यूहन्ना 6
6
येशूजी हजार ङ्ह म्हि चल् पिंब
(मत्ती १४:१३-२१; मर्कूस ६:३०-४४; लूका ९:१०-१७)
1चु ताँमैं तबै लिउँइँ येशू गालील अथवा तिबेरियस बिबै मा ङ्युँइ क्योंजा ह्याइ। 2झाइले ल्हें म्हि खीए लिलि खइ, तलेबिस्याँ खीजी नबै म्हिमैं सल् लमिंबै औदिबै चिनुमैं चमैंइ ओंसोंन् म्रोंल। 3येशू चर्बै कोंर ह्यासि ह्रोंसए चेलामैंने चर्न टिइ। 4च त्हेर यहूदीमैंए दुःखने फ्रेबै चाड खबि छेल।
5येशूजी म्हिए हुल खी ङाँइ खरिब् म्रोंसि खीए चेला फिलिपने बिइ, “चुमैं चल् पिंबै ल्हागिर ङ्योइ खनिउँइँले क्हें पखब् ङ्हे?” 6खीजी फिलिपए सैं किंबर चु ताँ बिल, तलेबिस्याँ खीजी तो लबर होंइँमुँ बिब खीजी था सेल।
7फिलिपइ खीने बिइ, “च्हौ ल्हें म्हिमैंलाइ च्युगु च्युगु पिंना बिलेया ङ्हिब्ब्रा चाँदिए मुइइ क्हें किंलेया योरिब् आरे।”
8येशूए चेलामैं न्होंर्बै सिमोन पत्रुसए अलि अन्द्रियासइ बिइ, 9“ओ गुरु, चुर फ्रेंसि घ्रिने झउए क्हें ङ्हबो नेरो ताँग ङ्हिं मुँ। दिलेया च्हौ ल्हें म्हिए ल्हागिर च्हगइ योम् रो वा?”
10येशूजी चेलामैंने बिइ, “ताँन् म्हिमैं चु जरे क्हुँल् पिंन्, चर छि मुँबै प्ल्हाबै क्ल्ह्यो मुँल।” छतसि ताँन् म्हिमैं चर्न क्हुँइ। चर योद आयोद हजार ङ्ह मुँयुँमैं मुँल। 11झाइले येशूजी च क्हें किंसि परमेश्वरलाइ धन्यबाद पिंइ, धै क्हुँबै म्हिमैं चुमिंइ। छलेन ताँगै या चुमिंइ। चमैंइ म्रेंन्ले चइ। 12चमैं म्रेंल् खाँबै लिउँइँ येशूजी चेलामैंने बिइ, “चसि ङैंबै क्हें लुँठेमैं खेरो आह्यानले खागु लद्।” 13छतसि ङैबै क्हेंए लुँठेमैं चमैंइ खागु लमा च्युसे ङ्हिं ट्हलो प्लिंइ।
14खीजी लबै छाबै औदिबै चिनु म्रोंसि च म्हिमैंइ “ह्युलर युल् त्हुबै अगमबक्ता क्ह्रोंसेंन चुन् मुँन,” बिइ। 15चमैंइ खैच्हिजिले बोसि म्रुँ लबर होंइमुँ बिब् सेसि यशू खी घ्रिन् धबै कोंउँइँ ह्याइ।
येशू क्युए फि फि प्रब
(मत्ती १४:२२-२३; मर्कूस ६:४५-५२)
16ङेसा तबै लिउँइँ येशूए चेलामैं मा ङ्युँइउँइँ ह्याइ। 17धै चमैं डुँङ्गार क्रेसि कफर्नहुमउँइँ ह्याबर होंइ। च त्हेर म्हुँइँस तयाल, दिलेया येशू बिस्याँ चेलामैं ङाँर आयुल। 18चमैं ह्यारिमा थेबै खैं खल। छतसि मा ङ्युँइर थेबै क्युए भेल्ग खबर होंइ। 19च चेलामैं डुँङ्गा ओलेसि किलोमिटर ङ्ह ट्हु ह्याल् खाँबै लिउँइँ येशू मा ङ्युँइए फि फि प्रसि डुँङ्गाए चेंदो खरिब चमैंइ म्रोंइ। छाब् म्रोंसि चेलामैं बेल्ले ङ्हिंयाँइ। 20दिलेया येशूजी चेलामैंने “आङ्हिंन्! ङन् ग,” बिइ। 21छ बिब् थेसि चमैं सैं तोंदै येशूलाइ डुँङ्गार क्रेल् पिंइ। धै क्रेबै तोंदोंन् चमैं ह्याल् म्हैबै क्ल्ह्योर फेनेइ।
22प्हँन्हाँग्धों मा ङ्युँइए क्योंजा मुँबै म्हिमैंइ चर डुँङ्गा घ्रि मत्त्रे म्रोंइ। येशू खीए चेलामैंने डुँङ्गार आक्रेल, खीए चेलामैं मत्त्रे ह्याल बिब चमैंइ सेल। 23च त्हेर्न तिबेरियास बिबै नाँसउँइँले अरू डुँङ्गामैं येशूजी धन्यबाद पिंसि म्हिमैंलाइ क्हें चल् पिंबै क्ह्योर फेखइ। 24दिलेया येशू नेरो खीए चेलामैं चर आरेब सेसि च म्हिमैं डुँङ्गामैंर क्रेसि येशूलाइ म्हैबर कफर्नहुम नाँसर ह्याइ।
खोंयोंइ आखाँबै छ्ह पिंबै क्हें येशू ग
25झाइले चमैंइ मा ङ्युँइए चोंजा खीने त्होसि, “ओ गुरु, क्हि चुर खोंयों खल? बिसि ङ्योएइ।”
26येशूजी चमैंने बिइ, “क्ह्रोंसेंन ङ क्हेमैंने बिमुँ, ङइ लबै औदिबै चिनुमैं म्रोंसि क्हेमैंइ ङलाइ म्हैब आङिं, दिलेया म्रेंन्ले क्हें चल् योंबइले ङलाइ म्हैब् ग। 27नास तयाबै चबै सैए ल्हागिर दुःख आलद्, बरु खोंयोंइ बिलै सोरिल् योंबै चबै सैए ल्हागिर दुःख लद्। चु खोंयोंन् बिलै सोल् योंबै क्हें म्हिए च्ह ङइ#6:27 ङइ ग्रिक क्युइरि, म्हिए च्हजी क्हेमैंलाइ पिंब्मुँ, तलेबिस्याँ क्हेमैं खोंयोंन् बिलै सोरिगे बिसि परमेश्वर आबाजी ङलाइ त्हाँसि कुल्मिंब् ग।”
28चमैंइ खीने “छ बिस्याँ परमेश्वरजी खोबै के लबर ङिइ तो लल् त्हुम्?” बिसि ङ्योएइ।
29येशूजी चमैंने बिइ, “खीजी कुल्मिंबै म्हिए फिर बिश्वास लद्, चुन् परमेश्वरजी खोबै के ग।”
30छबिमा चमैंइ येशूने बिइ, “क्हिए फिर बिश्वास लरिगे बिसि क्हिजी खैतबै चिनु ङिने उँइँमिंमुँ? 31ङिए खेमैंइ म्हि आटिबै क्ल्ह्योर मन्न बिबै चबै सै चइ। छ बिबै ताँ परमेश्वरए छ्वेर प्ह्रिइमुँ, ‘खीजी चमैं स्वर्गउँइँले क्हें चल् पिंइ।’”#प्रस १६:४,१५; भज ७८:२४
32येशूजी चमैंने बिइ, “क्ह्रोंसेंन ङ क्हेमैंने बिमुँ, क्हेमैंलाइ स्वर्गउँइँले क्हें पिंब मोशाइ आङिं, स्वर्गउँइँले क्हेमैंलाइ क्ह्रोंसेंन्बै क्हें पिंब ङए आबा ग। 33तलेबिस्याँ परमेश्वरजी पिंबै क्हें तो जा बिस्याँ, च स्वर्गउँइँले तयुसि ह्युलर्बै म्हिमैंलाइ खोंयोंइ आखाँबै छ्ह पिंबै म्हि ग।”
34छबिमा चमैंइ खीने बिइ, “प्रभु, चु क्हें ङिलाइ खोंयों बिलै पिंरिद्।”
35येशूजी चमैंने बिइ, “खोंयोंइ आखाँबै छ्ह पिंबै क्हें ङन् ग। ङ ङाँर खब्मैं खोंयोंइ फो ख्रेंरिब आरे, धै ङए फिर बिश्वास लब्मैं खोंयोंइ क्यु पिरिब आरे। 36दिलेया ङइ क्हेमैंने बिल् खाँइमुँ, क्हेमैंइ ङलाइ म्रोंसेया ङए फिर बिश्वास आल। 37ङए आबाजी ङने पिंब्मैं ताँन् ङ ङाँर खब्मुँ, धै ङ ङाँर खब्मैंलाइ ङइ खैलसे या पिरिब् आरे। 38ह्रोंसए सैंर्बै ताँ पूरा लबर ङ स्वर्गउँइँले युब आङिं, ङलाइ कुल्मिंबै आबाए सैंर मैंबै केमैं पूरा लबर ङ युब् ग। 39खीजी ङने पिंब्मैं खाबै आम्हरिगे, दिलेया ह्युलर्बै आखिरि त्हिंइर#6:39 ह्युलर्बै आखिरि त्हिंइ च त्हिंइर परमेश्वरजी ह्युलर्बै ताँन् म्हिमैं छुरिब्मुँ। ङइ चमैं ताँन् सोगों लमिंरिगे बिब ङलाइ कुल्मिंबै आबाए सैं मुँ। 40खीए च्ह ङाँइ ङ्ह्योसि खीए फिर बिश्वास लब्मैं ताँनइ खोंयोंइ आखाँबै छ्ह योंरिगे बिब ङए आबाए सैं मुँ। झाइले ह्युलर्बै आखिरि त्हिंइर ङइ चमैं सोगों लमिंब्मुँ।”
41येशूजी “स्वर्गउँइँले तयुबै क्हें ङन् ग” बिबइले यहूदीमैंइ खीए बिरोधर गनगन लबर होंइ। 42“चु योसेफए च्ह येशू आङिं वा? चुए आबा-आमा ङिइ ङो सेम्। तोगो चुइ खैले ङ स्वर्गउँइँले तयुब् ग बिसि बिमुँ?” बिसि चमैंइ बिइ।
43येशूजी चमैंने बिइ, “क्हेमैं न्होंर गनगन आलरिद्। 44ङ कुल्मिंबै आबाजी ङ ङाँर खबै सैं आपिंइ बिस्याँ खाबै या ङ ङाँर खल् आखाँ। दिलेया ङ ङाँर खब्मैंलाइन ङइ आखिरि त्हिंइर सोगों लमिंब्मुँ। 45‘ताँन् म्हिमैंलाइ परमेश्वरजीन् लोमिंब्मुँ,’ बिसि अगमबक्तामैंइ परमेश्वरए छ्वेर प्ह्रिथेंइँमुँ। धै परमेश्वर आबाजी बिबै ताँ थेब्मैं नेरो लोब्मैं ङ ङाँर खम्।#यशै ५४:१३ 46म्हिमैं खाबज्यै या परमेश्वर आम्रोंइँमुँ, दिलेया परमेश्वरउँइँले युबै म्हिजी मत्त्रे परमेश्वर आबा म्रोंइँमुँ। 47क्ह्रोंसेंन ङ क्हेमैंने बिमुँ, ङए फिर बिश्वास लब्मैंने खोंयोंइ आखाँबै छ्ह मुँ। 48खोंयोंइ आखाँबै छ्ह पिंबै क्हें ङन् ग। 49क्हेमैंए खेमैंइ म्हि आटिबै क्ल्ह्योर मन्न बिबै क्हें चलेया चमैं सियाइ। 50चु खोंयोंइ आखाँबै छ्ह पिंबै क्हें चब्मैं खोंयोंइ आसिरिगे बिसि चु क्हें स्वर्गउँइँले तयुइ। 51स्वर्गउँइँले तयुबै सोल् लमिंबै क्हें ङन् ग। च क्हें चब्मैं खोंयोंन् बिलै सोरिब्मुँ। ह्युलर्बै म्हिमैं खोंयोंन् बिलै सोल् योंरिगे बिसि ङइ क्हें पिंब्मुँ। च क्हें ङए ज्यु ग।”
52“चु म्हिजी खैले ह्रोंसए ज्यु ङ्यो चबर पिंल् खाँम्?” बिसि यहूदीमैं खें-खेंमैंए न्होंरि ताँ लबर होंइ।
53येशूजी चमैंने बिइ, “क्ह्रोंसेंन ङ क्हेमैंने बिमुँ, क्हेमैंइ म्हिए च्हए ज्यु आचस्याँ, खीए को आथुँस्याँ, क्हेमैंने खोंयोंइ आखाँबै छ्ह तरिब आरे। 54ङए ज्यु चब्मैं नेरो ङए को थुँब्मैंने खोंयोंइ आखाँबै छ्ह मुँ, छतसि ह्युलर्बै आखिरि त्हिंइर ङइ चमैं सोगों लमिंब्मुँ। 55तलेबिस्याँ ङए ज्यु क्ह्रोंसेंन्बै चबै सै ग, धै ङए को क्ह्रोंसेंन्बै थुँबै सै ग। 56ङए ज्यु चब्मैं नेरो ङए को थुँब्मैं ङने तरिम्, धै ङ चमैंने बालु तरिम्। 57सोगों परमेश्वर आबाजी ङ कुल्मिंइ, धै आबाए शक्तिउँइँलेन् ङ सोरिमुँ। छलेन ङलाइ चब्मैं या ङए शक्तिउँइँले सोरिब्मुँ। 58स्वर्गउँइँले युबै क्हें ङए ज्यु ग। चु क्हें क्हेमैंए खेमैंइ चबै मन्न धों तब आङिं, चमैंइ च मन्न बिबै क्हें चलेया सियाइ। दिलेया चु क्हें चब्मैं खोंयोंइ या सोरिब्मुँ।” 59येशूजी चु ताँ कफर्नहुम नाँसर्बै म्हि च्हों धिंर लोमिंमा बिब् ग।
ल्हें चेलामैंइ यशू पिवाब
60चु ताँ थेसि येशूए चेलामैं न्होंर्बै ल्हेइ बिइ, “चु ताँ बेल्ले गारो मुँ। खाबइ चु ताँ थेल् खाँमुँ?”
61दिलेया चु ताँ थेमा खीए चेलामैंइ सैं आक्होसि ताँ लबर होंइ बिब था सेसि येशूजी चमैंने बिइ, “चु ताँ थेसि क्हेमैं ङए लिलि प्रब पिवाम्मा? 62म्हिए च्ह ओंसों टिबै स्वर्गर एह्यारिब् म्रोंस्याँ क्हेमैं तो लमुँ? 63दिलेया परमेश्वरए प्ल्हजी मत्त्रे छ्ह पिंमुँ, छाबै के म्हिमैंए भोंइ लल् आखाँ। ङइ क्हेमैंने बिरिबै ताँमैं परमेश्वरए प्ल्हउँइँले योंबै खोंयोंइ आखाँबै छ्हर्बै ताँ ग। 64दिलेया क्हेमैंए न्होंरि कतिइ ङए ताँमैं आक्वें।” (खीए फिर बिश्वास आलब्मैं नेरो खीलाइ धोका पिंसि क्हाल् पिंबै म्हि येशूजी ओंसों ओंनोंन् ङो सेल।) 65येशूजी धबै बिइ, “छतसि ङए आबाजी ङ ङाँर खबै सैं आपिंस्याँ खाबै या ङ ङाँर खल् आखाँ,” बिसि ङइ ओंसोंन् क्हेमैंने बिल।
66च लिउँइँ येशूए चेलामैं न्होंर्बै ल्हें चेलामैं बिश्वास लब् पिसि खीने प्रब पिवाइ। 67छतमा येशूजी च्युसे ङ्हिं चेलामैंने “क्हेमैं या ङलाइ वाथेंसि ह्याम्म?” बिसि ङ्योएमा।
68सिमोन पत्रुसइ बिइ, “ओ प्रभु, क्हिनेन् खोंयोंइ आखाँबै छ्ह पिंबै ताँमैं मुँ। ङि खाबै ङाँर ह्याब? 69क्हि परमेश्वरजी कुल्मिंबै पबित्र म्हि ग बिब् सेसि ङिइ क्हिए फिर बिश्वास लइमुँ।”#मत्ती १६:१६; मर्क ८:२९; लूक ९:२०
70येशूजी चमैंने बिइ, “क्हेमैं च्युसे ङ्हिं ङइन त्हाँब, आङिं वा? दिलेया क्हेमैंए न्होंरि दुष्ट धों तबै म्हि घ्रि मुँ।” 71येशूजी चु ताँ सिमोन इस्करियोतए च्ह यहूदाए बारेर बिल, तलेबिस्याँ यहूदा च्युसे ङ्हिं चेलामैं न्होंर्बै मुँनबिलेया चइ खीलाइ क्हाल् पिंसि धोका पिंल् म्हैल।
Chwazi Kounye ya:
यूहन्ना 6: GCMB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2020, Wycliffe Bible Translators, Inc. All rights reserved.