Jọnụ 10
10
Isi Nke Iri
Ezigbo Onyẹ-ndu Atụnrụn
1“Ezioku kẹ m rị a gwa ụnụ, onyẹ ghalẹni ọnụmụzọ, kanị ọ gha ebe ọzọ nyinban ụlọ atụnrụn wụ ohin lẹ onyẹ a narịn ịhịan ihiẹn ẹ. 2Kanị hụn gha ọnụmụzọ banye wụ onyẹ-ndu atụnrụn ndị hụ. 3Ịya kẹ onyẹ nche a kpọpụnị ụzọ; ịya kẹ atụnrụn a e gọn ntịn olu ẹ. Ọ kpọ atụnrụn a ẹfan, o dupụha wẹ. 4O wepụhagụ atụnrụn a ile, o buruni wẹ ụzọ, e sọn wẹ ẹ, makẹni wẹ marịn olu ẹ. 5Esọnkọ wẹ onyẹ wẹ marịnlẹni; ọsọ kẹ w'a gbadẹn'a, makẹni amarịn wẹ olu ẹ.” 6Jizọsị gi iluni gwa wẹ oku, kanị a ghọtanị wẹ ihiẹn o gi ẹ ku.
Jizọsị Wụ Ezigbo Onyẹ-ndu Atụnrụn Hụ
7Ya Jizọsị nọ nwan sị wẹ, “Ezioku kẹ m rị a gwa ụnụ, mmẹ wụ ọnụmụzọ atụnrụn a gha. 8Ndị ọzọ ile bu m ụzọ bịa wụ ndị ohin lẹ ndị a narịn ịhịan ihiẹn ẹ; atụnrụn egọnni wẹ ntịn. 9Mmẹ wụ ọnụmụzọ. Onyẹ gha m banye sikọ d'e nwọn nzụọpụha; o k'a gha e jẹn, a lụa, a hụnsọnmẹ ẹfịfịa e ri. 10Ohin enwọn ihiẹn ọzọ ọ bịanị karị n'o d'e zun, n'o d'e gbu lẹ n'o d'e wiwi ihiẹn, kanị mmẹ nwẹn bịa kẹni wẹ nwọn ndụn, nwọn ẹ mmagi-mmagi.
11“Mmẹ wụ ezigbo onyẹ-ndu atụnrụn: Ezigbo onyẹ-ndu atụnrụn e gi ufiri atụnrụn a e ye ndụn a. 12Nke onyẹ wẹ we ọrụn, atụnrụn ndị ahụn ẹlẹ nke ẹ. Ọ hụn ẹwọrọ#10.12 Wofu. k'ọ lala, ọ la atụnrụn ndị hụ tọ, gbapụ — ẹwọrọ a nwụnrụn atụnrụn, mẹ wẹ gbayịya. 13Onyẹ wẹ we ọrụn a gbapụ makẹni onwọnni ihiẹn ọ kpọ atụnrụn ndị hụ.
14“Mmẹ wụ ezigbo onyẹ-ndu atụnrụn. A marịnghọ m atụnrụn m; atụnrụn m a marịnghọ m — 15nọkẹ kẹ Nẹdi m dọn marịn m, mmẹ nwẹn a marịn Nẹdi m. M rị e gi ufiri atụnrụn ndị hụ e ye ndụn m. 16M nwọn atụnrụn ndị ọzọ rịlẹni igunrunni. M jẹnkọ d'e wẹhẹzi wẹ; wẹ k'e gọn m ntịn. Wẹ ile a wụrụ igunrun ohu lẹ onyẹ-ndu ohu. 17Ihiẹn m sụọ Nẹdi m makẹ ndụn m nị m rị e ye, hụn m k'e werizi. 18Onwọnni onyẹ rị a napụ m ndụn m; mmẹ rị e gi uche m e ye ẹ. Iyen'ẹ lẹ iwerizin'ẹ rịchanrịn m ẹka. Ẹrịra kẹ Nẹdi m gwa m.”
19Ya kẹ ndị-ndu ndị Ju nọ kebezi yeni ihiẹn ndịnị ọ rị e ku. 20Ndị bu ọda imẹ wẹ sị, “Eje-mmọn rị imẹ ẹ; ẹra rị a pụ a! Kị ẹnyi rị e gọnn'ẹ ntịn?”
21Ndị ọzọ sị, “Oku ndịnị ẹlẹ oku onyẹ eje-mmọn rị imẹ ẹ. Nị eje-mmọn saẹka shịapụ onyẹ ẹnya-ishi ẹnya?”
A Jụ Wẹ Jesu
22Mgbe ndị Ju gi zu imẹ Jerusalẹm ogẹn oyi, e mẹ Mmẹmmẹ Idọndọnzi#10.22 Wẹ gi ẹ a nyanhan hụn Judasị Makabisi lẹ umunẹ ẹ dọndọnzi kẹ ndị alị ọzọ mẹrụgụ a. Ụlọ-nsọ nsọ, 23Jizọsị ghakọ ẹtu-ụlọ Solomọnụ hụn rị ezi-ọgwa Ụlọ-nsọ, 24ya ndị-isi ndị Ju nọ fihunmẹ ẹ, sị a, “Elee ogẹn kẹ y'e kọnmẹru ẹnyi obi elu? Omẹni yụ wụ Kraịstị, Onyẹ ahụn Osolobuẹ tumẹ, gwapụ ẹnyi?”
25Jizọsị nọ sị wẹ, “A gwagụọ m ụnụ, ụnụ ekwerini. Ọrụn-atụmẹnya ndị m gi ẹfan Nẹdi m a rụn rị a shịanị m ẹri, 26kalẹ ụnụ ekwerikwọnị, makẹni ụnụ ẹlẹ atụnrụn m. 27Atụnrụn m e gọn m ntịn egọn; a marịnghọ m wẹ; w'e sọn m esọn. 28M'e ye wẹ ndụn itẹbitẹ; alakọ wẹ iwi. Onwọnni onyẹ sikọ d'a napụ m wẹ. 29Nẹdi m hụn we wẹ che m ẹka ka ihiẹn ile; onwọnni onyẹ jẹnkọ d'a saẹka wepụ wẹ ẹka Nẹdi m. 30Mmẹ lẹ Nẹdi m wụ ohu.”
31Ndị-ndu ndị Ju nọ burusọnmẹzi ọmụma nị wẹ magbu ẹ. 32Jizọsị nọ sị wẹ, “A rụnghọsịgụọ m ụnụ ọrụn-ọma bu ọda gha ẹka Nẹdi m bịa: imẹ wẹ ile elee hụn ụnụ k'a manị m ọmụma?”
33Ndị Ju hụ nọ sị, “Ẹlẹ ọrụn rị mma kẹ ẹnyi k'a man'ị ọmụma, kanị, arụ ị ku. Makẹni yụ wụ ịhịan mmaka weri enwẹn i n'ị wụ Osolobuẹ.”
34Jesu nọ sị wẹ, “Ẹlẹ wẹ de ẹ imẹ Iwu ụnụ, sị, ‘E kugụọ m'a nị ụnụ wụ mmọn’? 35Ọ kpọgụọ ndị ahụn wẹ zijẹnni oku Osolobuẹ mbụ ‘mmọn’ bụ w'a ra hutọ oku rị imẹ Ẹkụkwọ-nsọ, 36onyẹ hụn Chuku-Nẹdi dọn nsọ zihẹ imẹ ụwa kẹ ụnụ rị nwan a kpọ oku ẹ arụ, makẹni m sị, ‘M wụ Nwa Osolobuẹ’? 37Omẹni arị m a rụn ọrụn Nẹdi m, egilẹ ni ihiẹn m ku dọn. 38Kanị omẹni m hụ a rụn wẹ, ọsụọn'a nị ụnụ egini oku m dọn, gi ni ọrụn-atụmẹnya ndị m rụn dọn, kẹni ụnụ marịn lẹ n'o we ụnụ ẹnya nị Chuku-Nẹdi rị imẹ m, mmẹ nwẹn rị imẹ Chuku-Nẹdi.”
39Ya wẹ nọ chọzị nị wẹ nwụnrụn a, kanị ọ nọ gbụnahịn wẹ.
40Ya Jizọsị nọ kinzi azụụn, fetu Iyi Jọdanị, shi ebẹhụ Jọnụ te nọ e mẹ ịhịan mirin-Chuku ogẹn mbụ, ọ nọ nọdị ebẹhụ. 41Ndị bu ọda nọ bịa d'e kunrun ẹ, Wẹ hụ a sị, “Jọnụ arụnnị akpụ ọrụn-atụmẹnya ohu, kanị, ihiẹn ile Jọnụ ku banyeni okẹnnyẹni wụ ezioku.”
42Ya ndị bu ọda nọ kwerini Jesu ebahụn.
Chwazi Kounye ya:
Jọnụ 10: ikkBI
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.