Matayo 1
1
Mwaango wamwa Yesu Kiristo
(Luk 3:23-38)
1Gëtabu ga mwango wamwa Yesu Kiristo, mwana wamwa Daudi, mwana wamwa Iburahamu. 2Iburahamu naa tata wamwa Isaka, na Isaka tata wamwa Yakobo, na Yakobo tata wamwa Yuda na vaunaakwe. 3Yuda tata wamwa Faresi na Sara nyinya wawe naa Tamari, Faresi tata wamwa Hesironi, Hesironi tata wamwa Rami, 4Rami tata wamwa Aminadabu, Aminadabu tata wamwa Nasoni. Nasoni tata wamwa Salimoni, 5Salimoni tata wamwa Boasi nyinya wakwe naa Rahabu. Boasi tata wamwa Obedi na nyinya wakwe Ruti. Obedi tata wamwa Yese, 6na Yese tata wamwa mutemi Daudi. Daudi naa tata wamwa Solomoni na nyinya wakwe naa mukhema wamwa Uria. 7Solomoni tata wamwa Rehoboamu. Rehaboamu mweeso noo tata wamwa Abiya. Abiya naa tata wamwa Asa. 8Asa tata wamwa Yehosafati, Yehosafati tata wamwa Yoramu, Yoramu tata wamwa Usia. 9Usia tata wamwa Yotamu, Yotamu tata wamwa Ahasi na Ahasi tata wamwa Hesekia. 10Hesekia tata wamwa Manase na Manase tata wamwa Amosi, Amosi tata wamwa Yosia. 11Yosia tata wamwa Yekonia na vaunaakwe Rësëë naa itungo nënaa Ayahudi vëgahorwa nënaa vahumwa fëta na utowa uBabeli.
12Nënaa Ayahudi vahumwa fëta vatowa uBabeloni: Yekonia naa tata wamwa Sealitiëli, Sealitieli tata wamwa Serubabeli, 13Serubabeli tata wamwa Abihudi, Abihudi tata wamwa Eliakimu, na Eliakimu tata wamwa Asori. 14Asori tata wamwa Sadoki, Sadoki tata wamwa Akimu, Akimu tata wamwa Eliudi. 15Eliudi tata wamwa Eleasari, na Eleasari tata wamwa Matani, na Matani tata wamwa Yakobo. 16Yakobo tata wamwa Yosefu mughohi amwa Mariamu, gwa wasuu në Yesu agafafwa, nëugutaanwaa Kiristo.
17Uvii mpafo yoong'e ufuma kunë Iburahamu faka kunë Daudi naa mpafo ikumi na ine, na ufuma kunë Daudi faka Ayahudi nënaa vëgahumwa fëta na utowa uBabeli mpafo ikumi na ine, na ufuma utowa uBabeli faka kunë Kiristo mpafo ikumi na ine.
Ufafwa kunë Yesu
(Luk 2:1-7)
18Uvii, Yesu Kiristo agafafwa vii: Mariamu nyinya wakwe, naa wakengeerwe na Yosefu. Ëgweeso nënaa ëkëë vinëkhaa itambëëmwe mwino mughosya na mukhema, agamanyëka mwino naa mwito gwa udaho wa Mwahu Mweru. 19Yosefu mughohi wakwe gusoko naa muntu nëughookie mu uduvi, wakwe, na gwa udëa umuvirya mënyaa agaramua umureka gwa gëmpihë. 20Ëgweeso nënaa ëkëë uguriinkanëya rësëë, malaëka wa Müküü agamudwëëra mu ndoti ugumwëëra, “Yosefu, mwana amwa Daudi, utaoghofee umuhora Mariamu mukhema ako, gusoko wito wasuu nëuwukweti, wa Mwahu Mweru. 21Ugutunguka mwana wa gëghosya, veenoo ugumutaana rina rakwe Yesu, gusoko ujie uvatyoa antu vakwe ufuma mumahutye awe.” 22Ayaa oong'e ëgatendeka uning'anëe ukhani nënaa Müküü agauhanya ukëëra kunë munyagëdaghu:
23“Muncha muteere nëakëë
inateniwa uguvucha wito na ugumufafa
mwana wa gëghosya, mweeso noo
ugutaanwa Imanueli.”
(Rianaayo,
Muungu wë itambëëmwe na see).
24Yosefu nënaa wafëtya, agatenda mwino chuu malaëka wa Müküü naawamukhanëa, agamuhora mukhemaakwe agamutoa ukhaya. 25Ëgweeso inamumanyaa mba nduvë gëmwërë faka afoo nënaa Mariamu agitungua mwana wagëghosya. Yosefu mweeso noo agamutaana rina rakwe Yesu.
Chwazi Kounye ya:
Matayo 1: RNT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Kirimi New Testament © Bible Society of Tanzania, 2008.