Luk. 21
21
Ainakinet ŋina ka apuserut
(Mar. 12:41-44)
1Toŋoleŋolek Yesu toanyuwa ŋikabarak iwuanakinete ŋisiliŋa nasaduku ŋina ayai tooma Kai ka Akuj. 2Toanyuwa iŋes tari apuserut ŋina a ŋican ecakakini ŋikapun ŋiarei. 3Tolimu Yesu tema, “Akalimokini ayoŋ iyes kire atemar, ewuak apuserut ŋina a ŋican na ŋisiliŋa ŋulu alalak nasaduku, akilo ŋituŋa ŋuluce daadaŋ; 4anerae ecakanakinete ŋuluce daadaŋ ŋisiliŋa ŋulu erae ŋipiya alobari kec. Nai acakaki apuserut ŋin anakulyako keŋ ŋulu daadaŋ ayakar ka edaritor akeekiyar.”
Kirwor Yesu epite ŋolo inyasunere Akai ka Akuj
(Mat. 24:1-2; Mar. 13:1-2)
5Ani irworosi ŋikasyomak ŋice ŋakiro ŋuna ka Akai ka Akuj, akibuses ŋina a ŋamoru keŋ ka epite ŋolo esibusitere, tolimu Yesu tema, 6“Nu daadaŋ ŋuna iteete iyes edoli akoloŋit ŋina nyidoŋio tari apeimoru ewuoi a nege; eukoryo ŋamoru daadaŋ.”
Ŋican ŋulu eponito alokiŋaren
(Mat. 24:3-14; Mar. 13:3-13)
7Kiŋita ikes iŋes temasi, “Eketataman, ori mono itiyakinotor ŋakiro ŋun? Nyo eruwor akitoodikinet ŋina itoodiuni atemar adol apaki?”
8Toboŋok Yesu ikes tema, “Tocoito nyikimodik ituŋanan. Epote ŋikalalak irworosi alokiro kaŋ ebasi, ‘Ayoŋ iŋes ŋolo!’ kori ebasi, ‘Adol apaki!’ Nai tocoito iwuapakinete ikes. 9Kiuryasi nyikibul iirarete ŋakiro ŋuna ke ejiye ka ŋuna ke egurigur; itemokino ŋakiro ŋun totakanut mono, nai nyitoodiunito ikes atemar adol asalunet.”
10Kirworik nabo Yesu tema, “Ejikinosi ŋituŋa ŋulu ka akwap ka apei ka ŋulu ka akwap ka ace; ejikin apukan ka apukan, epeibuku ka ŋulu ke ecebuku. 11Eyakaun amaran ŋina ka akwap alowaetin a ŋulu egelegelya, nabo eyakaun eron ka ŋidekesyo daadaŋ ŋulu aronok; etakanunete ŋakitoodikineta ŋuna atyonok alokidiama, kitubulo ŋituŋa. 12Nai eriŋa ŋun daadaŋ nyitiyakina, ikikamunio iyes ikisicani nooi, ikiyaaryo iyes losinagogae ka mabus, ido itorikor akitowuo alokiŋaren ŋikarikok ka ŋikapolok aŋuna kaŋ. 13Apaki ŋin, iŋes iruworotor iyes ŋisuudae kaŋ. 14Kiuryasi nyikibul iyes ikotere ŋunalimuno kori epite ŋolo limunet, 15anerae ayoŋ elope akainakini iyes ŋakiro ŋuna ka aosou ŋuna emam ipei daŋ alokidiŋ ŋikusimoe ŋini epedori akiloc, kori apegakin. 16Ikilukinete iyes ŋikusikauruunak, atalokaato kus, ŋiyeneta kus ka ŋikusikonei ka epedorete tari akiar iyes ŋice. 17Ikiremokinosi ŋituŋa daadaŋ iyes aŋuna ke ekiro kaŋ. 18Nai emam tari etimat epei anakyes kus ŋolo ecakar. 19Ani kidaŋidaŋakis iyes ŋun, iunete akusikiyar.
Kirwor Yesu epite ŋolo inyasunere Yerusalem
(Mat. 24:15-21; Mar. 13:14-19)
20“Ani iŋolikinete iyes Yerusalem irikaunito ŋajorei a ŋimoi, toyenete atemar aapiki akinyasun iŋes. 21Itemokino ŋulu eyakasi Yudaya, toema lomoru; nabo ŋulu eyakasi Yerusalem, itemokino torotokis ka ŋulu eyakasi nariet, itemokino nyelot lotaun. 22Anerae erae ŋul ŋirwa ŋulu ka anyaŋan, kiyookinotor ŋuna igiritae Nakigireta daadaŋ. 23Erokyarosi nooi ŋirwa ŋulu anaberu a ŋuna epotiyete ka ŋuna itanakete! Anerae eyakaun ŋican ŋulu apolok nakwap na, nabo emini anyunyura ŋina ka Akuj lotuŋa ŋul! 24Earyo ikes ŋice ka atum, ŋice eruworosi ŋirikon nakwapin ŋunace; ipudaete ŋituŋa ŋulu nyerae Ŋiyudayan Yerusalem, akitodol ŋirwa ŋulu esalunia apukan a ŋituŋa a ŋulu nyerae Ŋiyudayan.
Abunore a Lokoku a Ituŋanan
(Mat. 24:29-31; Mar. 13:24-27)
25“Eyakaun ŋakitoodikineta nakoloŋ, lolap ka lokacer. Egeuni akwap daadaŋ aryeba ka amaran aŋuna ke eruye ka akimorokok ŋina ka anam. 26Emaranikinete ŋituŋa kirakanaros ebulit aŋuna a ŋican a ŋulu epote nakwapin daadaŋ; anerae emaranikinete tari ŋiboorei daadaŋ ŋulu alokidiama. 27Tosodi etakanuni Lokoku a Ituŋanan, iŋolikinio ebunit alodowuon ka apedor ka akica ŋina apolon. 28Ani edoli ŋirwa ŋulu iyookinotor ŋun daadaŋ, towua kireosi ŋakyes kus kidiama, anerae aapuu aiuno kus.”
Akitatamet ŋina ke ebobore
(Mat. 24:32-35; Mar. 13:28-31)
29Abu Yesu tolimok ikes akitadapet na tema, “Totamakisi mono iyes epite ŋolo ke ebobore ka ŋikito ŋuluce daadaŋ. 30Ani iŋolikinete iyes ŋakwii kec itilijaunete, toanyut atemar aapuu akamu. 31Ikwaŋinapei, ani iŋolikinete iyes ŋun itiyakin, toanyutu atemar aapuu Apukan ka Akuj adolun.
32“Akalimokini ayoŋ iyes kire atemar, nyedaun anyamet na eriŋa nyitiyakina ŋakiro ŋun daadaŋ. 33Edaunosi nakuj ka akwap, nai nyedaunosi ŋakiro kaŋ jik.
Itemokino tokienyete
34“Tokienyete! Kiuryasi adakanu, amera ka apodo ŋuna ka akiyar a na, nyikitumosi iyes, todolu akoloŋit ŋin atipei pa iyenete iyes, 35ikwa aloc. Itiyakin ŋakiro ŋun lotuŋa ŋulu a ŋakwapin a daadaŋ. 36Torubakisi ikienyete, nabo kilipete jwi jwi, ikotere toryamut agogoŋu ŋina ibucarotor anakiro a daadaŋ a ŋuna etakanunete ka towueta alokiŋaren Lokoku a Ituŋanan.”
37Ŋirwa ŋul, etatami Yesu alo Kai ka Akuj jwi jwi, ani ewari tolot lomoru a ŋikito a ŋulu enyaritae Olipa. 38Esyokanakinete ŋituŋa daadaŋ Kai ka Akuj akipup ŋakiro keŋ.
Chwazi Kounye ya:
Luk. 21: NIB2008
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngakarimojong Interconfessional Bible © Bible Society of Uganda, 2008.