यूहन्ना 8
8
1दिलेया येशू जैतून बिबै कोंर ह्याइ। 2प्हँन्हाँग्धों न्हाँक्कर्न खी धबै कोंउँइँले युसि मन्दिरर ह्यामा ताँन् म्हिमैं खी ङाँर खइ। धै येशू क्हुँसि चमैं लोमिंर होंइ। 3च त्हेर्न शास्त्रिमैं नेरो फरिसीमैंइ च्हमिरि घ्रि फ्रें क्ल्योंरिबै त्हेर स्यासि क्हाइ पखइ, धै ताँन् म्हिमैंए म्हाँजोर राल् पिंइ। 4चमैंइ यशूने बिइ, “ओ गुरु, चु च्हमिरि फ्रें क्ल्योंरिबै त्हेर ङिइ स्याइ। 5परमेश्वरजी पिंबै ठिमर मोशाइ छाबै म्हिमैं युँमाइ प्रिंसि सैवाद् बिइमुँ। चु ताँर क्हिजी तो बिमुँ?”#लेबी २०:१०; व्य २२:२२-२४ 6चमैंइ येशूए सैं किंबर#8:6 येशूए सैं किंबर येशूजी च ठिम आम्हाँदिस्याँ छ्याब् पिंल् खाँम्। चु ताँ बिल। दिलेया येशू कुरसि योरिइ सर प्ह्रिबर होंइ।
7चमैंइ घरि-घरि येशूने ताँमैं ङ्योएरिमा येशू रासि चमैंने बिइ, “क्हेमैंए न्होंरि खाबइ तिफुँइ पाप आलइमुँ, चइन ओंसों चु च्हमिरि युँमाइ प्रिंरिगे।” 8छ बिबै लिउँइँ येशू धबै कुरसि योरिइ सर प्ह्रिइ। 9चु ताँ थेमा ओंसों खिब्मैं त्होंह्याइ, धै घ्रि घ्रिले अरू म्हिमैं या त्होंह्याइ। छतमा येशू घ्रिन् च च्हमिरिने तयाइ, च च्हमिरि बिस्याँ खीए ओंसों रारिल। 10झाइले येशूजी च च्हमिरि ङाँइ ङ्ह्योसि बिइ, “ओ नानि, चमैं खनिर ह्याइ? खाबज्यै क्हिए फिर छ्याब् आल्हैदि वा?”
11चइ बिइ, “प्रभु, खाबज्यै या आल्हैदि।”
येशूजी बिइ, “ङज्यै या क्हि छ्याब् आल्हैदि। ह्याद्! तारे धबै पाप आलद्।”]
येशू ह्युलर्बै चारबै ह्वे ग
12येशूजी धबै चमैंने बिइ, “ङ ह्युलर्बै चारबै ह्वे ग। ङए लिलि प्रबै म्हि मिछु खैबर प्रल् त्हुरिब् आरे। दिलेया चइ खोंयोंइ आखाँबै छ्ह पिंबै चारबै ह्वे योंब्मुँ।”#मत्ती ५:१४; यूह ९:५
13येशूए ताँ थेसि फरिसीमैंइ खीने बिइ, “क्हिजी ह्रोंसए बारेर ग्वाइ पिंरिइमुँ। छतसि क्हिए ग्वाइ क्ह्रोंसेंन्बै तल् आखाँ।”#यूह ५:३१
14येशूजी बिइ, “ङइ ह्रोंसए बारेर ग्वाइ पिंलेना ङए ग्वाइ क्ह्रोंसेंन्बै मुँ। ङ खनिउँइँले युजी खनिर ह्यासिन् मुँ बिसि ङइ सेइमुँ, दिलेया ङ खनिउँइँले युइ धै खनिर हयासिन् मुँ बिब क्हेमैंइ आसे। 15क्हेमैंइ म्हिइ लब् धोंले निसाफ लमुँ, ङइ खाबलाज्यै या निसाफ आल। 16ङइ निसाफ लइ बिस्याँ ङइ लबै निसाफ क्ह्रोंसेंन्बै तब्मुँ, तलेबिस्याँ निसाफ लब ङ घ्रि आरे, ङ कुल्मिंबै आबा या ङने बालु मुँ। 17क्हेमैंए ठिमरै या म्हि ङ्हिंइ पिंबै ग्वाइ क्ह्रिबिस्याँ च ताँ क्ह्रोंसेंन्बै तब्मुँ बिसि प्ह्रिइमुँ।#व्य १९:१५ 18ङए बारेर ङ ह्रोंसइन ग्वाइ पिंमुँ, धै ङ कुल्मिंबै आबाज्यै या ङए बारेर ग्वाइ पिंमुँ।”
19चमैंइ खीने “क्हिए आबा खनिर मुँ?” बिसि ङ्योएमा
येशूजी चमैंने बिइ, “क्हेमैंइ ङै या ङो आसे, ङए आबालाज्यै या ङो आसे। क्हेमैंइ ङलाइ ङो सेस्याँ ङए आबालाज्यै ङो सेमल।”
20चु ताँमैं येशूजी मन्दिरर मुइ झोंबै बाकस ङाँर क्हुँसि बिब् ग। दिलेया खाबज्यै या खीलाइ आक्हा। तलेबिस्याँ खीए सिबै त्हे अझै आतल।
21येशूजी धबै चमैंने बिइ, “ङ छुइले ह्याब्मुँ, झाइले क्हेमैंइ ङ म्हैब्मुँ, दिलेया क्हेमैं ह्रोंसए पापर्न सियाब्मुँ। तलेबिस्याँ ङ ह्याबै क्ल्ह्योर क्हेमैं खल् आखाँ।”
22छबिमा यहूदी चिबनाँब्मैंइ बिइ, “तो बिगे, छ बिब? ‘ङ ह्याबै क्ल्ह्योर क्हेमैं खल् आखाँ’ बिब चुम् सिल् म्हैमुँ उ तो जा?”
23धबै येशूजी चमैंने बिइ, “क्हेमैं न्होंउँइँबै ग। ङ क्होउँइँबै ग। क्हेमैं चु ह्युलर्बै ग। ङ चु ह्युलर्बै आङिं। 24ङइ क्हेमैंने बिइ, क्हेमैं ह्रोंसए पापर्न सिब्मुँ, तलेबिस्याँ ‘ङ जोगेमिंबै म्रुँ ख्रीष्ट ग’#8:24 ङ जोगेमिंबै म्रुँ ख्रीष्ट ग ग्रिक क्युइर, “ङ ग।” येशूजी छ बिमा ह्रोंसए बारेर “ङ याहवेह ग” बिइ (प्रस्थान ३:१४)! बिसि क्हेमैंइ आक्वेंस्याँ क्हेमैं ह्रोंसए पापर्न सिब्मुँ।”
25चमैंइ खीने “छ बिस्याँ क्हि खाब जा?” बोसि ङ्योएमा
येशूजी चमैंने बिइ, “ङ जोगेमिंबै म्रुँ ख्रीष्ट ग बिसि ङइ ओंसों ओंनोंन् क्हेमैंने बिइना मुँ। 26ङइ क्हेमैंए बारेर बिल् त्हुबै ताँमैं नेरो निसाफ लल् त्हुबै ताँमैं ल्हें मुँ। दिलेया ङ कुल्मिंबै परमेश्वर क्ह्रोंसेंन्ब मुँ, छतसि खीउँइँले ङइ तो थेमुँ चन् ङइ ह्युलर्बै म्हिमैंने बिमिंमुँ।”
27चु ताँ खीजी परमेश्वर आबाए बारेर बिब् ग बिसि चमैंइ आक्हो। 28छतमा येशूजी चमैंने बिइ, “क्हेमैंइ म्हिए च्ह कैंडो क्वेवाबै लिउँइँ ‘ङम् ङन् ग’ बिसि क्हेमैंइ सेब्मुँ, ङए हगउँइँले ङ तोइ आल, दिलेया आबाजी लोमिंबै ताँमैं मत्त्रे ङइ लम् बिसि क्हेमैंइ सेब्मुँ। 29ङ कुल्मिंबै आबा ङने बालुन् मुँ। खीजी ङ घ्रिन् आवाथेंइँमुँ, तलेबिस्याँ ङइ खोंयों बिलैया खीए सैं तोंन् लबै केमैं मत्त्रे लम्।”
30खीजी छाबै ताँ पोंमा ल्हें म्हिमैंइ खीए फिर बिश्वास लइ।
अब्राहामए सन्तानमैं
31येशूजी खीए फिर बिश्वास लबै यहूदीमैंने बिइ, “क्हेमैंइ ङइ बिबै ताँ ङिंस्याँ क्हेमैं ङए क्ह्रोंसेंन्बै चेलामैं तब्मुँ। 32झाइले क्हेमैंइ क्ह्रोंसेंन्बै ताँ तो जा बिसि सेब्मुँ, धै च क्ह्रोंसेंन्बै ताँइ क्हेमैंलाइ दुःखउँइँले फ्रेमिंब्मुँ।”
33दिलेया चमैंइ खीने बिइ, “ङिम् अब्राहामए सन्तानमैं ग। तोगो समा ङि खाबै केब्छैं तसि टिल् आत्हुइमुँ। ‘क्हेमैं दुःखउँइँले फ्रेयाब्मुँ’ बिसि खैले बिल?”#मत्ती ३:९; लूक ३:८
34येशूजी चमैंने बिइ, “क्ह्रोंसेंन ङ क्हेमैंने बिमुँ, पाप लब्मैं ताँन् पापए केब्छैं ग। 35धिंर्बै केब्छैं खोंयोंन् बिलै च धिंर टिल् आयों, दिलेया च्ह बिस्याँ खोंयोंन् बिलै धिंर्न टिल् योंम्। 36छतसि परमेश्वरए च्हजी क्हेमैंलाइ दुःखउँइँले फ्रेमिंइ बिस्याँ क्ह्रोंसेंन क्हेमैं दुःखउँइँले फ्रेयाब्मुँ। 37क्हेमैं अब्राहामए सन्तानमैं ग बिसि ङइ सेइमुँ। दिलेया क्हेमैंइ ङ सैल् म्हैमुँ, तलेबिस्याँ ङइ बिबै ताँ क्हेमैंइ थेदा आङ्हाँ। 38ङए आबा ङाँर मुँमा ङइ तो-तो म्रोंइँमुँ, चन् ङइ बिमुँ। छलेन क्हेमैंए आबाउँइँले क्हेमैंइ तो थेमुँ चन् लमुँ।”
39चमैंइ खीने बिइ, “ङिए आबाम् अब्राहाम ग।”
येशूजी चमैंने बिइ, “क्हेमैं अब्राहामए सन्तानमैं ङिंब् ग बिस्याँ अब्राहामइ लब् धों तबै केमैं क्हेमैंज्यै लमल। 40ङइ परमेश्वरउँइँले थेबै क्ह्रोंसेंन्बै ताँ क्हेमैंने बिइमुँ, दिलेया तोगो क्हेमैंइ ङ सैल् म्हैइमुँ। अब्राहामइ छाबै के आलल। 41दिलेया क्हेमैंइमि क्हेमैंए आबाइ तो लइ चन् लइमुँ।”
चमैंइ खीने बिइ, “ङि प्रोग्यामैं आङिं! परमेश्वरन् ङिए घ्रि मत्त्रे आबा ग।”
42येशूजी चमैंने बिइ, “क्हेमैंए आबा क्ह्रोंसेंन परमेश्वरन् ङिंस्याँम् क्हेमैंइ ङने म्हाँया लमल, तलेबिस्याँ ङ परमेश्वरउँइँले युब् ग। ङ ह्रोंसन् युदा ङ्हाँसि युब आङिं, दिलेया परमेश्वरजी ङ कुल्मिंब् ग। 43ङइ बिबै ताँमैं क्हेमैंइ तले आक्हो? तलेबिस्याँ क्हेमैंइ ङइ बिबै ताँमैं थेल् आखाँ। 44क्हेमैं ह्रोंसए आबा दुष्टल् ग। छतसि क्हेमैंए आबाए सैंर मैंब् धोंले क्हेमैंइ लल् म्हैम्। चम् ओंसों ओंनोंन् सैब् म्लोब लमल। क्ह्रोंसेंन्बै ताँने चए ताँ खोंयोंन् बिलै क्ह्रिल् आखाँ। तलेबिस्याँ चने क्ह्रोंसेंन्बै ताँ तिफुँइ आरे। छतसि स्योर ताँ पोंम्, चए ब्योर खैतब् मुँ चइ छाबन् पोंम्, तलेबिस्याँ च स्योर्गु ग, च स्योर तेब्मैंए आबा ग। 45ङइ क्ह्रोंसेंन्बै ताँ पोंमुँ, दिलेया क्हेमैंइ ङए फिर बिश्वास आल। 46क्हेमैंए न्होंरि खाबइ ङए फिर छ्याब् ल्हैदिल् खाँमुँ? ङइ क्ह्रोंसेंन्बै ताँ पोंम् बिस्याँ क्हेमैंइ तले ङए फिर बिश्वास आल? 47परमेश्वरए सन्तानइ परमेश्वरए ताँ थेम्। क्हेमैं परमेश्वरए सन्तान आङिं। छतसि क्हेमैंइ परमेश्वरए ताँ आथे।”
येशू नेरो अब्राहाम
48यहूदीमैंइ येशूने बिइ, “क्हि सामरियाथें ग, क्हिलाइ मोंइ स्याइमुँ?” बिसि ङिइ बिबै ताँ ठिक आङिं वा?
49येशूजी बिइ, “ङलाइ मोंइ आस्याइमुँ। ङ ङए आबाए मान लमुँ, दिलेया क्हेमैंइ ङलाइ म्हि आच्हिइमुँ। 50दिलेया ङ ह्रोंसए मान आम्है, ङए मान लरिगे ङ्हाँब घ्रि मुँ खीजी ङए निसाफ लमुँ। 51क्ह्रोंसेंन ङ क्हेमैंने बिमुँ, ङइ बिबै ताँ ङिंब्मैं खोंयोंइ सिल् त्हुरिब् आरे।”
52यहूदी चिबनाँब्मैंइ खीने बिइ, “क्हि मोंइ स्याइमुँ बिसि ङिइ तोगो छेनाले था सेइ! ङिए खे अब्राहाम सियाइ, धै अगमबक्तामैं या सियाइ, दिलेया क्हि बिस्याँ ‘ङइ बिब् ङिंब्मैं खोंयोंइ सिल् त्हुरिब् आरे बिमुँ।’ 53ङिए खे अब्राहाम नेरो अगमबक्तामैं भन्दा क्हि थेब वा? क्हि ह्रोंसलाइ खाब् बिमुँ?”
54येशूजी बिइ, “ङइ ह्रोंसइन ह्रोंस क्वेइ बिस्याँ च फाक्कर्न तम्। ङलाइ क्वेबाम् ङए आबा मुँ। खीनेन् क्हेमैंइ ‘ङिए परमेश्वर’ बिम्। 55क्हेमैंइ खी ङो आसेइमुँ, दिलेया ङइ खी ङो सेइमुँ। ङज्यै या खीलाइ ङो आसे बिम् बिस्याँ ङै या क्हेमैं धों तबै स्योर्गुन् तब्मुँ। दिलेया ङइ खीलाइ छेनाले ङो सेमुँ, छतसि खीजी बिबै ताँ ङइ ङिंमुँ। 56क्हेमैंए खे अब्राहामइ ओंसोंन् ङ चु ह्युलर युब्मुँ बिब् सेसि सैं तोंल, झाइले ङ युब् म्रोंसि बेल्ले सैं तोंइ।”
57छबिमा यहूदी चिबनाँब्मैंइ खीने बिइ, “क्हि ङ्हच्यु बर्ष आयुबै म्हिजी खैले ङिए खे अब्राहाम म्रोंइ?”
58येशूजी चमेंने बिइ, “क्ह्रोंसेंन ङ क्हेमैंने बिमुँ, अब्राहाम मुँब् भन्दा ओंसों ओंनोंन् ङम् ङन् ग।”#8:58 ङम् ङन् गयेशूजी छले बिबइले खी परमेश्वर धों तब् ग बिब थेसि चमैंइ खी सैल् म्हैइ। (प्रस्थान ३:१४) 59छबिमा चमैंइ खी ल्हिब बिसि युँमा तोमा येशू लोसि मन्दिरउँइँले बैरु त्होंयाइ।
Chwazi Kounye ya:
यूहन्ना 8: GCMB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2020, Wycliffe Bible Translators, Inc. All rights reserved.