OMOCHANKO 8
8
Omoerio bwâetoigo
1Nyasae akaba oinyorete Nuhu ne chingâiti chionsi, echiâorosana, na echiatugire, echiarenge amo nere ase obwato ime. Erio agwo Nyasae akagusia omwaga ase ense, na amache agachaka gokea. 2Chinsoko chiare kobera korwa inse amo nebibao bia igoro bigasiekwa, na embura yare korwa igoro egasira, 3na amache akagenderera gokea korwa ase ense, na ekero amatuko rigana erimo, na emerongo etano (150) aerete, amache agachaka gokeana. 4Ase rituko ria ikomi na gatano na kabere, riâomotienyi o gatano na kabere, obwato bogeterekerera ase egetunwa egetambe kiâArarati. 5Na amache akagenderera gokea goika omotienyi o ikomi. Ase rituko rie ritangâani riâomotienyi o ikomi ebichuria biâebitunwa bikarorekana.
6Nyuma yâamatuko emerongo ene kaerire Nuhu akaigora ekebao keria akorete ase obwato, 7agatoma ekegonkoru, na kerokio gekairuruka gochia aaria na aaria goika amache agakamoka korwa ase ense. 8Erio agatoma riruma arore gose amache akamokire korwa ase ense, 9korende riruma riria tirianyora aase rikogwa na gotacha namagoro aye, rikairana ase Nuhu obwato ime, ekiagera amache nao arenge igoro yâense engima. Ase igo akarambora okoboko kwaye, akaribwata, akarisoyia obwato ime ase arenge. 10Erio akaganya amatuko ande atano na abere, naende agatoma riruma riria korwa ase obwato. 11Riruma riria rikairana chinsa chia mogoroba, na rora, ndiabwate rito ribese riâomozeituni ase omonwa oye. Ase ayio Nuhu akamanya ngâa amache akamokire korwa ase ense. 12Naende akaganya amatuko ande atano na abere, agatoma riruma riria, na rirorio tiriairana asare naende.
13Ase omwaka bwâamagana atano na rimo, na oyomo, rituko rie ritangani riâomotienyi bwe ritangâani, amache agasira korwa ase ense. Nuhu akarusia ekerama kiâobwato, akarigereria, akarora ngâa ense yakamokire. 14Rituko riâemerongo ebere, na gatano na kabere riâomotienyi o kabere, ense ekaba yakamokire kegima.
15Erio Nyasae agatebia Nuhu, 16âSoka korwa ase obwato, aye na mokao, na abana bao abamura, na abakungu babo. 17Osoke amo na kera egetongwa kere moyo amo naye: chinyoni, ne chingâiti chigotaara, na echikwagura igoro ase ense, erinde chiibore chimenteke, chiichore ase ense.â 18Erio Nuhu agasoka amo na bamura baye, na mokaye, na baka bamura baye. 19Na kera engâiti, na kera eyekwagura, na kera enyoni, na ebitongwa binde bionsi bigotaara ase ense bigasoka amo noroiboro rwabo, korwa ase obwato.
Nuhu okorua ekengâwanso
20Erio Nuhu akaagachera Omonene egesasimero, akarusia eyemo ase kera engâiti, na ase kera enyoni echenegete, agachirua chibe ekengâwanso kiâogosambwa igoro ase egesasimero keria. 21Na ekero Omonene aigwete rimisu rigiya rikomogwenera, agateba ase omoyo oye ime, âTinkoragereria ense naende nonya ngâake ase engencho ya mwanyabanto, naki ebirengererio bie chinkoro chia mwanyabanto nebibe korwa obwana bwabo; nonya nebitongwa bionsi bire moyo tingocha kobisiria naende buna nakorete.
22âEngaki ense egendererete kobao,
nebe engaki yâogosimeka na eyâokogesa,
engaki yâobokendu na eyâomobaso omororo,
engaki yâetoigo na eyâegurugura,
omobaso na obotuko,
tichikoera nonya ngâake.â
Chwazi Kounye ya:
OMOCHANKO 8: EKEGUSIIBBLE
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
OLD EKEGUSII BIBLE PROTESTANT EDITION
ŠBible Society of Kenya, 2020