1 Musa 4
4
Si Kain dekket si Abel
1Nai campur mo si Adam dekket si Hawa sinibagesna i, nai mengkandong mo daberru i. Itubuhken mo sada anak nina mo, “Merkitè pengurupi Dèbata enggo kujalo sada anak.” Igerari mo anak i si Kain. 2Nai itubuhken si Hawa nola ma mo sada anak, si Abel ngo gerarna. Permakan biri-biri ngo si Abel, tapi ukum si Kain peruma-uma ngo. 3Daoh-daoh arien nola ibuat si Kain mo hasil ndiulana i, ipèlèken mo taba Dèbata. 4#Heb. 11:4 Nai ibuat si Abel mo sada anak biri-biri situaen, isèat mo i, janah ipèlèken mo simerasana kalohon taba Dèbata. Sennang ngo atè Dèbata midah si Abel dekket sinipèlèkenna i, 5tapi itulak ngo ukum si Kain dekket sinipèlèkenna i. Melaga mo atè si Kain, janah mbara abèna. 6Nai idokken Dèbata mo taba si Kain, “Kasa melaga ko? Kasa mbara abèmu? 7Mula mendè pengelakomu, kennah tercèrem ngo ko; tapi mula nggodo ngo ulah-ulahmu, mèma mo dosa lako mbengket mi bagasen pusuh peratèenmu. Naing ikuasai dosa i ngo dirimu, tapi kennah talunkenmu ngo dosa i.”
8 #
Mat. 23:35; Luk. 11:51; 1 Joh. 3:12 Nai nina si Kain mo taba si Abel anggina i, “Ita mo laus mi juma.” Soh kessa kalak i, itangkup si Kain mo si Abel janah ibunuh.
9Ikuso Jahowa mo si Kain, “Idikè ngo si Abel anggimu i?”
Ialoi si Kain mo, “Oda kubettoh. Kennah aku pana mendèdah anggingku i?”
10 #
Heb. 12:24
Nai nina Dèbata mo, “Kasa ibahanken kono siso patut? Ai dilo-dilo ngo bangKu daroh anggimu i tanoh i nai, bagè sora mendiloken muat mengido bèla. 11Kenna sempetta mo ko, oda terbaing ko nèngè mengula tanoh i. Enggo iencep tanoh i daroh anggimu, bagè cara ipengangang tanoh i babahna menjalo daroh anggimu, tikan ibunuh ko ia. 12Mula iula ko tanoh i, oda nè uè tanoh i merèken hasil barang kadè pè; gabè maor-aor mo ko, oda lot bekkasmu hot i tanoh èn.”
13Nai nina si Kain mo taba Dèbata, “Mberratsu ngo hukumen i, oda tergongken aku. 14Ipuari Kono ngo aku i tanoh èn nai, ndaoh i hadeppenMu nai. Gabè kalak kadap mo aku, oda lot bekkasku hot i tanoh èn, gabè ibunuh kalak sipesimbak dekket aku mo aku.”
15Tapi nina Dèbata mo, “Oda. Mula ibunuh ko, kennah balessen pitu kalak ma bunuhen terkira dekket simemunuh kono i.” Nai ibaing Dèbata mo pertanda bai si Kain, asa barang isè sambing pesimbak dekketsa, ulang ibunuh ia. 16Nai laus mo si Kain i hadeppen Dèbata nai janah merian mo ia i tanoh mergerar “Bekkas Kadap” i kebincaren Eden.
Pemparen si Kain
17Tubuhen anak mo si Kain dekket sinibagesna i, ibaing mo gerarna si Henokh. Nai ipungkah si Kain mo kutana, janah ibaing mo gerar kutana i mengèkutken gerar anakna i. 18Anak si Henokh imo si Irad, janah anak si Irad imo si Mehuyael. Anak si Mehuyael imo si Metusael, anak si Metusael imo si Lamekh. 19Dua kalak ngo sinibages si Lamekh imo si Ada dekket si Zila. 20Itubuhken si Ada mo si Jabal, janah pemparen si Jabal imo bangsa permakan janah merian ibas sapo-sapo. 21Anggina mergerar si Jubal, janah pemparen si Jubal èn mo kalak peroning-oning kucapi dekket sordam. 22Ukum si Zila menubuhken si Tubal-Kain, janah pemparenna mo kalak peneppa perkekkas tembaga dekket bessi. Turang si Tubal-Kain mergerar si Naama.
23Mengerana mo si Lamekh taba sinibagesna sidua kalak i,
“Alè Ada, dekket kono alè Zila, dengkohken kènè mo!
Kubunuh ngo sada kalak anak perana, kerna ialo aku.
24Mula pitu kalak ibunuh mahan bèla si Kain,
kennah pitupuluh pitu kalak ngo bèlangku mula ibunuh aku.”
Si Set dekket si Enos
25Tubuh nola mo sada anak si Adam bai sinibagesna i. Nai nina si Hawa mo, “Enggo iberèken Dèbata bangku sada anak sikira gancih si Abel sienggo ibunuh si Kain.” Kerna i ibaing si Hawa mo gerarna si Set. 26Lot mo anak si Set, ibaing mo gerarna si Enos. Tikala i nai mo kalak tebenna menggegoli gerar Jahowa mula mersembah.
Chwazi Kounye ya:
1 Musa 4: LAIBTD
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)