Genesis 4
4
Caín yic'ot Abel
1Adán tsi' pi'le Eva i yijñam. Tsa' caji i cʌntan i yalobil. Tsi' yʌc'ʌ Caín ti pañimil. Tsi' yʌlʌ: Lac Yum tsi' coltayon cha'an mi cʌc' winic ti pañimil, che'en. 2Ti wi'il tsi' yʌc'ʌ ti pañimil Abel i yijts'in Caín. Abel tsi' cʌnta tiñʌme'. Caín tsi' cha'le e'tel ti lum. 3Che' ñuquix Caín tsi' yʌq'ue i majtan lac Yum. Tsi' yajcʌbe wen tac bʌ i wut pʌc'ʌb. 4Abel tsi' yʌq'ue ñaxan bʌ i yal tiñʌme' tac. Tsi' tsʌnsʌbe i majtan Dios. Tsi' yajcʌbe wen c'oc' bʌ tiñʌme'. Lac Yum tsi' q'uele ti uts'at Abel yic'ot i majtan. 5Mach uts'atic tsi' q'uele Caín yic'ot i majtan. Tsa' wen mich'a Caín. Mich'icña jax i wut. 6Lac Yum tsi' sube Caín: ¿Chucoch mich'et? ¿Chucoch mich'icña a wut? 7Mi uts'at chuqui ma' mel uts'at mi caj a q'uejlel. Mi mach uts'atic chuqui ma' mel woli' chijtañet mulil. Wersa yom i tajet mulil pero yom mi' mʌjlel a cha'an. Che' tsi' yʌlʌ lac Yum.
8Caín tsi' pejca i yijts'in. Conla ti jamil, che'en. Che' ya' añob ti jamil Caín tsa' tejchi i contrajin i yijts'in. Tsi' tsʌnsa. 9Lac Yum tsi' pejca Caín: ¿Baqui an a wijts'in Abel? che'en. Caín tsi' yʌlʌ: Mach cujulic. ¿C wenta ba cha'an mij cʌntan quijts'in? che'en. 10Lac Yum tsi' yʌlʌ: ¿Chuqui tsa' cha'le? I ch'ich'el a wijts'in tsa' bʌ a tsʌnsa woli' c'ajtibeñon yubil cha'an mij q'uextʌbeñet a mul. 11Jini cha'an wocol mi caj a taj i bʌl a ñʌc' ti pañimil. Jini lum tsi' cawa i yej yilal cha'an mi' japben i ch'ich'el a wijts'in tsa' bʌ a tsʌnsa. 12Che' ma' cajel ti e'tel ti jini lum, ma'anix chuqui mi caj a taj ti lum. Xputs'elet ti pejtelel ora. Stsuctsucniyelet ti pañimil, che'en lac Yum. 13Caín tsi' sube lac Yum: Mach cujchic c cha'an jini wocol. 14Awilan tsa' chocoyon loq'uel ti lum. Tsa'ix a cʌyʌyon. Xputs'elon ti pejtelel ora. Stsuctsucniyelon ti pañimil. Che' an majqui mi' tajon mi caj i tsʌnsañon, che'en Caín. 15Lac Yum tsi' sube: Mi an majqui mi' tsʌnsañet, wucyajl mi caj j q'uextʌben i mul, che'en. Lac Yum tsi' yʌq'ue Caín i señajlel ame tsʌnsʌntic. 16Caín tsa' loq'ui majlel ti' tojlel lac Yum. Tsa' chumle ti lum i c'aba' Nod am bʌ ti' tojel Edén ba' mi' pasel q'uin.
17Caín tsi' pi'le i yijñam. Tsi' cʌnta i yalobil. Tsi' yila pañimil Enoc. Caín tsi' mele jump'ejl tejclum. Tsi' yotsʌbe i c'aba' jini tejclum Enoc che' bajche' i c'aba' i yalobil. 18Enoc i tatʌch Irad. Irad i tatʌch Mehujael. Mehujael i tatʌch Metusael. Metusael i tatʌch Lamec. 19Lamec tsi' pʌyʌ cha'tiquil i yijñam. I c'aba' juntiquil Ada. I c'aba' yambʌ Zila. 20Ada tsi' yʌc'ʌ ti pañimil Jabal, i tatʌch jini mu' bʌ i chumtʌlob ti pisil bʌ otot, jini mu' bʌ i cʌntañob alʌc'ʌl. 21Jubal i yijts'iñʌch Jabal. Jubal i tatʌch pejtelel mu' bʌ i nijcañob arpa yic'ot flauta. 22Zila tsi' yʌc'ʌ ti pañimil Tubal Caín tsa' bʌ i mele e'tijibʌl ti c'ʌnc'ʌn taq'uin yic'ot tsucul taq'uin. Naama i yijti'añʌch Tubal Caín.
23-24Lamec tsi' sube i yijñamob: Ada yic'ot Zila, ubibeñonla ili c t'an. Lamecon. Jatetla quijñametla. Tsac tsʌnsa winic tsa' bʌ i jats'ʌyon. Mic tsʌnsan ch'iton bʌ winic mi tsi' jats'ʌyon. Tsa' subenti Caín wucyajl mi caj i q'uextʌbentel i mul majqui jach mi' tsʌnsan. Isujm lujunyajl i chʌnc'al yic'ot wucp'ejl mi caj i q'uextʌbentel i mul jini mu' bʌ i tsʌnsañon, che'en Lamec.
25Adán tsi' cha' cʌñʌ Eva i yijñam. Tsa' cha' caji i cʌntan i yalobil. Tsi' yʌc'ʌ ti pañimil ch'iton bʌ i yalobil. Tsi' yotsʌbe i c'aba' Set. Tsi' yʌlʌ: Dios tsi' yʌq'ueyon yambʌ calobil cha'an i q'uexol Abel, che'en, come Caín tsi' tsʌnsa Abel. 26Tsi' yila pañimil ja'el ch'iton bʌ i yalobil Set. Tsi' yotsʌbe i c'aba' Enós. Che' ti ili ora che' bʌ tsi' yila pañimil Enós, winicob tsa' caji i ch'ujutesañob i c'aba' lac Yum.
Chwazi Kounye ya:
Genesis 4: CTU77
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Chol de Tumbalá Bible © Bible Society of Mexico, 1977. Active Translation in Process