Jan 18:15-40

Simon Pyè te swiv Jezi ansanm ak yon lòt disip. Disip sa a te yon konesans granprèt la. Se konsa li te antre anmenmtan ak Jezi nan lakou granprèt la. Pyè menm te rete deyò, bò pòt la. Lè sa a, lòt disip la, ki te yon konesans granprèt la, sòti deyò, li pale ak fanm ki t'ap veye pòt la, li fè Pyè antre. Sèvant ki t'ap veye pòt la di Pyè konsa: — Ou menm tou, ou se yonn nan disip nonm sa a. Pyè reponn li: — Non. Mwen pa disip nonm sa a. Domestik yo ak gad yo te limen dife, yo tout te kanpe bò dife a, yo t'ap chofe kò yo paske te fè frèt. Pyè te kanpe la avèk yo, li t'ap chofe kò l tou. Granprèt la poze Jezi kèsyon sou disip li yo ak sou sa l t'ap moutre yo. Jezi reponn li: — Mwen te pale an piblik pou tout moun tande. Se nan sinagòg yo ak nan tanp lan, kote tout jwif yo sanble, se la mwen toujou moutre sa pou m te moutre a. Mwen pa janm di anyen an kachèt. Poukisa w'ap kèsyonnen m konsa? Mande moun ki te tande m yo sa m te di yo. Yo menm yo konnen sa m te di. Antan Jezi t'ap di pawòl sa yo, yon gad ki te kanpe la bò kote l ba l yon souflèt. Li di li: — Se konsa w'ap reponn granprèt la? Jezi reponn li: — Si m pale mal, moutre moun yo sa m di ki mal la a. Men, si m pale byen, poukisa ou frape mwen? Apre sa, Àn voye Jezi tou mare ale lakay Kayif, granprèt la. Pandan tout tan sa a, Simon Pyè te kanpe la ap chofe dife. Yo di li: — Ou menm tou, ou se yon disip nonm sa a. Men, Pyè demanti sa, li di: — Non. Mwen pa disip nonm sa a. Yonn nan domestik granprèt la ki te fanmi nonm Pyè te koupe zòrèy la, di konsa: — Eske mwen pat wè ou nan jaden an avè li? Pyè di ankò se pa vre. Lamenm yon kòk chante. Apre sa, sòti kay Kayif, yo mennen Jezi nan palè Gouvènè a. Se te granmtimaten. Men, jwif yo pat antre nan palè a. Yo pat vle mete tèt yo nan kondisyon pou yo pa ka fè sèvis Bondye yo. Sa ta ka anpeche yo manje manje Delivrans lan. Se poutèt sa, Pilat, gouvènè a, te blije sòti vin jwenn yo deyò a. Li mande yo: — Kisa nou di nonm sa a fè? Yo reponn li: — Si nonm sa a pat yon malfektè, nou pa ta mennen l ba ou. Pilat di yo: — Poukisa nou pa pran l nou menm, pou nou jije l dapre lalwa nou? Jwif yo reponn li: — Nou pa gendwa touye pèsonn. Se konsa pawòl Jezi te di lè l t'ap fè konnen jan l ta pral mouri a, ta pral rive vre. Lè sa a, Pilat antre nan palè a, li rele Jezi, li mande li: — Eske se wa jwif yo ou ye? Jezi reponn li: — Eske ou di sa paske ou fè lide sa a ou menm, osinon eske se lòt moun ki di ou sa? Pilat reponn li: — Eske se jwif mwen ye, mwen menm? Se pwòp moun peyi ou ansanm ak chèf prèt yo ki mennen ou ban mwen? Kisa ou fè? Jezi reponn: — Nan peyi kote m wa a, se pa tankou peyi ki sou latè. Si gouvènman peyi kote m wa a te tankou gouvènman peyi ki sou latè, sèvitè m yo ta goumen pou mwen. Yo pa ta kite m tonbe nan men jwif yo. Non. Nan peyi kote m wa a, se pa tankou peyi ki sou latè. Lè sa a, Pilat di li: — Si se konsa, ou se wa vre? Jezi reponn li: — Se ou ki di li. Wi, se wa mwen ye. Mwen fèt pou m di verite a jan li ye a. Wi, se pou sa menm mwen vin sou latè. Tout moun ki patizan laverite ap koute vwa mwen. Pilat reponn li: — Laverite? Kisa l ye? Lè l fin di sa, Pilat sòti ankò, l'al jwenn jwif yo. Li di yo: — Mwen pa wè rezon pou m kondannen nonm sa a. Dapre koutim nou, mwen toujou lage yon prizonye ban nou pou chak fèt Pak. Eske nou vle m'lage wa jwif yo ban nou. Lè sa a, yo tout pran rele: — Non, nou pa vle li. Se Barabas pou lage ban nou! Barabas sa a, se te yon ansasen granchemen.