Piilimka 12
12
1Naawen a jam weeni Abram ayen, <<Basi fi tɛŋka, ale fi nuruma, ale fi kowa dɔkdemma abe fi cheŋ tɛŋ kaai ate mi ale dak a sak fu la.
2<<M le basi ate fi chim tɛŋ kpieŋ abe m niak fu, m le basi ate fi yuenni a yiti ate fi chim niauŋ. 3M le niak baai ale a niak fu la, abe waai ale ka a te fu la m le ka a te wa. Tɛŋzuk nuruma meena ale nya niauŋ fi nyiŋ.
4Dila nyiŋ Abram yaa basi dula ase Naawen ale weeni diila. Lɔti jam maa va wa kama a cheŋ. Abram jam ka bena pisiyopɔi ale ŋanu alege basi Yaran tɛŋka. 5Abram yaa pai wa powa Sarai ale wa suoku nidoabinni Lɔti, ale ŋan baai ate ba jam tigsi ta la ale nuru baai meena ate wa nya Yaran la, a yaa basi Yaran ayen ba cheŋ Keenan. Ba yaa jam ga paari du.
6Abram jam cheŋ kama a ga paari More ti kpiemu ale bo Sikiim la. Dila po Keenan demma a jam bo tɛŋka po kama. 7Naawen yaa pai wadek a sak Abram, a yaa weeni wa ayen, <<M le pai tɛŋka de a te fi ŋaaŋbisaŋa.>> Wa yaa sɛ kuŋkuŋ dula a te Naawen dii ale pai wadek a sak wa la.
8Wa yaa nyini dula a va guutaŋa jigini Betel kori geŋsa a ga ti wa viuku, ate Betel a bo yeniŋ geŋsa alege Ai a bo kori geŋsa. Dula jigini wa yaa sɛ kuŋkuŋ a te Naawen, a yaa wi Naawen yuenni. 9Abram ŋman basi dula ale cheŋ va Negev geŋsa.
10Yɔgyɔgla de kɔm ale jam bo tɛŋka po, ate Abram a cheŋ Ejipiti ayen wa bo dula maga diila kɔmmu a jam pagra kama. 11Ba le jam moata Ejipiti tɛŋka la, wa yaa weeni wa powa Sarai ayen, <<Mi seba fi ale ka nipok naliŋ diila kama. 12Ejipiti demma a dan nya fu, ba le weeni ayen, <Nya wa pok ale nna.> Ba le ko mu alege basi ate fi boro. 13Ba dan bek weeni ayen fi ka mi toa ate ba nye mu magsi fi nyiŋ. Dila mɛ ba kan ko mu fi nyiŋ.>>
14Abram ale ga paari Ejipiti la, Ejipiti demma a yaa nya ayen nipowa a ŋmasi nala ka yega. 15Faaro nisɔmma a yaa nya nipowa a paali wa wie a sak Faaro, ate ba ta wa jo naawa yenni po. 16Wa jam nye Abram a magsi kama nipowa nyiŋ ate Abram paari piisa ale niiga ale bon duata ale bon niima, yɔm nidoaba ale nipooba ale laalaakomiba.
17Alege Naawen yaa basi ate nyiŋtui kpiema a yik Faaro ale wa yenni demma Abram powa Sarai nyiŋ. 18Faaro yaa wi Abram ayen, <<Ka boan le la ate fi nye mu?>> Wa ŋman weeni ayen, <<Ka boa ale soa ate fi an weeni mi ayen wa ka fi powa? 19Ka boa ale soa ate fi weeni ayen, wa ka m toa, ate mi yaa pai wa chim m powa? Yɔgyɔgla de fi powa ale nna. Ta wa cheŋ.>> 20Faaro yaa weeni wa nuruma ate ba te ti Abram a cheŋ ale wa powa ale wa ŋantaŋa meena ate wa ta la.
Chwazi Kounye ya:
Piilimka 12: BWU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023, Ghana Institute of Linguistics, Literacy and Bible Translation