2 Korent 3:1-18

Eske sa vle di m'ap konmanse fè lwanj tèt mwen ankò? Osinon, eske mwen ta bezwen yon lèt rekòmandasyon pou nou tankou kèk lòt ki pòte lèt rekòmandasyon ban nou? Ou ankò eske se pou m ta mande nou pòte yon lèt konsa ban mwen? Se nou menm, moun Korent, ki lèt rekòmandasyon mwen, yon lèt ki ekri nan kè m pou tout moun ki konn li ka li li. Wi, se bagay ki klè, nou menm moun Korent, nou se yon lèt Kris la menm te ekri ban m' pote. Li pa te ekri li ak lank sou wòch, men li ekri li ak Lespri Bondye vivan an nan lavi nou. M'ap di nou tou sa, paske, gremesi Jezikri, mwen gen konfyans nan Bondye. Konprann byen, mwen pat janm gen pretansyon pou m ta kapab fè bagay konsa ak pwòp kouray mwen. Sa mwen fè a, se Bondye ki fè m ka fè li. Se li menm ki fè m ka sèvi anba nouvo kontra a. Kontra sa a pat fèt dapre lalwa ki ekri a, men dapre pouvwa Lespri Bondye a. Lalwa ki ekri a bay lanmò, men Lespri Bondye a bay lavi. Yo te ekri lalwa a lèt apre lèt sou de tablo wòch. Pouvwa Bondye a te parèt aklè lè li t'ap bay li. Lè sa a, figi Moyiz te sitèlman klere, moun Izrayèl yo pa te ka fikse li. Men li pa te klere tout tan. Si travay lalwa a ki te la pou bay lanmò te parèt konsa, nou pa bezwen mande si pouvwa ki parèt lè Lespri Bondye a ap travay p'ap pi klere toujou. Travay ki t'ap fè yo kondannen moun lan te gen pouvwa, se vre! Nou pa bezwen mande ki kalite pouvwa ki dwe genyen nan travay k'ap fèt pou Bondye fè moun gras. Nou ka menm di pouvwa ki te parèt aklè nan tan lontan an pa anyen devan pouvwa k'ap parèt aklè kounyeya, sitèlman li depase l anpil. Si sa ki te la pou yon tan an te gen pouvwa, nou pa bezwen mande ki pouvwa sa ki la pou tout tan an genyen. Se paske mwen gen tout espwa sa a kifè kè m poze konsa. Mwen pa tankou Moyiz: klate ki te nan figi l la te la pou yon tan. Se sa ki fè Moyiz te kouri kouvri tout figi l ak yon moso twal pou moun pèp Israyèl yo pat wè lè klate a disparèt. Men, yo pat ka konprann anyen. Jouk kounyeya, lè y'ap li liv ansyen kontra yo, vwal la toujou la sou lespri yo. Lè yon moun mete konfyans yo nan Kris la, se lè sa a vwal la disparèt. Jòdi a ankò, chak fwa y'ap li liv Moyiz yo, vwal la kouvri lespri yo. Men, tankou sa ekri nan liv la: Lè yon moun tounen vin jwenn Senyè a, vwal la sòti. Kilès Senyè y'ap pale la a? Se Lespri Bondye a. Kote Lespri Bondye a ye, l'a gen libète. Nou tout, nou pa kouvri figi nou. Nou tankou yon glas k'ap fè moun wè pouvwa Bondye a: konsa chak jou n'ap transfòme, pouvwa li ap grandi nan nou, jouk tan n'a rive sanble nèt ak Senyè a. Sa se travay Senyè a. Lespri Bondye.