2 Kwonik 26
26
Ozyas, wa peyi Jida
(2 Wa 14.21-22; 15.1-17)
1Tout pèp peyi Jida a pran Ozyas, #2 Wa 14.21,22 pitit gason Amasya a, yo fè l wa nan plas papa l. Ozyas te gen sèzan lè sa a. 2Se li menm ki reprann lavil Elat, li fè l tounen anba otorite wa peyi Jida a apre lanmò papa l.
3Ozyas #2 Wa 15.2,3 te gen sèzan lè li moute wa peyi Jida. Li gouvènen nan lavil Jerizalèm pandan senkanndezan. Manman l te rele Jekolya. Se te moun lavil Jerizalèm.
4Ozyas te fè sa ki dwat devan Senyè a menm jan ak Amasya, papa l, te fè l. 5Pandan toutan Zakari te la pou moutre l jan pou l gen krentif Bondye a li t'ap sèvi Senyè a san mank. Pandan tout tan li t'ap sèvi Senyè a, Bondye te fè zafè l mache byen.
6Ozyas leve al goumen ak moun Filisti yo. Li kraze miray ranpa lavil Gat, lavil Jabne ak lavil Asdòd. Li bati lòt lavil ak miray ranpa nan zòn Asdòd ak nan mitan peyi Filisti a. 7Bondye #1 Kwo 4.41; 2 Kwo 21.16 ede l goumen kont moun Filisti yo, kont moun Arabi ki t'ap viv lavil Goubaal yo, ak kont moun Mawon yo. 8Moun Amon yo te peye lajan taks bay Ozyas. Yo t'ap nonmen non l jouk sou fontyè peyi Lejip, paske li te vin gen anpil pouvwa.
9Ozyas #Ney 3.13,19 ranfòse defans lavil Jerizalèm. Li bati gwo fò tou won bò Pòtay Kwen an, bò Pòtay Fon an ak nan yon kwen miray la. 10Li bati gwo fò tou won nan dezè a, li fouye gwo basen pou kenbe dlo paske li te gen anpil mouton ni nan plenn lan ni sou platon yo. Li te gen moun ap travay pou li nan jaden li yo, ak moun pou okipe jaden rezen l yo nan mòn, paske li te renmen travay latè.
11Ozyas te gen yon gwo lame toujou pare pou fè lagè. Lame a te separe an gwoup, dapre jan yo te enskri nan rejis Jeiyèl, sekretè wa a, ak Masyas, grefye a, te kenbe sou kontwòl Ananya, yonn nan gwo chèf wa a. 12Te gen demil sisan (2.600) chèf fanmi alatèt vanyan sòlda sa yo. 13Sou #2 Kwo 25.5 zòd yo te gen yon lame ak twasansètmil senksan (307.500) sòlda toujou pare pou lagè. Yo te grannèg anpil, yo te toujou pare pou al goumen ak lènmi wa yo. 14Ozyas bay tout moun nan lame a plak pwotèj, frenn, kas pou tèt yo, rad an plak fè, banza ak flèch, ak wòch pou gwo fistibal. 15Nan lavil Jerizalèm, li te gen yon enjenyè ki t'ap fè tout kalite machin pou voye flèch ak gwo wòch. Li fè mete machin sa yo nan fò won yo ak nan kwen miray ranpa yo. Yo t'ap nonmen non Ozyas byen lwen, paske Bondye te sitèlman ede l li te vin gen anpil pouvwa.
16Men, #2 Kwo 32.25; Eze 28.2,5,17 lè li fin chita pouvwa l byen chita, lògèy vire tèt li, sa lakòz pye l chape. Li fè bagay Senyè a, Bondye li a, pat ba li dwa fè. Yon jou li antre nan Tanp Senyè a pou boule lansan sou lotèl lansan an. 17Azarya, prèt la, antre dèyè l ak katreven lòt prèt Senyè a, tout vanyan gason. 18Yo #Egz 30.7,8; Nonb 16.40; 18.7; 1 Kwo 23.13 vin kanpe devan wa a, yo di l:
— Ozyas, ou pa gendwa boule lansan pou Senyè a. Se prèt yo ase, moun fanmi Arawon yo, yo mete apa pou fè sa. Wete kò ou kote yo mete apa nèt pou Senyè a. Paske sa w'ap fè a pa bon devan Bondye. Bondye p'ap kontan avè ou poutèt sa.
19Ozyas #Nonb 12.10; 2 Wa 5.27 te kanpe ak lansanswa a nan men l pou l te ofri lansan an. Li move sou prèt yo. Lamenm, nan mitan Tanp Senyè a, toupre lansan an, devan tout prèt yo, yon move maladi po parèt sou fwon li. 20Lè granprèt la, Azarya, ak lòt prèt yo gade l, yo wè maladi a parèt sou fwon li. Yo mete l deyò. Li menm, li prese sòti paske se Senyè a menm ki te pini l.
21Wa #2 Wa 15.5-7 Ozyas #Lev 13.46; Nonb 5.2 rete ak maladi po a sou li jouk li mouri. Li te rete nan yon ti kay apa pou kont li, jan yo fè l pou moun ki gen maladi sa a. Yo enpoze l mete pye l nan kay Senyè a. Se Jotam, pitit gason l lan, ki te reskonsab tout bagay nan palè a. Se li menm tou ki te gouvènen pèp la nan peyi a.
22Pwofèt #Eza 1.1; 6.1 Izayi, pitit Amòz la, te ekri tout rès istwa Ozyas la, depi premye jou li te moute wa a rive jouk dènye jou a. 23Lè Ozyas mouri, yo antere l apa nan simityè wa yo. Poutèt vye maladi po li a, yo pat mete l nan tonm wa yo. Se Jotam, pitit li a, ki moute wa nan plas li.
Chwazi Kounye ya:
2 Kwonik 26: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.