Matthew 4
4
Jisu Matheemna
(Mk 1:12,13; Luk 4:1-13)
1Khawasuo Ratha khan Jisu kha neelramma Seitan in matheem nasik aruoi jei. Heb 2:18; 4:15
2Halli suun li zaan nisoommili bu angeipha, Jisu awon ahongchaam jei. 3Akathamak Seitan khan ama diang ahongli ati, “Nang Pathian Sapa kha na-e inchu, hiwa lung ngaihi waipool uolru ti-inlang chong pero.””
4Takkha Jisu'n aleimasang, “Chong inthiang in ati, “‘Waipool bitkhan miring ngai'n ring matormu, takkha Pathian murra kasuok chongramol ngaikhan inring sik eii.’’ ”” Innidan 8:3
5Khawasuo khan akathamak Seitan in Jisu hi Inthiang Khuopui khan aruoiya, Biak-inn insaangkhet chungnga aminngirra, 6ama diang ati, “Nang Pathian Sapa kha na-e inchu, natheinuo ah inchoomthaak ro, ajarchu chong inthiang in aril,
“‘Pathian in nang jarra ama tirton ngaidiang chongpeii apesik eii;
nakeii kha lungnga intook maknasik,
inmani'n nangkha naleipom inte.’’ ”” Minpkla 91:11,12
7Jisu'n ama diang amasang, “Hiwahi um chong inthiang in ati, “‘Nang in Napumi Pathian kha madan in enmaro.’’ ”” Minpkla 91:11,12
8Khawasuo khan akathamak Seitan in insaangtak chingbungnga aruoiya nuoipilchung rengram rakip le inmani rakip poina ngaikha ama diang aleiminmu. 9“Nang in keihi kemurkhup thep ah chubei nanatho inchu,”” “Kei'n hiwangai rakip hi nang kanapesik eii”” Seitan in ati.
10Khawapha Jisu'n aleimasang, “Siro, Seitan! chong inthiang in ati, “‘Napumi Pathian bitkha chubei thoro halli sepa thoro!’’ ”” Minpkla 91:11,12
11Khawapha akathamak Seitan khan Jisu kha alei mathaanjei; halli marwaan tirton ngai'n injuo ah ama kha inleisanjei.
Jisu Galilee ah Achuon Phutna
(Mk 1:14,15; Luk 4:14,15)
12John hi mikhumna ah indajei ti Jisu'n ajetpha, Galilee tiang aleisijei. Matt 14:3; Mk 6:17; Luk 3:19,20
13Ama'n Nazareth amathaanna, Zebulun li Naphtali ram Galilee tuidiil koolla kaom khuopui Capernaumma asiya ajuo omjei. Jn 2:12
14Hiwahi Pathian chongkachoi Isaiah diangnga ileiminril kha huui tungna eii,
15“Zebulun ram li Naphtali ram,
tuipui lamma kaom Jordan raalkhat tiang,
Zaatlop ngai ram, Galilee!
16Aziingna ah leikaom miring ngai'n
war kalok kha inmujei.
halli thina raliim ramma kaom ngai chungnga
war kha ajuowar jei.”” iti kha huui tungnasik eii. Isa 9:1,2
17“Ningmalung thuulru, ajarchu marwaan Rengram kha anaijei!”” iti achong kha khawa pha makheiya Jisu'n karil aphut jei. Matt 3:2
Jisu'n Ngakasur mi Mili Ikoi
(Mk 1:16-20; Luk 5:1-11)
18Jisu'n Galilee tuidiil khamma aheiwapha, Peter intia inkoi Simon khat-um anaipa Andrew, ama'n unai inni tuidiil khan leen inwor kha aleimu, ajarchu inmani kha ngakasur in eii. 19Jisu'n inmani diang ati, “Heiwaru, kei najuiru, halli kei'n nangni mi kasur naminchu kate.”” 20Khawapha takkhan inleen inda ah anuk inleijui jei.
21Ama'n hin aheiwapha unai inni khat, James le John, Zebedee sa ngai, inpa Zebedee le inruoiya rakuong inkhat ah, inmani leen inboolla in-om aleimu, halli Jisu'n inmani aleikoi, 22Khawapha takkhan inmani inrakuong khat-um inpa inda ah, ama nuk injuijei.
Jisu'n Mipui Minchuna rilpina khat-um mindamna
(Luk 6:17-19)
23Khawasuo Jisu'n Galilee rampumpui khan asi ah synagogue ngaikhan aleiminchu, halli rengram jarra Chongkahoi ngai arilpiya, rirai rakip karoon mi ngai khat-um kanangai aleimindam. Matt 9:35; Mk 1:39
24Ama jarra chongngai hi Syria rampumpui kha alei-inthang jei, khawa jarra mi ngai'n ama diang akana, rirai rakip kana ah kapoong ngai: ratha kathamak kaluut, rikei karoon, apang kathi rakip inhong ruoiya Jisu'n inmani rakip kha aleimindam jei. 25Galilee le Khuo Soom tiya injet (decapolis), Jerusalem, Judea, khat-um Jordan ram raaltiangnga inphut mipui katamtak in ama nuk inleijuijei.
Chwazi Kounye ya:
Matthew 4: KHMNT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament in Kharam © The Word for the World International and NECTAR, 2021.