Lik 13:22-30

Jezi t'ap moute lavil Jerizalèm, li t'ap pase nan anpil lavil ak anpil bouk. Sou tout wout la, li t'ap moutre moun yo anpil bagay. Yon moun mande li: — Mèt, eske se de twa moun sèlman k'ap sove? Li reponn yo: — Fè jefò pou n antre nan pòt jis la. Paske, m'ap di nou sa, anpil moun va seye antre, yo p'ap kapab. Mèt kay la gen pou l leve fèmen pòt la. Lè sa a, nou menm n'a deyò. N'a konmanse frape nan pòt la. N'a di: Mèt, Mèt, louvri pou nou! L'a reponn nou: Mwen pa konnen ki bò nou sòti. Lè sa a n'a di: Nou te manje, nou te bwè ansanm avè ou, ou te moutre nou anpil bagay nan tout lari lakay nou. Men, l'a reponn nou: Mwen di nou, mwen pa konnen ki bò nou sòti. Wete kò nou sou mwen, nou tout k'ap fè sa ki mal. Lè n'a wè Abraram, Izarak, Jakòb ak tout pwofèt yo nan bèl peyi kote Bondye Wa a, epi nou menm nou deyò, se lè sa a va gen rèl, se lè sa a moun va manje dan yo. Moun va sòti nan peyi solèy leve ak nan peyi solèy kouche, y'a sòti nan nò ak nan sid, y'a chita sou tab nan bèl peyi kote Bondye Wa a. Lè sa a, nan moun ki dèyè nèt kounyeya, genyen k'ap pase devan. Nan moun ki devan kounyeya, genyen k'ap rete dèyè.