Maʼtɛ́as 3
3
Sɛ́aŋ Ɔsɔgɛn pɔɔd ayɛ́ɛ əgiim álɔɛgɛ Tɔsɔm tó Táán
(Mə́l 1.2-6; Lóʼk 3.1-6; Sɛ́a 1.19-23)
1A mədúg móom, Sɛ́aŋ Ɔsɔgɛn pɔɔd yɛɛ́lón a Siudə́ə, a kɛnɔ kɛ́ kifələ́ə́n. Ayɛ́ɛ əgiim álɔɛgɛ ɔnɔ́: 2«Ə́súʼkíən óo! Liogíən ongoo a mabɛ́! Kɛnɛŋ kɛ́ Táán kiim alaamɛɛ́ kɛándɛ kɔ!» 3Kɛbán kɛ́ Sɛ́aŋ ogo nyóon aa Ɛsayíi, ɔndɔɛgɛʼ pɛbán o Táán nyummú yiísə́ə́ ɔnɔ́: «Nɛŋo nɛ́ mɔɔd nɛ́lɛ asáŋa a kɛnɔ kɛ́ kifələ́ə́n, nɛɔ́nɔ́: “Sóbíníən pungə́ pó Sə́dúk óo! Tə́nígə́níən pɛáŋ piə́ŋ pɛ́dɛ́lɛm sáád”#3.3 Kɛ́lɛ náan a kálaʼtaʼ yɛ Ɛsa 40.3 » 4Kilə́ə́ kɛ́ Sɛ́aŋ əyə́níigin, páyɛ́ɛ́lɛ kɛ́lɛ́ na pinum pɛ́ nnyam yɛ́ pɔ́ɔdɔ́ŋɔn lɛ́ sɛamóo, kandá yɛ́ əyə́súŋin a nɛdáá ɛyɛ́ɛ kandá ɛ kiob#3.4 Kɛ́lɛ náan a kálaʼtaʼ ɛ 2Puʼk 1.8 Moom mó konɛ muə́ŋ móyɛ́ɛ: Pagantɛ́d na woóŋ. 5Pɔɔd pá a pálɛ́ɛg ɛ Yolósalɛm, na pá a kɛsom kɛ́ nsí kɛ́ Siudə́ə kiim, na pɔsɔ́g tɛn pá a əʼkúu əngim yɛ́ a ɛbá ɛ́ noom nó Siuludɛ́ɛŋ, páyɛ́ɛ piimən kɛnɔ kɛ́ Sɛ́aŋ alɛɛ́. 6Náa, wɛ nyɔ́ umíim, waayaŋ kaáwála unuʼ a mabɛ́ mááŋ, a udi ó mɔɔd ungim ná ágoósɔgɛn anɛ́ɛ́n a noom nó Siuludɛ́ɛŋ.
7Ná Sɛ́aŋ yɛɛ́dála lɛ́ pɔɔd piíŋ lɛ́ na pɔsɔ́g pá a ɛgɔny ɛ́ Pafalɛsɛyɛ́ɛŋ, na pá a ɛgɔny ɛ́ Pasadosɛyɛ́ɛŋ pálɛ əgiimən lɛ́ píim əsiəd ɔsɔgɛn, ayɛ́ɛ əgusəə ɔnɔ́ na pɔ́lɛ́: «Pəŋi musə́sə́d mó pɛlɔ́ngɛʼ móonɛ, ánɛ aa amábodɛánɛ lɛ́ ngə́ ɛgaágɛɛŋɛ ilúún ɛ́ Táán yɛ́ɛnɛ yɛ́ yə́ndəgimií ɛlɛ kɔ? 8Ooo yi, kɛbán kɛ́dɛɔ́gɔ! Ɛlɛ́an anɛ́ɛ́n pɛbán pɛ́ píoloodi lɛ́ puə́ʼkəə́suʼki, puóʼkuliogi ongoo a pɛbán pɛ́ pɛbɛ́. 9Podɛfɛ́g lɛ́ kɛ́lɛ əgín a niə́səə nɛ́ na unuʼ na unuʼ lɛ́ Ábɛlaam alɛ sɛʼkóón waaŋan, ndóo. Ndabodɛ́anɛ lɛ́ ɔmbɔ́ əgín aʼtáán yɛ́ɛnɛ yɛ́ poádɛ́ʼtɛg, Táán alɛ ogɛɛlɛ lɛ́ yáán ndɛg yɛ Ábɛlaam. 10Taa, yaá áa yɛ́ɛnɛ yándɛɛ́ a ombɔg lɛ́ pásóma piɛd a ngaŋ. Kiɛd kiim kɛ́ kídiə́guúmíí modámádám mólaŋ, pálɛ́ɛ́ kosom, páadagɛdɛ a yug. 11Mɛ Sɛ́aŋ, ndɛ aboósɔgɛn na məní əguloodi lɛ́ poáʼkogasɛ ntɛ́m yaaŋan. Náa, mɔɔd alɛ kɔ nyɔ́ əə́ndəgimií a ngim yaam. Nyɔ́lɛ́ alɛ na toɛn amɛ́njaáyɛn. Ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan. Nyɔ́lɛ́ alɛ́ɛ́ koboósɔgɛn na Uŋun wó Ufúlúʼtú, na a yug. 12Ogóódi maʼtɛ́ngɛ́lɛ́ a ombɔg, alɛ́ɛ́ kofɛm ngəŋ na mɔ́lɛ́. Alɛ́ɛ́ kɛɛlɛ lɛ́, ngəŋ yɛ́ ɛlɛɛ́ ɛlaŋ, ə́əsiəd agɛɛ́ngɛg a kɛságɛʼ kiə́ŋ. Ə́əsiəd pifum a kogɔ́lɔnɛ a yug yɛ́ ɛ́dɛndɛ́ɛ́ kuwúú.»
Yə́sus ayɛ́ɛ́n lɛ́ Sɛ́aŋ ámoósɔgɛn
13Náan aa Yə́sus əyíím ádɛ́ɛmɛn a Kalilə́ə, əmíim alon a Siuludɛ́ɛŋ. Ayɛ́ɛ́n a ɛbá ɛ́ Sɛ́aŋ lɛ́ ámoósɔgɛn. 14Sɛ́aŋ aáság kosáŋɛnɛ, ɔnɔ́ na nyɔ́lɛ́: «Ndóo, mɛ áa nkódíí lɛ́ nyíim ná wɛ olɛɛ́ lɛ́ wɛ́sɔgɛn. Tuə́ áa wɛ agá aa wəə́ʼkimií lɛ́ nkoósɔgɛn əə́!» 15Náa Yə́sus ɔnɔ́ na nyɔ́lɛ́: «Ə́líʼtíníí lɛ́ kɛáyɛ́ɛlɛ náan a nɛ́gɔŋ lɛ́ náan, tɛágɛɛlɛ nkə kɛ́ Táán alɛɛ́ anyɔ́ŋɛn lɛ́ kɛáyɛ́ɛlɛ.» Sɛ́aŋ aáság kəə́liʼtini. 16Ná Sɛ́aŋ ayɛ́mosɔ́gɛn, a nɛlon anɛ́ɛ́n nɛ́ɛn nɛ́ ayɛ́ɛ əə́ndəgiim álon a kɛdɛ́ɛ́, mbálámɔɛn yaáság kəə́buən, Uŋun ó Táán úmíim úsuu wɔnɔ́ kiɛm, ómámoláʼtɛ́mɛn a nkó. 17Nɛŋo nɛáság kiim nísuu tɛn kɔ́gɔ́ɔg a mɔɛn, nɛɔ́nɔ́: «Taa, nyóonɛ alɛ mɛ Mɔɔ́n wo ɔʼtɛ́m. Tɔnyɔ́g tóam tuim tólɛ na nyɔ́lɛ́#3.17 Kɛ́lɛ náan a kálaʼtaʼ ɛ Pɛʼk 2.7; na a yɛ Ɛsa 42.1 »
Chwazi Kounye ya:
Maʼtɛ́as 3: yatDBL
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators Inc, 2015