Egzòd 10:21-29

Senyè a di Moyiz ankò: — Lonje men ou anlè pou fènwa kouvri peyi Lejip la, yon fènwa sitèlman pwès moun ta ka santi l anba men yo. Moyiz leve men l anlè, epi yon fènwa byen pwès desann kouvri tout peyi Lejip la pandan twa jou. Moun peyi Lejip yo fè twa jou yonn pat ka wè lòt, pèsonn pa mete tèt deyò. Men, te gen klète kote moun pèp Izrayèl yo te rete a. Farawon an fè rele Moyiz, li di l konsa: — Nou mèt ale fè sèvis pou Senyè a. Nou mèt ale ak timoun nou yo. Men mouton nou yo, kabrit nou yo ak bèf nou yo ap rete isit la. Moyiz reponn li: — Bon, lè sa a, se ou menm ki pral ban nou bèt pou nou touye pou nou boule pou Senyè a, Bondye nou an? Tout bèt nou fèt pou ale ak nou. Nou p'ap kite yonn dèyè. Paske, se ladan yo pou nou pran sa nou bezwen pou fè sèvis pou Senyè a, Bondye nou an. Tout tan nou pa rive, nou poko konnen kisa nou pral chwazi pou ofri bay Senyè a. Men Senyè a fè farawon an fè tèt di pi rèd toujou. Farawon an pat vle kite yo ale. Farawon an di Moyiz konsa: — Wete kò ou devan m. Gade! Pa janm parèt devan m ankò, paske jou ou ta parèt devan m ankò, m'ap disparèt ou. Moyiz reponn li: — Jan ou vle! Mwen p'ap janm parèt devan ou ankò.