उत्पत्ति 16
16
हागार नेरो इश्माएल
1अब्रामए प्ह्रेंस्यो साराईउँइँले अब्रामल प्हसे आतल। साराईल हागार बिबै मिश्री केब्स्यो घ्रि मुँल। 2तिगैं साराई अब्रामने बिइ, “याहवेहजी ङलाइ प्हसे तल् आपिं। छतसि क्हि ङए केब्स्यो ङाँर ह्याद्। खनिज्यै च ङाँइले ङए ल्हागिर प्हसे तल् खाँम् उ?” छबिमा अब्रामइ साराईए ताँ ङिंइ।
3अब्राम कनानर टिबै च्युदिं लिउँइँ ह्रोंसए प्ह्रेंस्यो साराई ह्रोंसए केब्स्यो मिश्रीथेंस्यो हागार अब्रामए प्ह्रेंस्यो तबर पिंइ। 4झाइले अब्राम हागार ङाँर ह्यामा हागारइ प्हसे नोइ।
चइ प्हसे नोब् सेसि ह्रोंसए नेब्स्योलाइ म्हि आच्हिबर होंइ। 5छतमा साराई अब्रामने बिइ, “ङए फिर खबै अनिया क्हिए फिर खरिगे। ङइ ह्रोंसए केब्स्यो क्हिने बालु तबर पिंब् ग, च प्हसे नोबै तोदोंन् ङलाइ म्हि आच्हिबर होंइ। छतसि याहवेहजी क्हि नेरो ङए म्हाँजोरि निसाफ लमिंरिगे।”
6छबिमा अब्रामइ साराईने बिइ, “क्हिए केब्स्यो क्हिए योर्न मुँ। चने खै लदा ङ्हाँमुँ छान् लद्।” छबिमा साराई चए फिर बेल्ले दुःख पिंबर होंइ। ल्हें दुःख योंमा हागार साराईउँइँले भौदिह्याइ।
7याहवेहए स्वर्गदूतइ शूर सहर ह्याबै घ्याँर म्हि आटिबै क्ल्ह्योर क्युए मुल ङाँर हागारलाइ त्होइ। 8झाइले स्वर्गदूतइ बिइ, “ओ साराईए केब्स्यो हागार, खनिउँइँले खल? खनिर ह्याबर होंल?”
चइ बिइ, “ङए नेब्स्यो साराईउँइँले भौदिरिलो।”
9याहवेहए स्वर्गदूतजी चने बिइ, “क्हिए नेब्स्यो ङाँर एसि ह्याद्, धै चए न्होंर टिद्।”
10याहवेहए दूतइ धबै चने बिइ, “ङइ क्हिलाइ ल्हें प्हसेमैं पिंब्मुँ। चमैं खाबज्यै च्योल् खाँरिब् आरे।” 11याहवेहए दूतइ चने बिइ,
“क्हिइ प्हसे नोइमुँ क्हिइ च्ह घ्रि फिब्मुँ।
चए मिं इश्माएल#16:11 इश्माएल हिब्रू क्युइर चु मिंए अर्थ “परमेश्वरजी थेमुँ” ग। थेंनु,
तलेबिस्याँ याहवेहजी क्हिए दुःख म्रोंइमुँ।
12क्हिए च्ह क्ह्योंर्बै गदा धों तब्मुँ।
चए यो ताँन् म्हिमैंने नेबर रेब्मुँ,
ताँन् म्हिमैंए यो चने नेबर रेब्मुँ।
ह्रोंसए ताँन् ह्रजे-म्हजेमैंने ख्रे लसि टिब्मुँ।”
13हागारइ बिइ, “क्ह्रोंसेंन ङइ परमेश्वर म्रोंसेया ङ सोगोंन् मुँ।” छतसि ह्रोंसने बालु ताँ लबै याहवेहलाइ चइ “ङलाइ म्रोंबै परमेश्वर” बिसि मिं थेंइ। 14छतसि च क्यु खादुँए मिं “ङलाइ म्रोंबै सोगों परमेशवरए क्यु खादुँ”#16:14 “ङलाइ म्रोंबै सोगों परमेशवरए क्यु खादुँ” हिब्रू क्युइर बेअर-लहै-रोइ। ग। च क्ल्ह्यो कादेश नेरो बेरेदए म्हाँजोर मुँ।
15छले हागारइ अब्रामल च्ह घ्रि फिइ। च च्हए मिं अब्रामइ इश्माएल थेंइ।#गला ४:२२ 16हागारइ इश्माएल फिबै त्हेर अब्राम प्रेच्युसे ट्हुदिंर्बै मुँल।
Chwazi Kounye ya:
उत्पत्ति 16: GCMB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2020, Wycliffe Bible Translators, Inc. All rights reserved.