2 Kwonik 2:1-9

Wa Salomon te deside bati yon kay kote pou yo fè sèvis pou Senyè a, ansanm ak yon palè pou l rete. Li mete swasanndimil (70.000) moun ap travay pote materyo, katrevenmil (80.000) moun ap taye wòch nan mòn. Te gen twamilsisan (3.600) moun reskonsab kontwole travay la. Salomon voye misyon bay Iram, wa lavil Tir. Li di l: — Annou fè zafè yonn ak lòt tankou ou te fè avèk wa David, papa m, lè ou te vann li madriye sèd pou l te bati yon kay pou l rete. Mwen pral bati yon tanp pou Senyè a, Bondye mwen an. Se pral yon kay n'ap mete apa pou li, kote n'a boule lansan pou li, kote n'a toujou mete devan l pen y'ap ofri l yo, kote chak maten chak aswè y'a ofri bèt pou yo boule nèt pou li lè jou repo yo, lè lalin nouvèl, ak lè lòt fèt nou fete pou Senyè a, Bondye nou an, jan li te bay pou yo toujou fè l nan peyi Izrayèl. Men, se pou tanp mwen pral bati a gwo anpil, paske Bondye nou an gen plis pouvwa pase tout lòt bondye yo. Lèfini, ki moun ki ka rive bati yon kay vre pou Bondye, si syèl la, atout li gwo a, twò piti pou li? Mwen menm, kisa m ye pou m ta bati yon kay pou li? Se annik yon kote pou m boule lansan pou li m'ap fè. Se konsa, voye ban mwen yon bòs ki gen ladrès pou travay lò, ajan, kwiv, fè, yon bòs ki konn koupe twal ble, twal vyolèt ak twal wouj, bòs ki konn travay bwa ak wòch tou. L'a travay ansanm ak bòs atizan mwen gen avè m nan peyi Jida ak lavil Jerizalèm yo, moun David, papa m, te chwazi pou sa. W'a voye ban mwen madriye sèd, bwapen ak bwa koray ki sòti nan peyi Liban. Paske mwen konnen moun peyi ou yo konn pare bwa sa yo byen. M'a voye moun pa m ede pa ou yo pou yo ka pare yon bon kantite bwa, paske se pou tanp mwen fè lide bati a gwo anpil, se pou l yon bèl bagay.