GÉNESIS 1
1
Cai pachata Dios ruhuashcamanta
1Imapish manarac tiyacpimi, Diosca jahua pachatapish, cai pachatapish ruhuarca. 2Cai pachaca chushaclla, manchaipac pura, imaman ricchapish mana carcachu. Diospac Espiritullami caiman chaiman yacu jahuapi cuyuricurca.
3Chashna cacpimi Diosca: «Achic tiyachun» nirca. Shina nicpica, achic tucurcallami. 4Diosca chai punzhataca alli cashcatami ricurca. Shinami punzhataca puramanta chicanyachirca. 5Chai achictaca «Punzha» nishpami shutichirca. Shinallatac purataca «Tuta» nishpami shutichirca. Chashnami chishiyashpa punta punzha tucurca. Chashnami callari punzhaca saquirirca.
6Chai quipaca Diosca: «Cai pacha yacuta uraman jahuaman shuc chicanyachic tiyachun» nirca. 7Chashnami Diosca shuc parte yacutaca jahuaman, shuc parte yacutaca uraman chicanyachicta ruhuarca. Chashnami saquirirca. 8Chai chicanyachictaca Diosca «Jahua pacha» nishpami shutichirca. Chashnami chishiyashpa, ishcainiqui punzha tucurca.
9Shinallatac Diosca: «Chaquishca allpa tiyachun, cai pacha yacuca shucllaman tandarichun» nirca. Shina nicpica, chashnatacmi saquirirca. 10Quipaca chai chaquishcataca «Allpa» nishpami shutichirca. Tandarishca yacutaca «Mama cucha» nishpami shutichirca. Diosca chaitaca alli cashcatami ricurca.
11Chai quipami Diosca: «Cai allpapica granota, muyuta pucuc tucuilaya quihuacunapish, yuracunapish huiñachun» nirca. Shina nicpica, chashnatacmi saquirirca. 12Chashna nicpica, chashnami allpapica verdinlla quihuapish, imalaya pucuc quihuapish, muyuta cuc yurapish huiñashpa pucurca. Chashnami imalaya muyupish chai yuracunapi tiyarca. Diosca chaitaca alli cashcatami ricurca. 13Chashnami chishiyashpa, quimsaniqui punzha tucurca.
14Chai quipami Diosca: «Punzhacunapish, huatacunapish tiyashcata yachangapac tutahuan punzhahuan chicanyachic achicyachiccuna tiyachun. 15Cai pachata achicyachichunca jahua pachapi shuc achicyachic tiyachun» nirca. Shina nicpica, chashnatacmi saquirirca. 16Diosca ishcai jatun achicyachiccunatami ruhuarca. Shuc jatun achicyachictaca punzha achicyachichun, uchilla achicyachictaca tuta achicyachichunmi ruhuarca. Shinallatac lucerocunatapish ruhuarcami. 17Cai achicyachiccunataca cai allpata achicyachichunmi, Diosca jahua pachapi churarca. 18Chaicunataca punzhapish, tutapish achicyachichun, shinallatac amsamanta achicta chicanyachichunmi ruhuarca. Diosca chaitaca alli cashcatami ricurca. 19Chashnami chishiyashpa, chuscuniqui punzha tucurca.
20Chai quipami Diosca: «Yacupi causac animalcunapish tiyachun, jahuata volac animalcunapish chicanyachishca jahua pachapi tiyachun» nirca. 21Diosca mama cuchapi jatun manchana animalcunatapish, tucui causaiyuc animalcunatapish ruhuarcami. Yacupi causac animalcunapish, volac animalcunapish miranacuchunmi chaipurallata ruhuarca. Diosca chaitaca alli cashcatami ricurca. 22Dios chai animalcunata bendiciashpaca: «Achcata mirashpa, achca tucushpa, mama cuchapi jundarichun shinallatac jahuata volac animalcunatapish, cai pachapi achca tucushpa jundarichun» nircami. 23Chashnami chishiyashpa, pichcaniqui punzha tucurca.
24Chai quipami Diosca: «Allpapica tucuilaya animalcuna, sacha animalcunapish, pambata aisarishpa puric animalcunapish, chaipuralla miranacuchun» nirca. Shina nicpica, chashnatacmi tucurca. 25Diosca allpapi tiyac sacha animalcunatapish, pambata aisarishpa puric animalcunatapish, charina animaltapish chaipurallatami ruhuarca. Diosca chaitaca alli cashcatami ricurca.
26Shinallatac Diosca: «Ñucanchic shina cachun, shuc runata ruhuashun. Mama cuchapi causac animalcunapish, jahuata volac animalcunapish, sacha animalcunapish, charina animalcunapish, allpata aisarishpa puric animalcunapish paipacmi canga» nirca.
27Diosca pai shinatami
runataca ruhuarca.
Chashnami caritapish,
huarmitapish ruhuarca.
28Dios paicunata bendiciashpaca: «Achcata mirarishpa, achca tucushpa, cai pachapi jundarichic, shinallatac cazuchichic. Mama cuchapi tiyac challuacunatapish, jahuata volac animalcunatapish, tucui cai pachapi tiyac animalcunatapish mandaichic» nirca.
29Chai quipami Diosca: «Riquichic, cai allpapi tiyac muyuta pucuc yuracunatapish, micuna granota pucuc granotapish, muyuta cuc yuracunatapish cunimi. Tucui caicunamantami micui pudinguichic. 30Allpapi tiyac sacha animalcunaman, jahuata volac animalcunaman, tucui causaiyuc animalcunaman, allpata aisarishpa puric animalcunamanca verdinlla quihuatami cuni» nirca. Chashnami tucurca. 31Diosca tucui pai ruhuashcacunataca mai alli cashcatami ricurca. Chashnami chishiyashpa, suctaniqui punzha tucurca.
Chwazi Kounye ya:
GÉNESIS 1: QCA10
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.