Lucas 19
19
Jesúsman Zaqueo creyikunqan
1Tsaypitanam Jericó markapa Jesús päsaykarqan. 2Tsay markachömi Zaqueo shutiyuq rïcu runa täkurqan. Paymi impuestu cobraqkunapa mandaqnin karqan. 3Tsay runam Jesústa alläpa reqiyta munarqan. Peru takshalla karmi maytsikaq runakuna tsapäyaptin rikayta puëdirqantsu. 4Tsaymi cörrilla puntaskir sicómoro jachaman lätarqan Jesús päsaqta rikänanpaq. 5Tsaypa päsaykarmi Zaqueuta rikaykur Jesús nirqan: <<Zaqueo, jina höra yarpamuy. Kananmi wajikiman patsatsimanki>>.
6Zaqueo sas yarpaskamurmi alläpa kushikur wajiman Jesústa pusharqan. 7Tsayta rikaykurmi runakuna Jesústa musyapar niyarqan: <<¡Imanirtan jutsasapa runapa wajinman patsakun!>>
8Wajinchö kaykarnam Zaqueo ichirkur Jesústa nirqan: <<Taytay, llapan kapamanqanpitam pullan kaqta waktsakunata qaraykushaq. Pitapis suwapushqa karqa chusku kuti mastam kutiykatsishaq>>.
9Jesúsnam nirqan: <<Kananmi kay wajiman salvación chämushqa. Kay runapis rasunpam Abrahampa castan. 10Oqrakashqakunata ashirnin salvananpaqmi Runapa Tsurin shamushqa>>.
Serviqninkunata patronnin qellayta prestanqan
Mateo 25.14-30
11Jesús tsaynö parlanqanta wiyar y Jerusalénman chänanpaqna kaptinmi runakuna yarpäyarqan: <<Kananchi Dios Yayapa mandakuynin qallanqa>>. Tsaynö yarpäyaptinmi Jesús iwalatsikuypa yachatsikur 12nirqan: <<Juk rïcu runash karu nacionman aywanaq rey kananpaq carguta chaskiskir kutimunanpaq. 13Manaraq aywarshi chunka serviqninkunata qayaskatsir atska qellayta#19.13 Griëguchömi nin cada ünu juk minata chaskinqanta. Juk minam karqan juk runa pachak (100) junaq arupukur gänanqannö. prestar ninaq: <Kutimunqäyaq kay qellaywan negociuta ruraykäyay>. 14Peru aywaskiptinnash marka majinkuna chikirnin qepanta willakuqkunata kachayänaq cargu entregaqta niyänanpaq: <Manam tsay runa mandayämaqnï rey kananta munayätsu>.
15<<Peru imanö kaptinpis payqa rey kananpaq carguta chaskimunaqshi. Tsaypita markanman kutimurshi qellaynin aykata gänanqanta musyananpaq qellayninta prestanqan serviqninkunata qayatsinaq. 16Tsayshi punta chaskiq kaq chaykur ninaq: <Taytay, qellaynikiwan chunka kuti mastam gänashkä>.
17<<Tsaynash patronnin ninaq: <Alli servikuqmi kanki. Wallkallapitapis qellaynïta miratsinqaykipitam chunka markachö mandakuq kanaykipaq churashayki>.
18<<Tsaypitanash jukaq serviqnin chaykur ninaq: <Taytay, qellaynikiwan pitsqa kuti mastam gänashkä>.
19<<Tsayshi paytapis ninaq: <Pitsqa markachö mandakuq kanaykipaqmi qamtapis churashayki>.
20<<Peru jukaqnash chaykur ninaq: <Taytay, kaychömi qellayniki. Päñuwan qepirkurmi churarätsishkä. 21Qamqa mana churanqaykipitam qorinki y mana murunqaykipitam cosechanki. Tsaynö yaqa runa kaptikim mantsakur churarätsishkä>.
22<<Patronninnash ninaq: <¡Qamqa mana confiakuypaq servikuqmi kanki! Kikikipa shimillaykim qarpushunki. Yaqa kanqäta musyaykar, mana churanqäpita qorinqäta musyaykar y mana murunqäpita cosechanqätapis musyaykarqa 23¿imanirtan qellaynïta bancullamanpis churarqaykitsu kutimur wachaynintawan qorinäpaq?> 24Tsaychö runakunatanash ninaq: <¡Katsinqan qellaynïta qechuskir chunka kuti mas miratsiq kaqta entregaykuyay!> 25Paykunanash niyänaq: <Taytay, peru paypaqa chunka masnam qellaynin kan>.
26<<Patronnash ninaq: <Confiakuypaq kaqtaqa mastam alistapanqa. Peru mana confiakuypaq kaqtam sïqa ichiklla katsinqantapis qechunqa. 27Rey kanäta mana munar chikimaqkunataqa ¡kayman apaykamur puntächö wañuskatsiyay!> >>
Jerusalénman Jesús yaykunqan
Mateo 21.1-11; Marcos 11.1-11; Juan 12.12-19
28Tsaynö yachatsikuskirnam Jerusalénman Jesús aywar sïguirqan. 29Olivos lömachö Betfagé y Betania markakunaman chaykarnam ishkaq discïpulunkunata mandar 30nirqan: <<Taqay markaman aywayay. Chaykurmi pipis manaraq montashqa ashnu wataraykaqta tariyanki. Tsay ashnuta paskaskir apayämuy. 31Pipis <¿imanirtan ashnuta paskaykäyanki?> niyäshuptikiqa <Señor Jesúsmi wanan> niyanki>>.
32Discïpulunkuna aywarmi Jesús ninqannölla tariyarqan. 33Ashnuta paskaykäyaptinnam ämunkuna tapuyarqan: <<¿Imanirtan ashnüta paskaykäyanki?>>
34Paykunanam niyarqan: <<Señor Jesúsmi wanan>>.
35Ashnuta chaykatsir punchunkunata karunarkuyaptinmi Jesús montarqan. 36Tsaynö montashqa aywaykaptinnam runakuna kushikur punchunkunata näniman mashtayarqan.#19.36 Tsay witsay markaman juk rey yaykuptin runakuna kushishqa chaskirmi jakunkunata, punchunkunata y palmatapis näniman mashtayaq. 37Olivos lömapita urämunanpaq kaykaptinnam milagrukunata rikäyanqanpita kushikur maytsikaq discïpulunkuna qayaykachar Dios Yayata alabar qallaykuyarqan. 38Tsaynö alabarmi niyarqan:
<<¡Dios Yayapa shutinchö shamuq rey alabashqa kaykullätsun!#Sal. 118.25-26.
¡Dios Yayawan allina kawakushun!
¡Ciëluchöpis alabashqa kaykullätsun!>>
39Tsaynam runakunapa rurinchö aywaq wakin fariseukuna niyarqan: <<Rabí, qatishuqnikikunata upälla kayänanpaq piñapay>>.
40Peru Jesúsnam nirqan: <<Noqam niyaq: Paykuna upällayaptinqa rumikunapis qayaykacharmi alabayanqa>>.
41Jerusalénman chaykarnam markata rikaskir Jesús waqar 42nirqan: <<¡Imanömi munä Dios Yayawan alli päsakuychö kayänaykipaq kanan junaqllapis tantiyayänaykita! ¡Peru manam tantiyayankitsu! 43Tsaymi mana alli tiempukuna qamkunaman chämunqa. Tsay junaqkunam marka murällaykikuna waqtanman chikiyäshuqnikikuna allpata montunarkur maylä tsayläpa atacayäshunki. 44Wajikikunatapis juchuskatsirmi wamraykikunatawan wañutsiyäshunki. Manam ni juk rumillapis perqaraykar quëdanqatsu. Tsaynömi kanqa Dios Yaya shamunqanta mana cäsuyanqaykipita>>.
Templuchö rantikuqkunata Jesús qarqunqan
Mateo 21.12-17; Marcos 11.15-19; Juan 2.13-22
45Tsaypitanam templupa patiunman Jesús yaykuskir tsaychö rantikuqkunata [y rantiqkunata] qarqur 46nirqan: <<Dios Yayapa palabranmi nin: <Wajïqa runakuna mañakayämänanpaqmi kanqa>.#Isa. 56.7. Tsaynö nikaptinmi qamkunaqa suwakunapa machayninman tikratsiyashkanki>>.#Jer. 7.11.
47Tsaypitanam templupa patiunchö waran waran Jesús yachatsikurqan. Mandakuq sacerdötikuna, ley yachatsikuqkuna y autoridäkunam imaykanöpapis Jesústa wañutsiyta munayarqan. 48Peru Jesús yachatsikunqanta llapan runakuna kushishqa wiyayaptinmi ni imanöpa wañutsiyta puëdiyarqantsu.
Chwazi Kounye ya:
Lucas 19: qxn
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.