Detewonòm 31:14-30

Lè sa a, Senyè a di Moyiz konsa: — Ou pa lwen mouri. Rele Jozye. Vini ansanm avè l nan Tant Randevou a pou m ka ba li lòd sa pou l fè. Se konsa, Moyiz ak Jozye al kanpe nan Tant Randevou a. Senyè a parèt devan yo anndan Tant Randevwa a, nan yon nyaj ki te gen fòm yon gwo poto devan pòt tant lan. Senyè a di Moyiz: — Ou pral mouri. Ou pa lwen al jwenn zansèt ou yo ki mouri deja. Men, apre ou fin mouri, pèp la pral leve, yo pral vire do ban mwen pou y'al kouri dèyè lòt bondye y'ap sèvi nan peyi lòt nasyon kote nou pral antre a. Wi, yo pral lage m, yo pral kase kontra m te pase avèk yo a. Lè sa va rive, m'a fè yon sèl kòlè anwo yo, m'a lage yo tout, mwen p'ap okipe yo ankò. Se peri y'a peri. Tout kalite malè ak lafliksyon pral tonbe sou yo. Se lè sa a y'a blije rekonèt se paske Bondye yo a pa la nan mitan yo ankò kifè tout malè sa yo rive yo. Men malgre sa, mwen menm m'a refize ede yo paske yo te fè twòp bagay mal lè yo te al kouri dèyè lòt bondye. Kounyeya, ekri chante sa a. W'a moutre tout moun pèp Izrayèl yo li, pou l ka nan bouch yo tout, epi pou l sa sèvi m temwen kont yo. Lè m'ap fè yo antre nan peyi mwen te pwomèt bay zansèt yo a, peyi kote lèt ak siwo myèl ap koule tankou dlo a, m'a fè yo manje plen vant yo, y'a viv alèz. Men, y'a kouri dèyè lòt bondye, y'a sèvi yo. Men mwen menm, y'a voye m jete, y'a kraze kontra mwen te pase ak yo a. Konsa, lè tout kalite malè ak lafliksyon va tonbe sou yo, chante sa a va sèvi m temwen, l'ap toujou nan bouch yo, paske pitit yo p'ap janm bliye l. Wi, depi kounyeya, anvan menm mwen fè yo antre nan peyi mwen te pwomèt yo a, mwen konnen sa yo gen nan tèt yo. Menm jou sa a, Moyiz ekri chante a epi li moutre tout moun pèp Izrayèl yo li. Apre sa, Senyè a bay Jozye, pitit gason Noun lan, lòd li yo. Li di l konsa: — Mete gason sou ou. Se pou ou vanyan. Paske se ou menm ki pou fè moun pèp Izrayèl yo antre nan peyi mwen te pwomèt m'ap ba yo a. M'ap kanpe la avè ou. Lè Moyiz fin ekri tout pawòl lalwa Bondye a nan yon liv san li pa sote anyen, li rele moun Levi ki te reskonsab pou pote Bwat Kontra Senyè a, li di yo konsa: — Pran liv lalwa a, mete l sou kote Bwat Kontra Senyè a, Bondye nou an. L'a rete la, l'a sèvi temwen kont nou. Mwen konnen jan nou gen tèt di, jan nou pa vle koute. Si kounyeya, pandan mwen vivan ankò nan mitan nou an, nou te kenbe tèt ak Senyè a konsa, lè m'a mouri menm se va pi rèd. Sanble bò kote m tout chèf fanmi nou yo ak tout chèf branch fanmi nou yo pou m fè yo tande pawòl sa yo. Mwen pral pran syèl la ak latè a sèvi m temwen sa mwen pral di nou la a. Paske mwen konnen, lè m'a mouri, nou pral lage kò nou nan fè move bagay, nou pral kite chemen mwen te louvri devan nou an. Lè sa a, malè pral tonbe sou nou, paske nou te fè sa ki mal nan je Senyè a, nou te eksite kòlè li avèk tout move bagay nou t'ap fè yo. Lè sa a, Moyiz pran resite byen fò tout chante sa a, depi nan konmansman jouk li bout, devan tout moun pèp Izrayèl yo ki te reyini pou yo te ka tande sa l'ap di a.