Jenesii̱s 6
6
Bi̱ tsꞌén jatjokjà xota̱ xi ꞌniú yiꞌii̱
1Kó ꞌniú kamákjín xota̱ xi kisꞌie kui nga̱sondiee̱, kó kisꞌiee̱ ndí xí ínchjín. 2Kósꞌe̱ ndií Néná nga kamábe nga tsjakon kamá ndí xí ínchjiín xota̱ nga̱sondiee̱, jaꞌájin ínchjín xi kamámejeén sꞌe̱ kisꞌińdojo̱. 3Kósꞌe̱ bi̱ katsó Néná: «Tsjandièjín an nga xota̱ nga̱sondiee̱ kꞌuíndo ngatsjéni̱xtjin. ¡Kuíni nga kjo̱a̱ꞌatjónjiín úchán ko̱jo kan nó nga kꞌuíndo!»
4Ndií Néná kisꞌińdojo̱ ndí ínchjiín xota̱ nga̱sondiee̱ kó kisꞌiee̱ ndí, kó kuí bí kuí ndií xi xota̱ xi ta̱nisién nkꞌa ko̱jo yiꞌi kamá. Kó kui xotaa̱ xi ꞌniú kamáyàndikón kjo̱a̱a̱ ni nda xi katsꞌén kui ni̱xtjin jàn.
Bi̱ tsꞌén katsꞌénxchánjo̱ Néná xotaa̱
5Kó xi chjo̱on xí xi̱ꞌin xi kisꞌińdo kui nga̱sondiee̱ saꞌniú sáꞌniú ndajínkjiꞌi ni xi katsꞌén, kó ngatsjéni̱xtjin katsꞌénkjó nga ta̱soboá ni xi ndajín xí sa̱ꞌín. Kó kjiꞌanga Néná kamábe nga ta̱nisién ndajín kjima kui xotaa̱, 6achichí ndasen kamaá nga katsꞌénda xota̱ kui tꞌanangii̱, kó on kamaá ini̱ma̱a̱. 7Kuíni nga bi̱ katsó: «¡Sa̱ꞌinkjié an ngayeje xota̱ nga̱sondie xi katsꞌenda an! ¡Sa̱ꞌinkjié an ngayeje xotaa̱, ko̱jo ngayeje cho̱o̱! ¡Achichí ndasen mana nga katsꞌenda an!» 8Ta̱nga Néná askotsijee̱n Noee̱, kó achichí tsjá kamaá xi kótsꞌèn kisꞌijña.
Bi̱ tsꞌén katsꞌénda Noee̱ tjotso xi ta̱nisién ꞌniú jeé
9Noee̱ ngatsjéni̱xtjin nga tsintꞌiéꞌeén Néná. Ngi̱jii̱n ngayeje xota̱ xi kisꞌie kui ni̱xtjin jàn, kisꞌiejín ingo xota̱ xi bo̱a̱ tsꞌén nda ko̱jo xi kixi̱ kamá xikoó Noee̱. 10Ján kamá ndí xí kisꞌiee̱ Noee̱ ngo xi kiꞌmí See̱n, ko̱jo ngo xi kiꞌmí Kaa̱n ko̱jo ngo xi kiꞌmí Jafee̱t.
11-12Kó Néná kamábe nga xota̱ nga̱sondiee̱ je kamákitikjo̱a̱ ko̱jo nga achichí nga ndajín kamá. 13Kuíni nga bi̱ katsoó Noee̱:
«Jè katsjáa̱ko̱n an nga sa̱ꞌinkjié an ngayeje xi síndo kui nga̱sondiee̱, kó ta̱sá kꞌuijñátiya an tꞌanangii̱, ngatꞌa̱ jè ta̱nisién ndajínkjiꞌi ni xi kjima. 14Kó kuíni nga ti̱ꞌinde ji ngo tjotso xi ta̱nisién ꞌniú je, xi yá ti̱ꞌindeje̱ ji. Kó nitsatja tjajin ji xtji̱e̱e̱n ngi̱yaa̱ ko̱jo xtji̱e̱e̱n nga̱xto̱n tsi̱ꞌe̱ nga jmí ndáfoa kꞌo̱sꞌienjín, kó kjín ndiè tꞌíchjekjáyée̱ ngi̱yaa̱. 15-16Ján tíkjá ti̱ꞌin ji nga nkꞌa, kó úchán ko̱jo kantjiꞌún metro̱ ti̱ꞌin ji nga ndojó, kó kan jó metro̱ nga tiyá, sꞌe̱ tie ján metro̱ ngatama nga nkꞌaa̱. Kó tjaꞌme ji nkꞌaa̱, kó ngo nga̱ntjo̱a̱ tꞌíjñíi̱ nga̱ndee̱, kó tꞌíndée̱ nga̱ntjo̱a̱masienkjá ngije makjachó masien metro̱ nkꞌaa̱. 17Kó an sa̱ꞌinkaꞌa an ngo stsé xí ta̱nisién ꞌniú tꞌanangii̱ xi sa̱ꞌínkjié ngayeje xi síndo kui nga̱sondiee̱. ¡Ingojín xi síndo ngotꞌe̱ xi kꞌuíndo ngase!
18»Ta̱nga ngo ni kꞌuindajoo̱ ji. Ku̱i̱tjásꞌi̱e̱njnú ngi̱ya tjotso xi ta̱nisién ꞌniú jee̱ ji ko̱jo chjóo̱n, ko̱jo ndíi̱, ko̱jo ínchjín kja̱ndàa̱, 19-20kó ti̱ ti̱ꞌinkꞌasꞌin ji ngo chjo̱ón ngo xi̱ꞌin ngayeje to̱ko̱ya cho̱ xi tjiín tsja̱nga̱, ko̱jo cho̱ xi ꞌbifé yojoo̱ nga̱són tꞌanangii̱, ko̱jo cho̱ xi ma ꞌbítji̱e̱, ko̱jo cho̱ kꞌijñá, tsi̱ꞌe̱ nga kju̱i̱e̱sónjín. 21Chjábé jí kó chje̱ꞌétjé ji ngayeje to̱ko̱ya nichinie ngi̱yaa̱ nínga chjaꞌátjó nii̱, tsi̱ꞌe̱ nga kꞌuiéjnú ni xi xi̱ni̱e̱jnú ngayejejnú».
22Kó Noee̱ bo̱a̱ má katsꞌén, xikó má katsoó Néná nga sa̱ꞌín.
Chwazi Kounye ya:
Jenesii̱s 6: MAIX
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014