Si nou koute Senyè a, Bondye nou an, si nou fè tou sa mwen ban nou lòd fè jòdi a, Senyè a va fè nou tounen nasyon ki pi gran pase tout lòt nasyon ki sou latè. Wi, si nou koute Senyè a, Bondye nou an, men benediksyon l'ap vide sou nou:
Senyè a va beni nou lavil kou andeyò.
Senyè a va beni pitit nou yo, rekòt jaden nou yo, pòte bèf nou yo, pòte kabrit nou yo, pòte mouton nou yo ak pòte tout lòt bèt nou yo.
Senyè a va beni tout rekòt nou ak tout sa n'ap manje.
Senyè a va beni nou nan tou sa n'ap fè, depi nan mete men jouk nou bout.
Senyè a va fè nou kraze tout lènmi ki va atake nou. Lè y'ap vin sou nou, y'a mache ansanm sou yon sèl chemen. Men, y'a gaye toupatou lè y'ap kraze rak pou nou.
Senyè a va beni nou tout tan, l'a beni depo manje nou, l'a beni tou sa n'ap fè. L'a beni nou nan peyi Senyè a, Bondye nou an, va ban nou an.
Si nou fè tou sa Senyè a, Bondye nou an, mande nou fè, si nou viv jan li vle nou viv la, n'a yon pèp k'ap viv apa nèt pou Senyè a, Bondye nou an, jan l te fè nou pwomès la. Lè sa a, tout pèp sou latè va wè Senyè a te chwazi nou pou pote non l, y'a gen respè pou nou.
Senyè a va kouvri nou ak benediksyon, l'a ban nou anpil pitit, anpil bèt ak anpil rekòt nan peyi Senyè a te pwomèt zansèt nou yo l'ap ban nou an. L'a rete nan syèl la, l'a louvri trezò li, l'a voye lapli sou sezon an va rive, l'a beni tout travay n'ap fè. N'a gen dekwa pou nou prete moun. Nou p'ap janm nan bezwen prete. Senyè a va mete nou devan, nou p'ap janm dèyè. N'a toujou anwo, nou p'ap janm anba, depi nou swiv tout lòd Senyè a, Bondye nou an, depi nou fè tou sa mwen mande nou fè jòdi a, san nou pa janm kite chemen li mete devan nou an pou n'ale dèyè lòt bondye pou nou sèvi yo.
Ap Bib la
Ap Bib pou timoun
