GÉNESIS 3
3
Runaca, Diosta na cazushcachu
1Ashtahuangarin Mandaj Taita Dios rurashca, pambapi causanajuj animalcunamanda yalica culebrami, umachinata alipacha yachaj carca. Chai culebrami, huarmitaca cashna nirca:
—Shina cashpaca, ¿Taita Dioschu cangunataca: ‘Huertapi tucui yuracunamandaca, na micunachu canguichi’ nirca?— nishpami tapurca.
2Shina tapujpimi huarmica, culebraman cashna nishpa tigrachirca:
—Huertapi tiaj yuracunapi fucushcataca, micui ushanchimi. 3Ashtahuangarin Taita Diosca, huerta chaupipi shayajuj yurapi fucushcamandami cashna nirca: ‘Ama huañungapaca, chai yuramandaca napacha micunachu canguichi, tacaritapash na tacarinachu canguichi’ nircami— nirca.
4Shina nijpimi culebrapash, huarmitaca cashna nirca:
—Na huañunguichica. 5Ashtahuangarin chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi. Chaitaca, Taita Diospash yachanmi— nircami.
6Chashna nijpimi huarmica, yurapi fucushcataca micungapaj ali cajta, munanayai ricurijujta ricurca. Chai yurapi fucushcataca, ali yachaita japingapajpash alipacha cajtami ricurca. Chaimandami, chai yurapi fucushcata japishpa micurca. Shinallata paipaj cusamambash carajpimi paipash, chai huarmishnallata micurca. 7Chaita micujhuanmi, ishcandipaj ñavi pascarijpi, lluchullacuna cashcata yachanajurca. Shina cashpami jigos fangacunata sirashpa, paicuna quilparinata ruranajurca.
8Ña chishi huairapimi, Mandaj Taita Diostaca huertapi purijujta uyanajurca. Runaca, paipaj huarmindimi, Mandaj Taita Diospaj ñaupajmanda, huerta yura ucucunapi pacajurca. 9Ashtahuangarin Mandaj Taita Diosca, runataca:
—¿Maipita cangui?— nishpami cayarca.
10Shina cayajpimi paica, cashna nishpa tigrachirca:
—Huertapi can rimajta uyashpami, lluchulla caimanda manllashpa pacajurcani— nircami.
11Shina nijpimi Taita Diosca, cashna nirca:
—Can lluchulla cajtaca, ¿pita villarca? ¿Ama micunguichu nishpa, ñuca mandashca yuramandachu micurcangui?— nircami.
12Shina nijpimi runaca, cashna nirca:
—Ñuca cumba cachun can carashca huarmimi, yuramanda japishpa carahuarca. Shina carajpimi, ñucapash micurcani— nircami.
13Shina nijpimi Mandaj Taita Diosca, huarmitaca:
—¿Imatata rurarcanguiyari?— nirca.
Shina nijpimi, huarmica:
—Culebra umachijpimari micurcani— nirca.
14Shina nijpimi Mandaj Taita Diosca, culebrataca cashna nirca:
—Can chashna rurashcamandaca, tucui animal puramandapash, pambapi causaj tucui animal puramandapash yali nalicachi tucushcami cangui. Chaimandami vijsahuanlla llucashpa puringui. Cambaj tucui causaipimi, alpata micushpa causangui. 15Canhuan, huarmihuanga fiñanajushpa causachunmi churagrini. Shinallata cambaj miraihuambash, huarmipaj miraihuambash fiñanajuchunmi churasha. Paipaj miraimi, candaca umapi chugrichinga. Canga, chaqui talonbimi chugrichingui— nircami.
16Huarmitaca cashnami nirca:
—Huahuata can vijsayu tucushca punllacunapica, ashtaca nanaitami mirachisha. Chaimandami, huahuacunataca nanaihuan ungungui. Shinallata cambaj munaica, cambaj cusapajmi canga. Paimi, candaca mandanga— nircami.
17Runatapash cashnami nirca:
—Cambaj huarmi rimajta cazushpami: ‘Chai yuramandaca, ama micunguichu’ nishpa ñuca mandashca yuramanda micushcangui. Cambaj jahuami, alpapash ninanda nalicachi tucunga. Alpamandaca, tucui cambaj causai punllacunapimi, imatapash shinllita rurashpa micungui. 18Pambapica, jatun casha yuracuna, uchilla cashacunami viñanga. Pambapi viñashca jihuacunatami micungui. 19Can cutin alpa tucungacamanmi, imatapash rurashpa, cambaj ñavipi ninanda jumbishpa micungui. Canga, chai alpamanda japishpami rurai tucurcangui. Ñutu alpami cangui, ñutu alpallatami tigrangui— nircami.
20Adanga, paipaj huarmitaca, tucui gentecunapaj mama tucuna cajpimi, Eva shutita shutichirca. 21Mandaj Taita Diosca runamambash, paipaj huarmimambash animalpaj caracunatami, churajunata rurashpa churachirca. 22Chashna churachishpami Mandaj Taita Diosca, cashna nirca: “Ricui, runaca alita, nalitapash yachashpami, ñucanchishnalla tucushca. Cunanga, paipaj maquita chutashpa, causaita cujuj yuramanda japishpa micushpa, causaita causachunga na saquinachu canchi” nircami.
23Mandaj Diosca, alpamanda japishpa paita rurashca alpapillata imatapash rurashpa causachunmi, Edén huertamanda llujchishpa cacharca. 24Runata canllaman llujchishpaca, Edén huertamanda indi llujshimuj ladomanmi, querubín nishcacunata churarca. Shinallata tucui ladocunata muyundi rupajuj shuj espadatapashmi churarca. Causaita cujuj yuraman rina ñanda cuidachunmi, chashna churarca.
Chwazi Kounye ya:
GÉNESIS 3: QUII
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Quichua Imbabura Bible © United Bible Societies, 1994.