Sòm 32:1-11

(1b) Ala bon sa bon pou yon moun lè Bondye pa gade sou fòt li fè, lè Bondye padonnen peche l yo! Ala bon sa bon pou yon moun lè Senyè a pa mande l kont pou sa li fè ki mal, lè li pa gen okenn lide twonpe Bondye! Tank mwen pa te ko vle rekonèt peche mwen yo, se tank tou mwen t'ape cheche sou pye. Tout lajounen mwen t'ap plenn. Lajounen kou lannwit ou t'ap kale mwen, Senyè. Mwen te fin rann tout ji mwen Mwen te tankou tè sèk nan sezon lesèk. Lè sa a, mwen rekonèt peche m yo devan ou, mwen pat kache ou sa m te fè ki mal. Mwen di: M'ap rakonte Senyè a tout bagay. Apre sa, ou te padonnen tout peche m yo. Se konsa, moun k'ap sèvi ou ak tout kè yo gen pou lapriyè ou lè yo nan tray. Si yo nan gwo dlo, anyen p'ap rive yo. Se bò kote ou mwen vin kache. Jou malè w'ap delivre m. M'ap chante fè konnen jan ou pwoteje m. Senyè a di: M'a louvri lespri ou sou anpil bagay. M'a moutre ou chemen pou ou swiv la. M'a ba ou bon konsèy. M'ap voye je sou ou. Pa fè tankou chwal osinon tankou milèt ki san konprann. Yo blije mete bosal ak brid nan bouch yo pou donte yo. Si se pa sa, ou pa ka pwoche bò kote yo. Mechan yo gen pou yo soufri anpil. Men, Senyè a ap toujou pwoteje moun ki met konfyans yo nan li paske li renmen yo. Nou tout k'ap viv jan Bondye vle l la, fè kè nou kontan, chante pou sa Senyè a fè pou nou. Nou tout k'ap mache dwat devan Bondye, rele, fè wè jan nou kontan.