk déi' luun raked ineh, idi ideh kali' aceh bued abpa'. 20Idi amung lun luk matar sapi' lun Gerar nepekedaluh nelun luk matar sapi' Isak, kebaladeh, “Kai kuan abpa' ini.” Ngaceku ineh ieh neneten ngadan subuk ineh, “Kedaluh.”
21Idi lun duken Isak nengukat aceh subuk luk baken teh, idi ideh nepekedaluh neneh teh. Ngaceku ineh ieh neneten ngadan subuk ineh “Saro.” 22Idi Isak nemubuh rat déi' idi nengukat aceh subuk luk baken, idi na ideh pekedaluh neneh peh. Ngaceku ineh ieh neneten ngadan subuk ineh “Puit,” kebalaneh, “Nekini Tuhan nemaré meruar kuanku. Ngaceku ineh miak tau uen ngeperuan bang bawang ini.”
23Idi Isak nenalan iné' déi' Birsiba. 24Idi bang alem ineh Tuhan nesilagan neneh, kebalaNeh, “Idi Ui ini Allah tamanmu Ibrahim. Aleg matot, ngaceku Ui idi denganmu. Ui ngeperuan namu idi Ui ngula' inulmu, ngaceku jani'Ku nan demulunKu Ibrahim.” 25Idi Isak nenganau' aceh bubpun su ineh, idi ieh nesembayang inan Tuhan. Idi ieh nelupo su ineh, idi lun dukenneh nengukat aceh subuk teh.
Jani' Isak Dengan Abimelek
26 #
Pud 21.22
Idi Abimelek nacing rat déi' Gerar pad-pad dengan Ahusat, rurumneh, idi Pikol, lun rayeh bawehneh, pian pegayam ni Isak. 27Idi kebala Isak nediteluh, “Anunké punneh meteluh amé' negku, ngaceku muyuh megateh negku idi muyuh pangeh nengecuk negku buro rat nemuyuh?”
28Idi kebala diteluh, “Kai kali' Tuhan idi denganmu, idi kai ngerawé, do' inan aceh bulung luk arang tau. Kai pian namu pejani', 29pad iko na ngesusa' nekai, mepad kudeng kai pana' na nengesusa' namu. Kai pangeh méi' namu, idi kai nenima' namu buro dengan do' teh. Idi nekini iko inan Tuhan nemaré peruan.” 30Idi Isak nenganau' aceh irau kuandeh, idi ideh nekuman idi nengirup. 31Idi pekak uka-uka ideh netumui idi nepebulung seburur dengan seburur; idi Isak nenima' nediteluh muli', idi diteluh nenalan rat neneh dengan nepedo'.
32Idi bang aco sineh teh lun duken Isak nacing maré kali' ratnan subuk luk inukatdeh, kebaladeh, “Kai pangeh nengalap abpa'.” 33Idi ieh neneten ngadan subuk ineh “Bulung.” Ngaceku ineh ngadan bawang ineh titen Birsiba pad macing nekini.
Esau Ngaweh Pupu Baken
34Kareb ulun Esau apat ngepulu' lak, idi ieh nengaweh dueh anak lun Hiti, ieh ineh Yudit Beri, idi Basemat Elon. 35Idi didueh nengacing susa' niat kuan Isak idi Ribeka.
Chwazi Kounye ya:
PUDUT 26: BLD
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
BALA LUK DO' Lun Bawang Bible © The Bible Society of Malaysia 1982, Second Edition 1998.