1 Korent 14:26-40

Pou fini, kisa m vle di menm, frè m yo? Lè nou sanble pou sèvis Bondye a yon moun va gen yon kantik pou l chante, yon lòt va gen kichòy pou l moutre nou, yon lòt va gen yon revelasyon pou l bay, yon lòt ankò va gen yon mesay an langay, yon lòt menm va bay esplikasyon mesay la: Se pou tou sa k'ap fèt ede legliz la grandi nan lafwa. Si gen moun k'ap pale langay, fòk gen de ou twa pa plis, epi yonn apre lòt. Se pou gen yon moun tou k'ap esplike sa y'ap di a. Si pa gen moun ki pou bay esplikasyon, se pou moun k'ap pale langay yo tou rezinyen yo pe bouch yo nan asanble a. Y'a pale pou kont yo nan kè yo ak Bondye. Pou moun k'ap bay mesay ki sòti nan Bondye yo, se de ou twa ase ki pou pran lapawòl. Tout lòt yo va jije sa y'ap di a. Men, si yon moun nan asanble a resevwa yon revelasyon nan men Bondye, se pou moun k'ap pale a pe bouch li. Nou tout kapab bay mesay ki sòti nan Bondye, yonn apre lòt. Konsa, tout moun va aprann kichòy, tout moun va ankouraje. Moun k'ap bay mesay ki sòti nan Bondye yo, se yo menm ki pou kontwole don yo genyen an. Paske, Bondye pa rele nou pou nou viv nan fè dezòd, men li rele nou pou nou viv ak kè poze. Tankou sa fèt nan tout legliz pèp Bondye a, fanm pa fèt pou pale nan asanble yo. Yo pa ba yo dwa sa a. Jan nou jwenn sa ekri nan lalwa Bondye a: se pou yo soumèt yo. Si yo bezwen mande kichòy, y'a mande mari yo lè yo lakay yo. Non. Sa pa fèt pou fanm yo pale nan asanble a. Eske se lakay nou pawòl Bondye a sòti? Osinon, eske se nou menm ase ki te resevwa li? Si yon moun kwè se Bondye ki voye l, osinon si li kwè li resevwa kèk don ki sòti nan Sentespri Bondye a, se pou l rekonèt sa m ekri a se yon lòd ki sòti nan Senyè a. Men, si li pa rekonèt sa, nou pa bezwen okipe l ankò. Konsa, frè m yo, anvan tout bagay, se pou nou chache don pou nou ka bay mesay ki sòti nan Bondye. Pa anpeche moun pale langay. Men, tout bagay fèt pou fèt avèk respè, avèk disiplin.