Atout li te fè tout mirak sa yo devan yo, yo pat kwè nan li. Se konsa, pawòl pwofèt Ezayi te di a rive vre:
Bondye, kilès ki te kwè mesay nou te bay la?
Ki moun ki te rekonèt travay Bondye a nan sa ki rive a?
Non. Yo pat kapab kwè, paske men sa Ezayi te di ankò:
Bondye bouche je yo.
Li bouche lespri yo,
pou yo pa wè,
pou yo pa konprann,
pou yo pa tounen vin jwenn mwen pou m' ka geri yo.
Ezayi te di sa paske li te wè pouvwa Jezi, epi li pale sou li.
Malgre sa, menm pami chèf jwif yo, anpil moun te kwè nan Jezi. Men, akòz farizyen yo, yo pat kite moun wè sa pou yo pat mete yo deyò nan sinagòg la. Yo te pito lwanj ki sòti nan men lèzòm pase lwanj ki sòti nan men Bondye.
Jezi pale byen fò, li di:
— Moun ki kwè nan mwen, se pa nan mwen sèlman li kwè, men li kwè nan moun ki voye m lan tou. Moun ki wè m, li wè moun ki voye m lan tou. Mwen menm, mwen se limyè pou lemonn lan. Moun ki kwè nan mwen, yo p'ap rete nan fènwa. Lè yon moun tande pawòl mwen yo, si l pa kenbe yo, se pa mwen k'ap kondannen li. Paske, mwen vin pou delivre moun, mwen pa vin pou kondannen yo. Men, moun ki refize kwè nan mwen, ki pa asepte pawòl mwen yo, li jwenn ak sa k'ap kondannen l lan: Pawòl mwen te di yo, se yo menm k'ap kondannen l lè dènye jou a va rive. Se pa pawòl pa m m'ap pale la a. Men, Papa ki voye m lan, se li menm ki ban m lòd sa pou m di ak sa pou m pale. Mwen menm, mwen konnen tout kòmandman l yo bay lavi ki p'ap janm fini an. Se sa k fè sa m'ap di a, m'ap di l jan Papa m te ban m lòd la.
Ap Bib la
Ap Bib pou timoun
