Jan 18:1-14

Lè Jezi fin pale konsa, li pati avèk disip li yo, l'al lòt bò ti ravin Sedwon an. Te gen yon jaden la. Jezi antre nan jaden an avèk disip li yo. Jida, nonm ki te gen pou trayi l la, te konnen ti kote sa a tou paske Jezi te konn vin la anpil fwa ak disip li yo. Se konsa, Jida al nan jaden an. Li te gen yon kolonn sòlda ansanm ak kèk gad avè li. Se chèf prèt yo ak gwoup farizyen yo ki te voye yo avè li. Yo tout te gen zam, yo te pote fannal ak gwo chandèl tou limen. Jezi menm ki te konnen sa ki te pou rive l la, mache sou yo, li mande yo: — Ki moun n'ap chache? Yo reponn li: — Jezi, nonm Nazarèt la. Jezi di yo: — Se mwen. Jida, nonm ki t'ap trayi l la, te la avèk yo. Lè Jezi di yo: Se mwen, yo renka kò yo dèyè, yo tonbe atè. Lè sa a, Jezi mande yo ankò: — Ki moun n'ap chache? Yo di l: — Jezi, nonm Nazarèt la. Jezi reponn yo: — Mwen pa deja di nou se mwen menm. Si se mwen n'ap chache, kite lòt mesye sa yo al fè wout yo. Se konsa pawòl li te di a rive vre: Nan tout moun ou te ban mwen yo, Papa, yonn menm pa pèdi. Simon Pyè te gen yon nepe sou li, li rale l, li frape domestik granprèt la, li sote zòrèy dwat li. (Yo te rele domestik la Malkis.) Men, Jezi di Pyè konsa: — Mete nepe ou la nan djenn li. Eske se pa pou m bwè gode soufrans Papa a ban m bwè a? Kolonn sòlda yo, kòmandan an ansanm ak gad jwif yo mete men sou Jezi, yo mare li. Premye kote yo mennen l, se kay Àn. Àn te bòpè Kayif ki te granprèt pou lanne a. Se Kayif sa a ki te bay jwif yo konsèy sa a: Li pi bon pou nou si yon sèl moun mouri pou tout pèp la!