LUKA 16
16
Tau awm nai yhmtheaung kry nai keung
1Naibaly Isu my abangnaichi teng y hini leu py thui: “Khumi kanang ami mo, mymy i yhmtheaung kry nai keung awm i, huni my ly ni i yhmtheaung pasum pi lyhlyh, nanai ni teng y amti. 2Hunaibaly ni my ly mymy ai palau i mymy teng y, ‘Kai nang i satang thai nai ly mana lawh mo? Nang i yhmtheaung kry nai sai bawibawi pasym pi, nang ly vai dengdairei yhmtheaung kry nai keung y awm thai y leang bo,’ napi. 3Naibaly yhmtheaung kry nai keung ly mymy i paleung y, ‘Kai i yhmkeung my kai i yhmtheaung kry nai anawn hai ai bo, kai ly mana sa ai mo hi ly? Kai ly khaileaung tapheu ai nai khy ham y bi, kai ly cheaung ai nai khy kaji lawh bi; 4yhmtheaung kry nai anawn hai khala y ly nichi i yhm y kai ai awm hai ai nai sa nai sai kai pany bo,’ napi. 5Hunaibaly mymy ly yhmkeung teng y pei ai nai keungchi ai palau bawibawi i, kangman keh teng y ly, ‘Kai i yhmkeuung teng y nang pei ai nai majirei awm mo?’ napi. 6Ni my ly, ‘Asi tui ne naira chungvairei,’ napi. Naibaly ni my ly mymy teng y, ‘Nang i cha lo ly, vaimy ateh iy vui pangrei tajiu ba,’ napi. 7Naibaly khumi takhra teng y py, ‘Nang ly pei ai nai majirei awm mo?’ napi. Ni my ly, ‘Choh ne naira chungvairei,’ napi. Naibaly ni my ly mymyteng y, ‘Nang i cha lo ly, vui tariurei tajiu ba,’ napi. 8Naibaly ni i yhmkeung ly yhmtheaung kry nai keung hawi y nai ly ka-vo pany nai deaungkho y mymy ai palo; kangvang chochi tleaung y ly hini khaileaung pri i chochi my vai i kangthau y ly cheng keh lawh veng.
9“Kang thui pi, yhmtheaung hawi y nai teaung iy ahawichi ai adawi u; yhmtheaung tama nai khala y ly deaungtasarei awm naira y ang kawn hai ai. 10Ami py maiden chy naira y py ka-ym awm nai ly neangneangra y py ka-ym awm; ami py maiden chy naira y ka-ym by y nai ly neangneangra y py ka-ym by y. 11Yhmtheaung hawi y naira y malawn py ka-ym by y baly, yhmtheaung kahawi ly ami my ang au ai mo? 12Khumi takhra i malawn py ka-ym by y veng baly, nangchi i nai ly ami my ang pei ai mo? 13Miseaung ami py yhmkeung leaung nyhrei i kalop so abom thai y leang, leaungrei ai ly ama hai i, leaungrei ai ly tahm khai y ai. Tameuh i kalop hawi yhmtheaung i kalop so u abom thai y leang,” napi.#Mt 6.24
Isu i thui nai leu phyreichi
(Mt 11.12–13, 5.31–32; Mk 10.11–12)
14Naibaly tangka ngai phi nai Pharisaichi ly hini leu bawibawi thai i panui hai. 15Hunaibaly ni ly mymychi teng y, “Nangchi ly khumi i mei ka-niu y kahawi sa u nai teu; na i py Tameuh my nangchi i paleung ly pany veng; khumichi tengtawi apalo nai ly Tameuh i mei ka-niu y ly kamso awm parai. 16Reita hawi amochi i leu ly Johan awm khala y khrairei awm; huni dengdairei Tameuh i peang nai Satang Kahawi ly thui i, khumi leaung leaungrei atho y my kun bawibawi.#Mt 11.12–13 17Na i py Reita leu tama ai nai tleaung y py kani hawi khaileaung tama ai nai rai y keh.
18“Ami py mymy i aju ai khai iy takhra ai la nai ngierei ly pajang sa nai bo; ami py juvo my khai nai ai la nai ngierei ly pajang sa nai bo.#Mt 5.32; 1 Kor 7.10–11
Khumi kanang hawi Lazara
19“Naibaly khumi kanang ami mo leaungrei awm: mymy ly kanih kamsen jeaung hawi, kanih mai ka-syn akhiu i, kani tleirei tlamsa jojo. 20Naibaly amyn Lazara. cheaung nai leaungrei angvawi awm mamang nai ai ly mymy i apai katheu ahawi y paseaung i, 21khumi kanang i sabawi tleaung i cha kamthom beu nai ly cha ai nai ngai; naibaly uichi my pa-rei mymy i angvawi palei pi.
22“Naibaly hina nai awm. Cheaung nai khumi ly dei i, kani pri i amtaw thau naichi my ni ai la veng iy Abraham i paleung tleaung y tapawm hai bo. Naibaly khumi kanang py dei i up bo. 23Naibaly tavau kho y ly no jojo nai kani mang y angdeang kalau i, palo paraira y Abraham ai hawi Lazara ni i paleung tleaung y tapawm nai py niu. 24Naibaly aeu i, ‘Ngaai Abraham awi, kai ai pahen ly; Lazara ly my i kiu pajeung kadeaung tui y padeung iy kai i palai padam ai nai ni ai pato kyh; hini mai kangveaung y kai khrikhri pa-rei no na ly,’ napi. 25Na i py Abraham my, ‘Deang awi, nang ly tlang heng khala y ly atiti kahawi nga chy bo; hunai kamta Lazara i atiti hawi y nga nai ly dawn bei; na i py ni ly vai ly hi y paleung awmnem nai awm bo, na i py nang ly no na a tu ly. 26Hini ny y nai py hi i dengdairei nangchi teng y chei ai tau naichi ly chei thai y ai nai hawi, ami py tuni dengdairei kaichi teng y jeu thai y ai nai py, kaichi hawi nangchi sala y khaileaung ka-kho ka-teng ny y nai sa khyp veng,’ napi.
27Naibaly ni my ly, ‘Tumbaly ngaai awi, ni ai ly ngaai i yhm y pato ai nai kang takeng he; kai hawi taku vanrei nai neampacho leaung pangrei awm. 28Nichi ly hini no naira y jeu teang lawh na i, hawihai palai thui pi kyh sy,’ napi. 29Na i py Abraham my ly, ‘Mosi hawi amochi i leu py nichi teng y awm chy bo; hunichi i leu tangai u sy,’ napi. 30Naibaly ni my ly, ‘Ngaai Abraham awi, ny y leang: kadeichi theung i leaungrei mychi teng y chei baly, nichi uikhei ai mang,’ napi. 31Naibaly ni my ly mymy teng y, ‘Mosi hawi amochi i leu tangai y baly, kadeichi theung i leaungrei angthau teang i py ym lawh ai nai ny y leang,’ napi,” nanai thui pi.
Chwazi Kounye ya:
LUKA 16: KCL02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Khumi Common Language Bible © Bible Society of Myanmar, 2005.