Jenèz 46:26-34

Antou sa te fè swasannsis moun, pitit ak pitit pitit ki te desann nan peyi Lejip ansanm ak Jakòb, san konte madanm pitit li yo. Avèk Jozèf ki te gentan fè de pitit nan peyi Lejip, sa te fè antou swasanndis moun laras Jakòb ki te vin nan peyi Lejip. Izrayèl te voye Jida devan al mande Jozèf pou l vin jwenn li Gochenn. Jozèf fè pare cha li a, li moute, l'al Gochenn, l'al kontre papa l. Rive Jozèf rive devan papa l, li lage kò l nan bra l, li pase yon bon tan ap kriye sou zepòl li. Izrayèl di Jozèf konsa: — Kounyeya, mwen wè figi ou, mwen konnen ou vivan toujou, mwen mèt mouri. Epi Jozèf di frè l yo ak tout fanmi papa l yo: — Mwen pral avèti wa a. Mwen pral di l: men frè m yo ak tout fanmi papa m yo ki t'ap viv nan peyi Kanaran vin jwenn mwen isit la. Se gadò mouton yo ye. Se bèt yo konn gade. Yo mennen tout mouton yo ak tout bèf yo ansanm ak tou sa yo genyen. Lè farawon an va rele nou pou mande nou ki metye nou, n'a reponn li: - Monwa, depi nou tou piti jouk koulyeya, se bèt n'ap gade tankou tout zansèt nou yo. Konsa, nou ka rete nan peyi Gochenn nan. Li te di yo sa paske moun Lejip yo pa t' ka sipòte wè moun ki fè gadinay ap viv nan mitan yo.