Jenèz 24:1-67

Abraram te vye granmoun nèt. Senyè a beni li nan tout bagay. Abraram te gen yon nonm k'ap travay ak li ki te pi ansyen pase tout lòt yo. Se li menm ki te jeran reskonsab tout byen li yo. Abraram di li: — Vini! Mete men ou la nan fant kwis mwen, sèmante ban mwen. Mwen vle pou sèmante devan Senyè a, sèl Bondye syèl la ak tè a. Sèmante ou p'ap chwazi madanm bay pitit gason mwen an nan medam k'ap viv nan peyi Kanaran kote mwen rete a. Men, se nan peyi pa m pou ou ale, pou ou chwazi pami moun menm ras ak mwen yo yon madanm pou Izarak, pitit gason m lan. Domestik la mande l: — Kisa pou m fè si fi a pa vle kite peyi l pou l vin avè m nan peyi sa a? Eske se pou m mennen pitit gason ou lan ale nan peyi kote ou te sòti a? Abraram reponn li: — Non, non, non! Pa janm mennen pitit mwen an laba a! Senyè a, Bondye syèl la, te pran m fè m sòti lakay papa m ak nan peyi fanmi mwen. Li pale avè m. Li fè m sèman l'ap bay pitit pitit mwen yo peyi sa a. Enben, se li menm ki va fè zanj li pran devan ou, pou ou chwazi yon madanm nan moun laba yo pou pitit gason m lan. Si madanm lan pa vle vin avè-ou, w'a konnen ou kit ak sèman ou te fè m lan. Sèlman, nenpòt jan, pa mennen pitit gason m lan laba a. Domestik la mete men l nan fant janm Abraram, mèt li, epi li sèmante pou l fè sa l mande l fè a. Domestik la pran dis chamo nan chamo mèt li yo. Li pran yon kantite bèl bagay ki koute chè, li chaje chamo yo. Li leve, li pati, l'ale lavil kote Nakò rete a nan peyi Mezopotami. Lè aswè rive, li fè chamo yo kouche bò pi ki lòt bò pòtay lavil la. Se te lè ti mèdam yo tè konn vin tire dlo. Li lapriyè, li di: — Senyè, ou menm ki Bondye Abraram, mèt mwen, tanpri, fè m jwenn jòdi a sa m'ap chache a. Moutre jan ou bon pou Abraram, mèt mwen. Men mwen kanpe bò pi a, kote medam yo ap vin chache dlo. Mwen mande ou pou jenn fi ki va reponn mwen l'ap ban m bwè lèfini l'ap bay chamo m yo bwè tou, lè m'a di l: Tanpri, bese krich ou a ban m ti gout dlo pou m bwè, fè se li menm ou chwazi pou Izarak, sèvitè ou la. Lè sa a, m'a konnen jan ou bon pou mèt mwen vre. Li t'ap pale toujou lè Rebeka parèt avèk yon krich sou zepòl li. Rebeka te pitit Betwèl. Betwèl sa a te pitit gason Milka ki te marye ak Nakò, frè Abraram lan. Se te yon jenn fi. Li te bèl anpil, li te tifi. Li desann nan sous la, li plen krich li. Epi li moute sòti deyò. Domestik la kouri al jwenn li, li di l konsa: — Tanpri, ban m ti gout dlo nan krich ou a non. Rebeka reponn li: — Wi. Bwè non, mesye. Li desann krich la sòti sou zepòl li, li kenbe l nan men l pou fè nonm lan bwè. Lè nonm lan fin bwè, jenn fi a di l: — Mwen pral pran dlo pou chamo ou yo, pou yo ka bwè kont yo tou. Li prese vide rès dlo krich la nan yon ti basen pou chamo yo bwè, epi li kouri desann nan sous la al chache dlo jouk tout chamo yo fin bwè kont yo. Nonm lan menm te sezi. Li t'ap gade fi a san l pa di anyen, li t'ap tann pou l wè si Senyè a pat fè l vwayaje pou gremesi. Lè chamo yo fin bwè, nonm lan pran yon bèl zanno lò ki peze sis gram, li pase l nan nen Rebeka. Li pran de bèl brasle ki peze san gram, li mete yo nan bra li. Epi li mande l: — Pitit ki moun ou ye? Tanpri, di m non. Eske gen kote lakay papa ou pou m pase nwit la avèk chamo m yo? Jenn fi a reponn: — Mwen se pitit fi Betwèl, yonn nan pitit gason Milka ak Nakò. Li di l ankò: — Lakay nou, nou gen kont pay zèb pou chamo ou yo. W'a jwenn kote pou ou pase nwit la tou. Lè sa a, nonm lan tonbe ajenou, li bese tèt li jouk atè devan Senyè a. Li di: — Lwanj pou Senyè a, Bondye Abraram, mèt mwen an. Li gen pitye pou li, li kenbe pwomès li te fè l la. Li mennen m tou dwat lakay fanmi mèt mwen an. Jenn fi a kouri lakay manman l. Li rakonte tou sa ki te rive. Rebeka te gen yon frè yo rele Laban. Laban kouri deyò al jwenn nonm lan bò sous la. Li te wè zanno a ak braslè yo sou sè li. Li te tande l'ap rakonte sa nonm lan te di li. Lamenm, l'ale jwenn nonm lan ki te kanpe bò sous la ansanm ak chamo li yo. Laban di l: — Antre non. Ou se yon nonm Senyè a beni. Poukisa ou rete deyò a konsa? Mwen pare yon kote pou ou nan kay la. Gen plas pou chamo ou yo tou. Nonm lan antre nan kay la. Laban desele bèt yo. Li ba yo manje. Li fè pare dlo pou nonm lan ak moun ki avè li yo pou yo fè twalèt. Lèfini, yo sèvi yo manje. Men nonm lan di: — Anvan m manje, se pou m di sa m gen pou m di a. Laban di l: — Bon. Pale non. Mesye pran lapawòl, li di: — Mwen se domestik Abraram. Senyè a voye anpil benediksyon sou mèt mwen. Li fè l vin grannèg. Li ba li mouton, bèf, lajan, lò, domestik, sèvant, chamo, bourik. Sara, madanm mèt mwen, te fin vye granmoun lè li te resi fè yon pitit gason pou li. Mèt mwen bay pitit sa a tou sa li genyen. Mèt mwen fè m fè sèman, li di m piga m chwazi yon madanm pou pitit gason l lan nan medam moun peyi Kanaran kote l rete a. Men se pou male lakay papa l pou mwen chwazi yon madanm nan ras li pou pitit gason l lan. Lè sa a, mwen di mèt mwen: Bon, si fi a pa vle vini avè m, kisa pou m fè? Li reponn mwen: Senyè a ki wè jan mwen toujou obeyi l va voye zanj li avè ou. Li p'ap fè ou vwayaje pou gremesi. Ou va chwazi yon madanm nan fanmi papa m pou gason m lan. Si ou fè sa, w'a kit ak sèman ou te fè m lan. Konsa tou, si ou rive kay fanmi m, si yo menm yo refize, w'a kit ak sèman ou te fè m lan tou. Jòdi a, lè m rive bò sous dlo a, mwen di: Senyè, Bondye Abraram, mèt mwen an, si sa fè ou plezi, fè m pa vwayaje pou gremesi. Gade, m'ap rete kanpe bò sous dlo a. Lè m'a wè yon jenn fi k'ap vin chache dlo nan pi a, m'a va di l: Tanpri, ban m ti gout dlo nan krich ou a pou m bwè. Si li reponn mwen: Ou mèt bwè! Apre sa, m'a bay chamo ou yo bwè tou, tanpri fè se li menm ou chwazi pou madanm pitit mèt mwen an. Mwen pat menm fin di pawòl sa yo nan kè m, lè m wè Rebeka rive ak krich li sou zepòl li. Li desann nan sous la, li pran dlo epi mwen di l: Tanpri, ban m ti gout dlo pou m bwè. Lamenm, li desann krich la sòti sou zepòl li, li di m: Bwè non. Apre sa, m'a bay chamo ou yo bwè tou. Mwen bwè, epi li bay chamo m yo bwè tou. Mwen mande l: Pitit ki moun ou ye? Li reponn mwen: Mwen se pitit fi Betwèl, pitit gason Milka ak Nakò. Lè sa a, mwen mete zanno a nan nen l, mwen mete brasle sa yo nan bra l. Mwen tonbe ajenou, mwen bese tèt mwen jouk atè devan Senyè a, mwen fè lwanj Senyè a, Bondye Abraram, mèt mwen an, paske li mennen m tou dwat lakay frè mèt mwen an, kote mwen jwenn yon madanm pou pitit gason l lan. Alèkile, si nou vle aji byen avè l, si nou vle fè l konfyans, fè m konnen. Si nou pa dakò, fè m konnen tou, pou m ka konnen sa pou m fè. Laban ak Betwèl reponn: — Bagay sa a se travay Senyè a, Bondye a. Nou pa gen anyen pou n di nan sa. Men Rebeka devan ou, pran li, mennen l ale pou l vin madanm pitit gason mèt ou a, jan Bondye te di l la. Lè domestik Abraram lan tande sa, li tonbe ajenou, li bese tèt li jouk atè devan Senyè a. Apre sa, li pran rale bèl bijou fèt an ajan ak an lò ansanm ak rad, li bay Rebeka. Li te bay frè a ak manman an anpil bèl kado tou. Apre sa, domestik Abraram lan manje ansanm ak moun ki te avè l yo, yo bwè, yo dòmi. Nan maten, lè yo leve, domestik la di: — Kite m tounen al jwenn mèt mwen. Men, frè a avèk manman an di konsa: — Kite fi a pase dis jou ankò avèk nou non. Apre sa, n'a pati. Li reponn yo: — Pa ban m reta. Senyè a pa fè m vwayaje pou gremesi. Tanpri, kite m al jwenn mèt mwen. Yo di l: — Bon. Ann rele fi a. Ann mande l sa l di nan sa. Yo rele Rebeka, yo mande l: — Eske ou vle ale ak nonm sa a? Li reponn: — Wi, mwen vle ale. Se konsa yo kite Rebeka, sè yo a, ansanm ak bòn ki te nouris li a pati avèk domestik Abraram lan, ansanm ak moun ki te vin avè l yo. Yo beni Rebeka, yo di l: — Rebeka, sè nou, nou mande Bondye pou ou fè anpil anpil pitit. Se pou pitit pitit ou yo bat tout lènmi yo. Apre sa, Rebeka avèk tout sèvant li yo leve, yo moute chamo yo, yo pati avèk nonm lan. Domestik la pran l, li pati ak li. Lè sa a, Izarak te vini nan dezè a, bò kote Pi moun-vivan-ki-wè m lan. Li te rete nan peyi Negèv. Yon jou swa, Izarak t'ap pwonmennen deyò nan jaden li, li t'ap kalkile. Li leve je l, li gade, li wè kèk chamo ki t'ap vini. Menm lè a tou, Rebeka leve je l, li wè Izarak. Li desann chamo a. Li mande domestik la: — Ki mesye sa a k'ap mache vin jwenn nou nan jaden an? Domestik la reponn li: — Se mèt mwen an wi. Rebeka pran yon vwal, li bouche figi l. Domestik la rakonte Izarak tou sa li te fè. Izarak mennen Rebeka lakay li, kay ki te pou Sara, manman l lan. Li pran l pou madanm li. Izarak te renmen Rebeka. Se konsa li te jwenn konsolasyon, apre li te fin pèdi manman l lan.