Ezayi 38:1-22

Menm epòk sa a, Ezekyas tonbe malad. Li te trape yon maladi ki pa bay chans. Pwofèt Ezayi, pitit Amòt la vin wè li. Li di li: — Men sa Senyè a voye di ou: ou mèt mete lòd nan zafè ou paske ou pral mouri. Pa gen rechap pou ou. Ezekyas vire figi li bay panno a fas, li lapriyè Senyè a. Li di: — Tanpri, Senyè! Chonje jan mwen te sèvi ou ak tout kè mwen san m pa janm vire do ba ou! Mwen te toujou fè sa ou te vle m fè. Epi li pran kriye kont kriye l. Lè sa a, Senyè a pale ak Ezayi, li di l konsa: — Tounen al jwenn Ezekyas. W'a di l pou mwen, men sa Senyè a, Bondye David, zansèt ou a, voye di ou: Mwen tande lapriyè ou. Mwen wè jan sa fè ou mal. M'ap kite ou viv kenzan ankò. M'ap delivre ou ansanm ak lavil Jerizalèm anba men wa Lasiri a. M'a pran defans lavil la. Ezayi mande pou yo fè yon konprès figfrans mete sou kote wa a malad la pou li ka geri. Lè sa a, wa Ezekyas mande: — Kisa k'ap fè mwen konnen m'ka ale nan tanp lan ankò?