2 Wa 18:1-6

Oze, pitit Ela, t'ap mache sou twazan depi li t'ap gouvènen peyi Izrayèl lè Ezekyas, pitit gason Akaz, moute wa nan peyi Jida. Lè sa a, li te gen vennsenkan. Li gouvènen nan lavil Jerizalèm pandan ventnevan. Manman l te rele Abi. Se te pitit fi Zakari. Li te mache dwat devan Senyè a, li te fè menm jan ak David, zansèt li a. Se li menm ki te kraze tout tanp zidòl yo. Li kraze tout wòch yo te mete kanpe pou zidòl yo, li koupe estati Achera yo. Li kraze fè miyèt moso estati sèpan Moyiz te fè a, paske jouk lè sa a, pèp Izrayèl la t'ap boule lansan pou li. Yo te rele li Newouchtan. Ezekyas te mete tout konfyans li nan Senyè a, Bondye pèp Izrayèl la. Peyi Jida a pa janm gen yon wa tankou l, ni anvan l ni apre l. Li te kenbe Bondye li fèm, li pat janm dezobeyi l. Li te fè tou sa Senyè a te mande dapre lòd Senyè a te bay Moyiz.