Metiu 2
2
Tosibe-yan Si Luwom Yeisu heine
1Yeisu si hab Betlehem, Judiya wana ganahao, saugeine Herodi iye wedi kin. Habe tosibe-yan si sehudi natek si dom Jerusalem, 2si tayak si nga, “Memai gane si hab tage Judiya wedi kin iye igohoi? Hana hetutuhi sinanane ha hite paidi natek, iyete ha luwom ge nuwamai ha la ha kululu heine.”
3Sauge Kin Herodi i longe wase ya i nunuwotu nabi kaiwane, sohode hedi Jerusalem hana tomiye bwabwaligadiye. 4I gon paseid topowo lalahine ge Logugui hana topapalapu ge i tayakid i nga, “Mesaiya bwele si hab igohoi?”
5Si liwo si nga, “Betlehem, he Judiya wana ganahao, kaiwane profet i leli sohode ti ya:
6Humiu Betlehem, Judiya wana ganahao,
tan bosowane ta deliwo hidamiu taine i dekai Judiya hana todedei-yan he gamwadiye,
kaiwane todedei hotiya benan habe i youmate he gamwamiu
iloke i matahasikid lo bobode Isrel.”
7Habe Herodi i liwo tosibe-yan si luwom he-bwaine si lihu sumo, bwen i tayakid se sauge suwok sinanane ya i youmate. 8Habeto i patileid si la Betlehem, i nga, “Hu la gen hu luweniyan vetahe memai. Sauge hebe hobak hu paidi, hu luwom lo wase hu giyau, iloke nau hedi a la a kululu heine.”
9-10Tosibe si longe kin halingane bwen si dodogan hedi, habe sinanane gane si paidi natek si paidi hedi. Ge sauge si paidi, si yariyae nabi suwok. Bwen sinanane i dedeiyanid hana had i manao he yawan pwatane, gane memai i miye heine. 11Habe si la si setuk he guwole ge si paidi memai bwaine tinane Meri, bwen si lipwakoko ge si kululu heine. Wedi gogomwau hana nabo si tate habe wedi mulolu si giyau heine, gold, frenkinsens#2:11 Frenkinsens iye hubwahi hotiya suine si ton bwalene i dohob. ge enunu gane hidane meya.
12Heneluluwo heine Helak i liwo heidiye tab si esehavile Herodi heine, ge habe si selok he hiyede mwage hotiya si la he habadiye.
Josep ge Meri Si Paiwowo Memai Si La Ijip
13Sauge tosibe si yogo, habe Josep he wana heneluluwo Guyau wana anelose i youmate heine ge i liwo i nga, “Herodi bwele i luweni memai nuwane i tagapamate. U suwoyuk, memai bwaine ge tinane u sehapeid ge hu iwowo hu la Ijip. Iloke gen hu miyemiye te he yake, hana had a liwo, habeto hu sehavile.”
14Habe Josep i suwoyuk, memai bwaine ge tinane i sehapeid bwen gogou si yogo si la Ijip, 15ge si miyemiye te he yake hana had Herodi i mate. I youmate sohode ti yo, iloke Helak wana lihu gane profet hotiya i payoumate i tabwa tolosuwok, i nga, “Natu a gon-an i setagi Ijip.”
Herodi I Tagapamateid Bubuyese
16Sauge Herodi i lapu age tosibe si yokapisi-yan, bwen i huge suwok. Habe i patileid wana tosagiyau ge bubuyese bobode he Betlehem ge hana ganahao bwabwaligane, hebwaden wedi bwaime ho-iwo ge i sedau, si tagapamateid. I gorugoru sauge gane i lapu tosibe si lihuyan ge sinanane i youmate. 17I youmate sohode ti yo, iloke Jeremaiya wana lihulihu i tabwa tolosuwok, i nga:
18Halhalinge hotiya si longe he Rama hei,
tantan nunuwongakine suwok.
Reitsel i tan he-nanatune kaiwadiye,#2:18 Reitsel iye Jeikob poniyene, iyete iye boda Judiya tubutubuidiye hotiya. Reitsel i tabwa kankanun Judiya he-tintinadiye kaiwadiye. Profet Jeremaiya wana lihulihu i sudi lok dedei Judiya he-tintinadiye si tan kaiwane Babilon si luwom si yawanid he-nanatudiye ge si yomoteiid Babilon. Hebe ta hudi Jerusalem, Rama iye hiyebe hotiya Babilon hana hiyede he gamwane. Ge i sudi lok hedi Betlehem he-tintinadiye si tan kaiwane Herodi i liwo te tosasagiyau si tagapamateid he-nanatudiye. Bosowaine Reitsel i tabwa kankanun Betlehem he-tintinadiye kaiwadiye kaiwane i mate Betlehem, haliwageine mwage hei.
i boleu si payariyae nuwane,
kaiwane hobak taine hedi si degan.
Si La Nasaret
19Wedi miyemiye he yake hana had Herodi i mate, bwen he Ijip hei Guyau wana anelose i youmate Josep he wana heneluluwo 20ge i nga, “U suwoyuk, memai bwaine ge tinane u sehapeid ge hu sehavile Isrel wana ganahao, kaiwane gane nuwane memai i leme hobak i mate.”
21Bwen Josep i suwoyuk, memai bwaine ge tinane i sehapeid ge si sehavile ganahao Isrel. 22Agegene sauge i longe Akeleyas i tabwa kin he ganahao Judiya, i milase tamane Herodi habane, bwen Josep i matok lok te he hiyebe yake. He wana heneluluwo Helak i liwo heine, bwen i lok he ganahao Galili, 23ge i la i miye he hiyebe Nasaret. I youmate sohode ti yo, iloke profet wedi lihu Mesaiya kaiwane i tabwa tolosuwok, si liwo, “Benan bobode si nga iye gagama Nasaret.”
Chwazi Kounye ya:
Metiu 2: NMWS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2016, Wycliffe Bible Translators, Inc. All rights reserved.