Jọnụ 11
11
Isi Nke Mmanaị
Ọnwụn Lazarọsụ
1O nwọn okẹnnyẹ ohu emu rị a kụ. Ẹfan a wụ Lazarọsụ. Onyẹ Bẹtani rọ. Ebẹhụ kẹ ya lẹ umunẹ ẹ wụ Meri lẹ Mata bi. 2Merini wụ hụn hu udẹn e kun fuẹin ye Di-nwọnni-ẹnyi wụ Jesu ụkụ, gi ntutu ẹ lọgbu ẹ; nwẹnẹ ẹ wụ Lazarọsụ kẹ emu rị a kụ. 3Ya umunẹ ẹbụbụọ hụ nọ zi ozi jẹnni Jizọsị, sị, “Di-nwọnni-ẹnyi, emu rị a kụ ọwụ ị.”
4Kanị, ogẹn Jizọsị gi nụ ihiẹnni, ọ nọ sị, “Emuni ẹlẹ nke ọnwụn, kama, o k'e wẹhẹni Osolobuẹ ọghọ; Nwa Osolobuẹ k'e gi ẹ nwọnrin ọghọ.” 5(Ihiẹn Mata lẹ Meri nwẹnẹ ẹ lẹ Lazarọsụ a sụọ Jesu asụọ.)
6Kanị Jesu a nụgụ nwan nị emu rị a kụ Lazarọsụ, ọ nọdịzị ebẹhụ ọ rị akpọhịn ẹbụọ!
7Omẹgụ, ọ nọ sị ndị nsọnmazụụn a, “Nị ẹnyi kin ni Judia.”
8Ndị nsọnmazụụn a nọ sị a, “Onyẹ-nkuzi, o ke te ndị Ju chọ nị wẹ ma ị ọmụma ebahụn, y'e d'e kinzi azụụn ebẹhụ?”
9Jesu nọ sị, “Ẹlẹ mgbahunmẹ ọkụrọkụ mmẹbụọ kẹ eki gi a rị elu? Onyẹ e jẹnhunmẹ ogẹn eki gi rị elu ara kpọgburu, makẹni o gi ukpẹ rị ụwanị e legha ụzọ. 10Kanị onyẹ gi ukinkin e jẹnhunmẹ a kpọgburu akpọgburu, makẹni ukpẹ arị imẹ ẹ.”
11Jesu e kugụ ihiẹnni, ọ nọzị sị wẹ, “Ụran e buruọlẹ ọwụ ẹnyi wụ Lazarọsụ, kalẹ, m jẹnkọ ebẹhụ d'a kpọtiẹn ẹ.”
12Ya ndị nsọnmazụụn a nọ sị a, “Di-nwọnni-ẹnyi, omẹni ọ rị ụran, n'ọ dịnhịnghọ.”
13Jizọsị gi ẹ e ku n'ọ nwụnhụngụọ, kanị wẹ ro n'ọ rị e ku ụran mmaka. 14Ya Jizọsị nọ gwapụ wẹ, “Lazarọsụ a nwụnhụngụọ, 15kanị, ufiri ụnụ, m rị a ghọghọ nị arị m ebahụn, makẹni ihiẹn ụnụ e gi kweri e mẹgụọ. Pụha nị nwan nị ẹnyi d'e kunrun ẹ.”
16Ya kẹ Tamọsị (hụn w'a kpọ Ejimẹ) nọ sị ndị nsọnmazụụn ibe ẹ, “Nị ẹnyi nwẹn jẹnzi, kẹni ẹnyi sọn onyẹ-nkuzi nwụn!”
Jesu Wụ Onyẹ Hụn E Weli Ndị Nwụnhụnnị
17Ogẹn Jizọsị gi ru nke Lazarọsụ wẹ, ọ nọ hụn a nị Lazarọsụ a rịọlẹ imẹ ili ọrọgbọ akpọhịn ẹnọ. 18Bẹtani nọkunmẹ Jerusalẹm, ẹgbata wẹ wụ ihiẹn rịkẹ maịlị ẹbụọ. 19Ndị Ju bu ọda a bịaọlẹ d'a rọkọ Meri lẹ Mata obi yeni ọnwụn nwẹnẹ wẹ Lazarọsụ.
20Ogẹn Mata gi nụ nị Jizọsị lala, ọ nọ jẹnmẹ d'e kunrun ẹ. Meri nkẹ nọdị alị imẹ ụlọ. 21Mata nọ sị Jesu, “Di-nwọnni-ẹnyi, omẹni i te rị ebeni, nwẹnẹ m eke nwụn. 22Kanị a marịnghọ m nị kẹ hụnnị ọ nwụnhụngụ, Osolobuẹ jẹnkọ d'e ye i ihiẹn ọwụlẹ ị rịọ a.”
23Jizọsị nọ sị a, “Nwẹnẹ i jẹnkọ d'e lihi.”
24Mata nọ sị a, “A marịnghọ m n'o jẹnkọ d'e lihi Ụhụọhịn ikpanzụụn ndị nwụnhụnnị e gi lihi.”
25Ya kẹ Jizọsị nọ sị a, “Mmẹ e weli ndị nwụnhụnnị; mmẹ e ye ndụn. Onyẹ kwerinini m, ọ sụọ n'a nị ọ nwụnhụn anwụnhụn, o sikọ d'a rị ndụn; 26onyẹ ọwụlẹ rị ndụn hụn kwerinini m anwụnkọ, kaka. Y'e kwerighọ?”
27Mata nọ sị a, “Ẹghẹẹ Di-nwọnni-ẹnyi, e kwerighọ m nị yụ wụ Kraịstị Nwa Osolobuẹ, onyẹ ahụn wẹ rị e lee ẹnya a elu ụwa.”
Jizọsị A Kwan Ẹkwan
28Ogẹn Mata gi kugụ ihiẹnni, ọ nọ kin azụụn d'a kpọ nwẹnẹ ẹ wụ Meri. Ọ nọ kagwa a, sị a, “Onyẹ-nkuzi rị ebeni, ọ rị a kpọ ị.” 29Ogẹn Mẹri gi nụ ihiẹnni, ọ nọ felihi ozigbo, jẹn d'e kunrun Jesu. 30Jesu eke banyekwọ imẹ obodo hụ ogẹnni — echẹn k'ọ rịkwọ ebe Mata nọ kunrun ẹ. 31Ndị Ju rị a rọkọ Mẹri obi, ndị ahụn wẹ lẹ ịya rị imẹ ụlọ, a hụn kẹ Meri felihi pụ, wẹ nọ sọnmẹ ẹ, makẹni wẹ ro n'o jẹnkọ ili ahụn d'a kwan ẹkwan.
32Ogẹn Meri gi nwan ru ebẹhụ Jizọsị rị, ọ hụn Jizọsị, ọ nọ dan alị ụkụ a, sị a, “Euu, Di-nwọnni-ẹnyi, omẹni i te rị ebeni, nwẹnẹ m eke nwụn!”
33Ogẹn Jizọsị gi hụn k'ọ rị a kwan, hụnzị kẹ ndị Ju ya lẹ wẹ wị rị a kwan, o mẹtụ a ọda-ọda, ọ fụ a.
34Ọ nọ sị wẹ, “Ebe ụnụ liye ẹ?” Wẹ nọ sị a, “Di-nwọnni-ẹnyi, bịa d'e lee ẹ.”
35Ya kẹ Jizọsị nọ kwan ẹkwan. 36Ya ndị Ju ahụn nọ sị, “Euu, ihiẹn ẹ a sụọk'a!”
37Kanị o nwọnzighọ ndị sị, “Onyẹni shịapụ onyẹ ẹnya-ishi ẹnya, o ke saẹka mẹ okẹnnyẹni anwụnhụnlẹ?”
Jizọsị A Gha Ọnwụn Weli Lazarọsụ
38O mẹtụzị Jizọsị ọda-ọda; ọ nọ nọkunmẹ ili hụ wụ okporo wẹ gi ọmụma nukin ọnụ a. 39Jizọsị nọ sị, “Nupụ nị ọmụma hụ.”
Mata, nwẹnẹ okẹnnyẹ hụ nwụnhụnnị nọ sị a, “Di-nwọnni-ẹnyi, o k'e shin ọda-ọda, makẹlẹ tannị mẹ akpọhịn ẹnọ wẹ li ẹ.”
40Jizọsị nọ sị a, “Agwanị m'ị n'i jẹnkọ d'a hụn ikẹn Osolobuẹ omẹni y'e kwerighọ?”
41E nupụ wẹ ọmụma hụ; ya Jizọsị nọ weshi ẹnya elu, sị, “M rị a kpanmịn ị Baba, makẹni y'a nụgụọ ekpere m. 42A marịngụọ m nị y'a nụ ihiẹn m ku ogẹn ile, kanị ndịnị rị ebeni haịn m gi ku ihiẹnni, kẹni wẹ kweri nị yụ zihẹ m.”
43O ku ihiẹnni, ya ọ nọ gi okẹn olu yi, “Lazarọsụ, pụha!!” 44Ya kẹ okẹnnyẹ nwẹn nwụnhụnnị nọ pụha, ya lẹ ẹkwa wẹ gi fụkpumẹ ẹ ụkụ lẹ ẹka lẹ hụn wẹ gi fụma a ihun. Jizọsị nọ sị wẹ, “Tọpụ n'a, hapụ a n'ọ lama.”
E Zuni Wẹ Jesu Umẹ Nị Wẹ Gbu Ẹ
(Mat 26.1-5; Mak 14.1-2; Luk 22.1-2)
45Imẹrinmẹ ndị Ju ahụn bịa d'a hụn Meri a hụn ihiẹn ndị Jesu mẹ, wẹ nọ kwerin'ẹ. 46Kanị o nwọnzighọ ndị jẹnmẹ d'e kunrun ndị Itu-Farisi, gwa wẹ ihiẹn Jizọsị mẹ.
47Ya ndị Itu-Farisi lẹ ndị-isi nchụn-ẹjan nọ kpọ ọgwa Ndị-isi Nkịkwama, sị, “Kị ẹnyi jẹnkọ d'e mẹ? Okẹnnyẹni rị a rụn ọrụn-atụmẹnya bu ọda! 48Ẹnyi yesọnmẹ ẹ efe ẹnịna, ịhịan ile jẹnkọ d'e kwerin'ẹ; ogẹn hụ, ndị Rom ẹnyi rị okpuru wẹ a bịa d'e bụpụ Ụlọ-nsọ ẹnyi lẹ ndị alị ẹnyi!”
49Ya kẹ onyẹ ohu imẹ wẹ wụ Kayafasị hụn wụ onyẹ-isi nchụn-ẹjan ahụa hụ nọ sị wẹ, “Ụnụ amarịn ihiẹn kaka! 50Ụnụ ahụnn'a n'ọ ka ụnụ mma nị onyẹ ohu nwụndọnni ịhịan ile ọnwụn, karị nị ndị alị ẹnyi ile a la iwi?”
51Kanị, ẹlẹ ya gi uche ẹ ku ihiẹnni: ịya wụ onyẹ-isi nchụn-ẹjan ahụa hụ, amụma k'o bu ihiẹn hụ — nị Jesu jẹnkọ d'a nwụndọnni ndị Ju ọnwụn. 52Ẹlẹdẹ ndị Ju sụọ kẹ Jesu sikọ d'a nwụndọnni, n'o gizighọ ọnwụn a wegbama ndị nke Osolobuẹ ile rị ebe ọwụlẹ.
53Gha ụhụọhịn hụ jẹnmẹ, ndị-ndu ndị Ju nọ tụma iroro w'e gi gbu Jesu.
54Ya kẹ Jesu nọ kpabehi ebe ịhịan rị imẹ Judia, ọ gha ebẹhụ pụ, shi ụmụ-alị nọkunmẹ atụ d'a nọdị obodo w'a kpọ Ifrem — ịya lẹ ndị nsọnmazụụn a nọ nọdị ebẹhụ.
55Mmẹmmẹ-nghafe e rumẹgụọ ogẹnni. Ndị Ju bu ọda nọ gha ụmụ-alị ichẹn-ichẹn jẹn Jerusalẹm d'e fegụ ẹhụ kẹ iwu wẹ dọn ku. 56Wẹ hụ a chọ Jesu; wẹ hụ a jụ ibe wẹ ajụjụ imẹ Ụlọ-nsọ, sị, “Ya wụ, ọ bịakọdẹ nwan mmẹmmẹni ra?” 57Ogẹn hụ, ndị-isi nchụn-ẹjan lẹ ndị Itu-Farisi e tigụọ iwu nị onyẹ marịn ebe Jesu rị ya bịa d'a gwa wẹ, kẹni wẹ nwụnrụn a.
Chwazi Kounye ya:
Jọnụ 11: ikkBI
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.