Génesis 11
11
Babelchö törrita rurayanqan
1Tsay witsan llapan runakuna juk idiömallatam parlayaq. 2Rupay yarqamunan kaqpita aywakurmi Sinar#11.2 Sinarqa Babiloniam karqan. ninqanchö tariyarqan jatunkaray pampata. Tsaychömi paykunaqa llapan täyarqan.
3Tsaychö taykarmi willanakur niyarqan: <<Atska ladrillukunata ruraskir jornuchö kuwashun>>.
Tsaymi willanakuyanqannölla ladrillukunata rurayarqan rumipa rantin tsaywan pirqayänanpä. Tsay ladrillukunatam breawan pirqayarqan. 4Tsaypita yapay willanakurmi niyarqan: <<Tsay ladrillukunawan jatun markata rurashun. Tsaynölla ciëluman chaqpä törrita shäritsishun. Tsaynöpam pïmaypis reqimäshun. Tsaymi mashtakashqa kanantsikpa rantin llapantsikpis kayllachöna täshun>>.
5Tsaymi Tayta Dios ciëlupita urämurqan markata y törrita runakuna shäriykätsiyanqanta rikananpä. 6Tsayta rikaykurmi Tayta Dios yarpachakur nirqan: <<Paykunaqa tsay idiömallata parlarmi shumaq willanakur tsaynö ruraykäyan. Tsay markata y törrita shäritsiyta ushaskirqa mastam imatapis rurayanqa. 7Tsaynö kaykaptinqa paykunaman aywar pantatsishun tsay idiömallata manana parlayänanpä. Tsaynöpam juk idiöma juk idiömatana parlar manana tantiyanakuyanqanatsu imata parlaykäyanqantapis>>.
8Tsaynö nirmi Tayta Dios llapan runakunata maytsaymanpis mashtakätsirqan. Tsaynöpam shäritsiyanqan markata ushayarqannatsu. 9Tsay markachömi Tayta Dios pïmay runakunata pantakätsir idiömanta jukman jukman tikratsirqan. Tsaynö pantakätsinqanpitam tsay markapa jutin karqan Babel.#11.9 Babel ninanqa pantakätsin ninanmi. Mana tantiyanakurnam runakunaqa maytsaypapis mashtakar aywakuyarqan.
Sempa tsurinkunapita miraqkuna
1 Crónicas 1.24-27
10Kaychömi qellqashqa kaykan Sempa tsurinkunapita y paykunapita miraqkunapäpis.
Diluviu kanqanpita ishkay watatam Sempa tsurin Arfaxad yurirqan. Tsay witsan Sem kaykarqan pachak (100) watayuqmi. 11Tsurin Arfaxad yurinqanpita Sem kawarqan pitsqa pachak (500) watarämi. Sempa tsurinkuna warmipis ollqupis kayarqanrämi.
12Arfaxad kimsa chunka pitsqa (35) watayuq kaykaptinmi tsurin Sala yurirqan. 13Tsurin Sala yurinqanpita Arfaxad kawarqan chusku pachak kimsa (403) wata masrämi. Arfaxadpa tsurinkuna warmipis ollqupis kayarqanrämi.
14Sala kimsa chunka (30) watayuq kaykaptinmi tsurin Heber yurirqan. 15Tsurin Heber yurinqanpita Sala kawarqan chusku pachak kimsa (403) wata masrämi. Salapa tsurinkuna warmipis ollqupis kayarqanrämi.
16Heber kimsa chunka chusku (34) watayuq kaykaptinmi tsurin Peleg yurirqan. 17Tsurin Peleg yurinqanpita Heber kawarqan chusku pachak kimsa chunka (430) wata masrämi. Heberpa tsurinkuna warmipis ollqupis kayarqanrämi.
18Peleg kimsa chunka (30) watayuq kaykaptinmi tsurin Reu yurirqan. 19Tsurin Reu yurinqanpita Peleg kawarqan ishkay pachak isqun (209) wata masrämi. Pelegpa tsurinkuna warmipis ollqupis kayarqanrämi.
20Reu kimsa chunka ishkay (32) watayuq kaykaptinmi tsurin Serug yurirqan. 21Tsurin Serug yurinqanpita Reu kawarqan ishkay pachak qanchis (207) wata masrämi. Reupa tsurinkuna warmipis ollqupis kayarqanrämi.
22Serug kimsa chunka (30) watayuq kaykaptinmi tsurin Nacor yurirqan. 23Tsurin Nacor yurinqanpita Serug kawarqan ishkay pachak (200) wata masrämi. Serugpa tsurinkuna warmipis ollqupis kayarqanrämi.
24Nacor ishkay chunka isqun (29) watayuq kaykaptinmi tsurin Taré#11.24 Wakin traduccionkunachöqa Térah niyanmi. yurirqan. 25Tsurin Taré yurinqanpita Nacor kawarqan pachak chunka isqun (119) wata masrämi. Nacorpa tsurinkuna warmipis ollqupis kayarqanrämi.
26Taré qanchis chunka (70) watayuq kaykaptin kimsarämi tsurinkuna karqan. Paykunapa jutinmi karqan Abram, Nacor y Harán.
Tarépita miraqkuna
27Kaychömi qellqashqa kaykan Tarépa tsurinkunapä y paykunapita miraqkunapäpis.
Tarépa tsurinkunam kayarqan Abram, Nacor y Harán. Haránpa tsurinnam karqan Lot. 28Ur markanchö taykäyaptillanrämi papäninpitapis mas puntata Haránqa wanurqan. Tsay markachöqa caldeo runakunam täyarqan.
29Abrampa warminmi karqan Sarai. Nacorpa warminnam karqan Haránpa tsurin Milca. Milcapa ñañanmi karqan Isca. 30Peru Saraiqa qolluqmi karqan.
31Ur markachö täranqanpitam Canaánchöna tänanpä Taré aywakurqan. Ur markaqa caldeo runakuna täyanqan markam karqan. Canaánman aywakurmi pusharqan tsurin Abramta, willkan Lotta y llumtsuynin Saraitapis. Aywaykäyanqanchö Harán markaman chaykurmi tsayllachöna täyarqan. 32Harán markachö taykarmi Taré wanurqan ishkay pachak pitsqa (205) watayuq kaykar.
Chwazi Kounye ya:
Génesis 11: qxo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2002, 2008, Wycliffe Bible Translators, Inc. All rights reserved.