GENESIS 4
4
Si Cain kag si Abel
1Karon ginkilala ni Adam ang iya asawa nga si Eva, kag nanamkon sia kag nag-anak kay Cain, kag nagsiling, “Nakabaton ako sing lalaki sa bulig sang Ginoo.” 2Kag liwat, gin-anak niya si Abel nga iya utud. Karon si Abel manugbantay sang carnero, apang si Cain mangunguma sang duta. 3Sa pag-alagisud sang panag-on nahanabu nga si Cain nagdala gikan sa bunga sang duta sing halad sa Ginoo, 4kag si Abel nagdala man gikan sa mga panganay sang iya panong kag sang sapay nila. Kag gintamud sang Ginoo si Abel kag ang iya halad,#Heb. 11:4. 5apang si Cain kag ang iya halad wala niya pagtamda. Gani nagsingkal si Cain sing tama, kag naholog ang iya nawung. 6Ang Ginoo nagsiling kay Cain, “Ngaa bala nga nagsingkal ka, kag ngaa bala nga naholog ang imo nawung? 7Kon nagahimo ka sing maayo, indi ka bala pagbayawon? Kag kon wala ka nagahimo sing maayo, ang sala nagapuut sa gawang; manginsa imo ang iya handum, apang gahumi sia.”
8Si Cain nagsiling kay Abel nga iya utud, “Kadto kita sa latagon.” Kag sang didto sila sa latagon, ginsumpung ni Cain si Abel nga iya utud, kag ginpatay sia.#Mat. 23:35; Luc. 11:51; 1 Juan 3:12. 9Niyan ang Ginoo nagsiling kay Cain, “Diin bala si Abel nga imo utud?” Nagsiling sia, “Ambut; manugbantay bala ako sang akon utud?” 10Kag ang Ginoo nagsiling, “Ano bala ang nahimo mo? Ang tingug sang dugo sang imo utud nagatuaw sa akon gikan sa duta. 11Kag karon pinakamalaut ka sa duta, nga nagbuka sang iya baba sa pagbaton sang dugo sang imo utud gikan sa imo kamut. 12Kon pangumahon mo ang duta, indi sia kutub karon magpatubas sa imo sang iya kusug; magalaaslaas kag magalataglatag ka sa duta.” 13Si Cain nagsiling sa Ginoo, “Ang silot ko halus ko mabatas. 14Yari karon, gintabog mo ako sini nga adlaw gikan sa kadaygan sang duta; kag ako malipdan sa imo nawung; kag magalaaslaas kag magalataglatag ako sa duta, kag mahanabu nga ang bisan sin-o nga makadakup sa akon magapatay sa akon.” 15Niyan nagsiling ang Ginoo sa iya, “Busa ang bisan sin-o nga magpatay kay Cain, timalusan sing makapito.” Kag ang Ginoo nagbutang sing tanda kay Cain, basi nga ang bisan sin-o nga makakita sa iya magsamad sa iya. 16Niyan si Cain naghalin sa atubangan sang Ginoo, kag nagpuyo sa duta sang Nod,#4:16 Kon sayoron Paglataglatag. sa sidlangan sang Eden.
17Ginkilala ni Cain ang iya asawa, kag nagpanamkon sia kag nag-anak kay Enoc; kag nagpatindug sia sing banwa, kag gintawag niya ang banwa sono sa ngalan sang iya anak, Enoc. 18Si Enoc amay ni Irad; kag si Irad amay ni Mehujael, kag si Mehujael amay ni Metusela, kag si Metusela amay ni Lamec. 19Kag si Lamec nangasawa sing duha; ang ngalan sang isa si Ada, kag ang ngalan sang isa si Zilla. 20Si Ada nag-anak kay Jabal; amay sia sang mga nagapuyo sa layanglayang kag may kahayupan. 21Ang ngalan sang iya utud nga lalaki si Jubal; sia amay sang tanan nga nagagamit sang arpa kag lantoy. 22Si Zilla nag-anak man kay Tubal-cain; sia manugsalsal sang tagsa ka matalum nga galamiton nga saway kag salsalon. Ang babaying utud ni Tubal-cain si Naama.
23Si Lamec nagsiling sa iya mga asawa:
“Ada kag Zilla, pamatii ang akon tingug;
kamo nga mga asawa ni Lamec, dungga ninyo ang akon hambal:
Nakapatay ako sing tawo tungud sa pagpilas sa akon,
isa ka pamatan-on nga lalaki tungud sa pagbunal sa akon.
24Kon si Cain timalusan sing makapito,
sa pagkamatuud si Lamec makakapitoan kag pito.”
25Kag sa liwat ginkilala ni Adam ang iya asawa, kag nag-anak sia sing lalaki kag ginhingalanan sia Set, kay nagsiling sia, “Gintangdoan ako sang Dios sing isa ka kaliwat sa tal-us ni Abel, kay ginpatay sia ni Cain.” 26Si Set man amay sang isa ka anak nga lalaki, kag ginhingalanan niya sia Enos. Niyan ang mga tawo nagsugud sa pagtawag sa ngalan sang Ginoo.
Chwazi Kounye ya:
GENESIS 4: ABHIL82
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ang Biblia ©1982 Philippine Bible Society