2 Timote 4:9-22

Fè posib ou vin jwenn mwen touswit. Paske, Demas lage m, li te renmen bagay ki nan lemonn lan twòp. Li pati, l'ale Tesalonik. Kresan pou tèt pa l al nan peyi Galasi, Tit ale Dalmasi. Se Lik sèlman ki la avèk mwen. Pran Mak avèk ou lè w'ap vini. L'a ban m yon bon kout men nan travay la. Mwen voye Tichik lavil Efèz. Lè w'ap vini, pase pran gwo manto mwen te kite lakay Kapis, lavil Twoas, pote l pou mwen. Pote Liv yo tou, espesyalman sa ki fèt ak po bèt yo. Aleksann, bòs fòjon an, fè m anpil tò. Senyè a va ba l sa l merite dapre sa l fè a. Pran prekosyon ou avè l, ou menm tou. Paske li pat vle tande sa n'ap di a menm. Pat gen pèsonn pou ede m premye jou mwen t'ap fè defans mwen devan chèf yo. Tout moun kite m pou kont mwen. Mwen mande Bondye pou l padonnen yo sa. Men, Senyè a te kanpe la avè m, li ban m fòs. Se sa k fè, mwen te kapab fè konnen pawòl la nèt ale, pou tout moun ki pa jwif yo te ka tande li. Se konsa Bondye wete m nan bouch lyon an. Senyè a va toujou delivre m nan tout move pa. L'ap konsève m pou m ka antre nan peyi kote li wa nan syèl la. Se pou li tout lwanj pou tout tan. Amèn. Di Priska ak Akilas bonjou pou mwen, ansanm ak tout moun ki lakay Onezifò yo. Eras te rete Korent. Mwen te blije kite Twofim lavil Milè paske li te malad. Fè posib ou pou ou vin jwenn mwen anvan sezon fredi a rive. Ebilis, Pidans, Linis, Klodya ak tout lòt frè yo voye bonjou pou ou. Mwen mande Senyè a pou l toujou la avèk ou. Benediksyon Bondye avèk nou tout. Amèn.