Nya-mangaji Mirningiya Jujiba 47
47
1Kulu bajingu barra kalila-ka ki-Jujiba, kalila-ka nyiki-biyi baki likili-baba yilalu, nganthalu king. Kulu yiwa barra yiwalumba ka-wingka ambirriju arndaarndalu barra. Ka-wukanyi barra yiku ki-king, kalili-nu yiku likili-nganji barra, nganinya ka-arri; “Wirdi! Wunyatha kulu alu lingathili-baba, kalu-wingka karakarra nakaringu Kinin. Kala-ka marda aluwa nyalunga jibi kulu buluki kulu yukularri kulu yumbulyumbumantha bawuji nyalunga. Kulu kalu-yibanda bajalu Kujin,” nganinya ka-arri yiku.
2Kulu kalilu-rduma likili-baba li-5-bala, kalila-ka bajinju yilalu ki-king, kalilu-yunduyunduma barra. 3Kulu kalili-yalbanga barra ki-king, “Marrirru! Ngandarra barra yirru jirribiya jabungka baji akarru, ngandarra?” Kulu alu barra kalinyamba-ngarninyma yiku, “Wirdiwalangu! Nganu kana-ninya jabunka, kanu-yukulyukumanthaninya jibi wiji nya-nganunga. Li-mbangu linganungali-nganji li-wankala, nganambajilulu kalu-yukulyukumanthaninya, kulu nganu nganinyanga. 4Kulu kanu-wingka barra marnajinju nyunku-ja ki-awaralu, kanu-wingka nmanthalu baku, kangka kurdardi wudurruwu yiku ki-jibiyu alunga wiji, ka-rukurri awara wiji baji ki-awarala Kinin, kurdardi barra ki-wudurruwu barra baji yurrngumantha. Wirdiwalangu, kirna-barlirra, kaninya-ngundarra awara, niwarrku awara baji Kujin, nganu anmanthawu baji,” nganinya kalu-arri.
5Kulu yiwa barra king, ka-wukanyi yiku ki-Jujiba, “Karna-yabirri ngarna-wurdu alunga nyinki-biyiyu kulu linkili-babawu, kalu-wingka yindalu. 6Kulu yinda, ngalkingundayarra winarrku awara alunga, nya-mbangu awara marringaya alunga! Linya-ngundarra! Kulu baji barra la-nmaya mingkiya nguthundu Kujin, ki-marringayala ki-awarala. Namba nalarrku linkili-nganji marda li-mingkin ki-bulukiyu, kulu linya-yibarraya li-wirdi nmanthawu ki-bulukiyu ngatha yukumantharra,” ka-arri yiku nganinya.
7Bajingu barra ngulakari kila-ka ki-Jujiba nyiki-biyi yilalu ki-king kulu kilu-yunduyunduma. Kulu nyiki-biyi Jikaba, kilu-yalbanga ankaya Yijan Kud, yiwa mirlilmirlilmanthawu awara yiku ki-king, bawuji.
8Kulu king, kilu-yalbanga malbu, “Ngabinya! Nganthimbala yinda ka-yanjarrinyu?” 9Kumba-ngarninyma yiku Jikaba, “Wirdi! Ngarna wabarrangu linji-wankala karna-yanjarri, kulu karnala-nda nyala marningarna lhungku. Kulu karna-wingkalwingkayaninya lukuluku bajiwuthu ki-lhabayila nyungku-mbangu ngulakari kulu nyungku-ja ambirriju, karnilu-mirrinyma ki-lhabayilu kulu nyala marningarna. Karna-wingkayaninya kiwa-ninya budijbudij awara ngatha. Ambuliyalu barra ngarna-yalkuyi karna-arri aluwa linjingathalinji-nganjinya, bajingarnaji barra ambuliyalu. Alu barra kala-ninya li-yalkuyi nalu-manka yurrujurru, ngala ngarna barra, karna-arri yalkuyi ngarna-manka buyi bawuji. Marningarna warriya luku barra, jarna-malburrinji bawuji, 130-bala lhabayi ngatha,” nganinya ka-arri yiku ki-king.
10Kulu Jikaba, kilu-murdama king, mili yurrulu wukanyinjarra ankaya ki-Yijanku ki-Kud, yiwa mirlilmirlilmanthawu awara yiku ki-king. Kulu ka-lhuwarri, bawuji.
11Kulu nyungku-ja barra ki-Jujiba, kalila-ka likili-nganji kulu nyiki-biyi nguthundiya bajinju barra ki-awaralu Kujin, Kujin marda Ramiji na-wini, kanymarda. Kalilu-ngunda awara, nya-mangaji barra nguthundu, marringaya alunga nuwalarrkulu liyi-jibiya Kujin, kalngiya marringaya barrawumba kili-jirrinyma ki-king. Kulu marda yiwa barra ka-arri baji aluwa yabilyabimantharra awara alunga barra na-alanji, alu anmanthawu baji.
12Kulu kalilu-ngulngunda ki-Jujiba ma-ngarra barra alunga, alunga nyiki-biyiyu kulu liyikiliyi-babawu, alunga liyikiliyi-nganjingku wiji. Kalilu-ngunda ma-ngarra alunga liyi-ardubirriyu kulu liyi-wurrirriyu, bawuji. Ngaliwa kilu-wayatha na-alanji alunga kulu ka-wani barra bajingu ngamalakarilu, yilalu ki-king.
Na-mangaji narnu-wirndajku
13Bajingu barra ku-wayarri mili yurrulu barra ma-ngarra lukuluku nyungku-mangaji ki-awarala, wiji bawuji kalu-arri wirndajku, waraba wudurruwu. Kulu li-wulu, li-jibiya baji Yijiba kulu li-mangaji li-jibiya Kinin, wiji bawuji kalu-arrkama nalu-manka wirndajku.
14Kulu Jujiba, kilu-rdulurdumanthaninya ma-mani nakaringu aluwa...i, nu-miji kilu-rduma namba kalu-bayimanthaninya ma-ngarra yilaa yurrngumantha, kulu ma-mangaji ma-mani kilu-yibalyibarranthaninya arndaarnda ki-barrawula yiku ki-king, bawuji.
15Ngulakari barra ku-wayarri ma-mani alunga liyi-wuluwu, li-mangaji baji Yijiba baki baji Kinin, kangka kalu-wayatha ambuliyalu wiji alunga ma-mani rdumantharra ma-ngarra. Kulu kalu-wingka barra yilalu ki-Jujiba yalbanganthalu wudurruwu, bardabarda mu-maniyu. Kulu nganinya kalu-arri, “Ngabinya! Nganinya-ngundarra wudurru! Barni-ndaya nganunga, kaninyamba-mirranma baji wirndajku! Anmaya nganinya yabimanthawu awara nganunga, kangka ku-wayarri barra ma-mani nganunga, kurdardi kuwima marlijinda nganuwa, kalngiya kurdardi.”
16Kulu Jujiba barra yiwa, ka-wukanyi alunga, “Marrirru! Namba kurdardi yirrunga mu-maniyu kulu nyirra-kaya nya-mangajiwuthu buluki, yukularri, wawi, baki yirrikirri! Nyirra-kaya ngathangkalu wiji, kulu kirru-rdumala barra ma-ngarra barra nyungku-mangajiwuthu. Nganinya barra kirrirna-ngundarra ma-ngarra yirrunga, yirrunga wudurruwu,” nganinya ka-arri.
17Kulu bajingu barra kalu-rdulurduma nyungku-jawuthu barra, kalu-rdulurduma barra wiji bulukibirri kulu yukularri, yirrikirri kulu wawi. Bawuji barra kala-ka yilalu. Jabarri kalilu-ngunda barra wudurru alunga nganinya. Baji barra kalu-rduma ma-ngarra alunga nganinya, bawuji.
18Kulu mili yurrulu lhabayila kalu-wani mili yilalu, kulu nganinya kalu-arri, “Ngabinya, kurdardi kaninyamba-wajkirrarru yinku ngala minja kaninyambi-nala yinku barra, marninganu winarrku kanu-wingka yindalu, kalngiya bardabarda. Ku-wayarri barra ma-mani nganunga ambuliyalu, kulu ngulakari mili ka-wayarri buluki, wawi, yukularri, yirrikirri barra bawuji, kirninganu-ngunda bawuji. Kalngiya kurdardi barra kiwima nganuwa. Marninganu barra janini nganu nganu-manka, ngayamantharra barra awara nganuwa badiki bajiwa, bawuji barra.
19“Barni-ndaya nganunga nyamba-mirranthawu! Nya-yabimaya awara nganunga! Kulu marninganu janu-wardirrinji nganu-wurdu kangka kurdardi wanjirru kulu kurdardi nu-mi yirdardinjawu ki-awarala nganunga. Winarrku barra kana-nmala yiku ki-king li-jawina winarrku, kulu kirninganu-ngundarra barra awara badiki. Nganinya kana-nmala, kulu yinda barra ngundayawu nganunga ma-ngarra kulu nu-mi yibarranthawu. Winarrku barra kana-nmala li-jawina yiku ki-king, nganu barra rdumanthawu ma-ngarra winarrku, nganinya barra winarrku kaninyamba-wudurrumanthanama nganu arrinjawu lhungku,” nganinya kalu-arri.
20Kulu Jujiba barra, kilu-rdulurdumanthaninya awara wiji baji barra Yijiba, ki-king yiku kilu-rduma. Kulu li-mangaji li-jibiya Yijiba lukuluku baji, winarrku barra kalu-jilima awara nyalunga kangka ku-wayarri ma-ngarra, alu barra rdumanthawu wudurru. Kulu wiji barra nya-mangaji awara kilu-rduma barra wiji ki-king kulu ka-arri nyikungu ki-king. 21Kulu alu barra li-jibiya baji Yijiba li-wulu wiji, kalu-arri li-jawina yiku ki-king, li-mangaji lukuluku nyungku-mangaji ki-awarala, likungu barra kalu-arri winarrku.
22Ngala nya-mangaji awara alunga liyi-mingirringkiyu, kurdardi kalilu-rdumanma nya-mangaji awara aluwa, kurdardi. Yamulu ma-mani bajawu aluwa rdumanthawu ma-ngarra yamulu, kangka yurrngumantha ki-king, kalilu-ngulngundayaninya ma-mani yurrngumantha. Kurdardi kalu-jilimanma nyalunga awara linji-mangaji, kurdardi.
23Kulu Jujiba barra, mili yurrulu ka-wukanyi alunga liyi-wuluwu, nganinya ka-arri, “Marrirru! Bawuji barrungku karna-bayima awara wiji nakaringu yirruwa, bawuji barra jinangu awara nyikungu ki-king. Marda barra yirru, kirrirna-bayima, kirra-nmala likungu li-jawina ki-king bawuji. Kulu nganinyanga barra jirrirna-ngundayi ma-ja barranamba ma-kingirra. Nuwarrku kirru-rarrmala kulu nuwarrku nu-mi kirru-yibarrala. Kirru-wanila barra yibalyibarranthawu ki-awarala barra, yiwa yirdardinjawu barra wudurru.
24“Kulu baku barra ngalawu ma-ngarra ku-yirdardila, kulu nuwarrku mirrunga kulu nuwarrku mikungu ki-king. Nganinya nuwarrku kirru-ngundarra king ngala nuwarrku ma-jakarda kuwa-nmala yirruwa, nganinya kirru-ruthuruthumala ma-mangaji yurrngumantha yiku ki-king kulu yirrunga nganinya. Kulu ma-mangaji mirrunga ma-ngarra, nuwarrku nyamba-wudurrumanthawu kuwa-nama yirrunga, yirrunga liyirrungaliyi-nganjingku, liyi-wurrirriyu baki liyi-ardubirriyu, ngala nuwarrku barra mili yibarranthawu nu-mi baku,” nganinya ka-arri alunga.
25Kulu kalinyamba-ngarninyma yiku, “Wirdiwalangu, kirna-barlirra barra! Kaninya-marakamanhu, kulu kinyu-yabimanhu awara nganunga, nganu anmanthawu li-lhungku. Kalngiya barra janinyamba-riyarrabanji wakulamba yinku. Yiya, nganambaji barra kana-nmala li-jawina yiku ki-king,” nganinya kalu-arri.
26Kulu ki-Jujiba, kilu-yibarra jinangu, narnu-yuwa karnilu-yibarra nyuwu-mangaji ki-awarawu Yijiba nganinya. Nuwarrku ma-ngarra yiku ki-king kulu ma-mangaji nuwarrku ma-jakarda alunga liyi-wuluwu, nganinya kalu-ruthuruthumanthanama ma-ngarra linji-wulungku yurrngumantha. Kulu na-mangaji narnu-yuwa karnu-arri alunga narnu-yurrngu baji. Kulu awara wiji nyikungu awara ki-king. Ngayamantharra liyi-mirringkiyu, nyalunga awara ka-arri wambu.
Ki-Jikaba kili-nu Jujiba ngantha kurramanthawu
27Ngala li-ja barra li-wulu, likili-nganji ki-Jikaba, nya-mangaji Jikaba baki Yijrayil na-wini, li-mangaji kalalu-wundarrba likili-nganj i ki-Yijrayil. Kulu kala-ninya baji barra Yijiba, ki-awarala Kujin. Kulu yurrulu barra mili ka-arri awara alunga kurdandu barra yumbulyumbumantha, kalu-arri barra li-wurrama, marda li-jakarda li-ardubirri alunga, kalu-yanjarri baji nyungku-mangaji ki-awarala.
28Kulu nya-mangaji barra malbu Jikaba, ka-arri yurrulu nyarrku 17-bala lhabayi ka-arri baji, kalngiya malbu, 147-bala lhabayi barra yiku.
29-30Kulu bawuji barra kumba-nykalanykarri barra yiwa wunumbarra nyamba-mirranthawu, kulu ka-wukanyi alunga liyikuliyi-arduwu, alu rdumanthawu Jujiba. Kulu ka-wingka bajinju Jujiba yilalu barra nyiki-biyilu ngaliwa baji arndaarnda lhulunda.
Ka-wukanyi barra malbu yiku, Kajakaja! Kawa wunumbarra ngathangkalu kulu nganha-nykarriya! Kajakaja, kirna-barlirra, kurdardi kanha-kurramarru ngarna-manka marnaji ki-awarala Yijiba, kurdardi, ngala kanha-waninjangumala ngarna-manka akarriya bajinju ki-awaralu nyungku-ngatha Kinin, baji barra wunumbarra aluwa linjingathalinji-nganjinya wumba kalinyamba-mirra ambuliyalu. Baji barra aluwa kanha-yibarrala nganinya, nganha-yibarraya ngarna-manka baji. Kulu nyamba-yibarraya nda-marliji rarrama ngathangka kariwajka kulu nganinya nganhi-naya kalngiya barra yabimantharra, yinda anmanthawu ngayangaya ngatha!” Kulu Jujiba, kumba-ngarninyma yiku, “Biyi, bajingarna jirna-nykarrinji, ngayangaya karna-nmala yinku.”
31Kulu yurrulu mili ka-wukanyi Jikaba yiku, “Kawa kajakaja! Nyamba-yibarraya nda-marliji ngathangka rarrama, kulu nganambaji barra nganhi-naya!” Kulu Jujiba, kumba-yibarra na-marliji, mili yurrulu barra ka-wukanyi yiku, yiwa waninjangumanthawu barra bajinju nyungkiku ki-awaralu Kinin. Kulu Jikaba, ka-yabirri na-wurdu yiku, kulu kilu-barlirra ankaya Yijan Kud yabimanthawu awara yiku nganinya, ka-arri baji, mududu barra, bawuji.
Chwazi Kounye ya:
Nya-mangaji Mirningiya Jujiba 47: jao
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 1981, Wycliffe Bible Translators, Inc. All rights reserved.