2 Wa 6:8-23

Wa peyi Siri a t'ap fè lagè ak peyi Izrayèl la. Li reyini chèf li yo, li di yo ki kote li pral moute kan lame a. Men, Elize voye avèti wa peyi Izrayèl la pou l pa pwoche bò tèl kote, paske lame peyi Siri a desann la ap tann li. Se konsa wa peyi Izrayèl la voye yon mesaje al avèti moun ki nan zòn Elize te di l la pou yo rete sou prigad yo. Sa rive plizyè fwa. Sa te boulvèse wa peyi Siri a anpil. Li rele chèf li yo, li di yo: — Manyè di m kilès nan nou la a ki pou wa peyi Izrayèl la? Yonn nan chèf yo reponn: — Pèsonn, monwa. Men se Elize, pwofèt ki nan peyi Izrayèl la, k'ap fè wa peyi Izrayèl la konnen tou sa ou di, ata sa ou di anndan chanm ou. Wa peyi Siri a di: — Chache konnen kote Elize sa a ye pou m voye pran l: Yo vin di li Elize te lavil Dotan. Li voye yon gwo lame ak anpil chwal ak cha lagè dèyè l. Yo rive Dotan solèy kouche, yo sènen lavil la. Nan denmen maten, domestik pwofèt la leve byen bonè, li sòti. Li wè te gen yon gwo lame ki te sènen tout lavil la ak anpil chwal ak anpil cha lagè. Lamenm, l'al di Elize: — Mèt, mèt, malè sou nou! Kisa nou pral fè la a? Elize reponn li: — Ou pa bezwen pè! Nou gen plis moun avèk nou pase yo. Lèfini, Elize lapriyè Senyè a, li di: — Senyè, tanpri louvri je l pou l wè! Senyè a louvri je domestik la. Domestik la wè tout mòn lan te kouvri ak flanm dife an fòm kavalye ak cha lagè bò kote Elize. Lè sòlda peyi Siri yo atake, Elize lapriyè ankò, li di: — Senyè, fè sòlda sa yo pa wè nan je yo! Senyè a fè sòlda peyi Siri yo pa wè nan je yo, jan Elize te mande l la. Lèfini, Elize al jwenn yo, li di yo: — Se pa chemen an sa, ni se pa lavil n'ap chache a sa. Swiv mwen, m'a mennen nou kote moun n'ap chache a ye. Li mennen yo lavil Samari. Rive yo rive la, Elize lapriyè ankò, li di: — Senyè, louvri je yo pou yo wè! Senyè a louvri je yo. Yo wè yo te nan mitan lavil Samari. Lè wa peyi Izrayèl la wè sòlda peyi Siri yo, li mande Elize: — Touye yo, papa mwen? Touye yo? Elize reponn li: — Non. Pa touye yo. Ou janm touye moun ou fè prizonye lè w'ap goumen ak nepe epi ak banza? Ba yo manje, ba yo bwè, Lèfini, kite yo tounen al jwenn mèt yo! Se konsa, wa a fè yon gwo resèpsyon pou yo. Yo manje, yo bwè. Lèfini, wa a voye yo ale jwenn mèt yo. Depi lè sa a, sòlda peyi Siri yo sispann anvayi peyi Izrayèl la.