TAUNET 3
3
Kabutetap chii ak kergong'yet
1 # Ng'a 12.9; 20.2 Ki ng'aaliindet ndaret kosiir tyony age tugul ne po ng'wony ne kiga koyai Kamuktaindet ne po Toroornatet. Ki leenji anyun kwondo, “Tos, iman ki mwa Kamuktaindet kole, ‘Amat oam logoek che po keetit age tugul ne po mbareet i?’ ” 2Ki leenji kwondo ndaret, “Ki chamwech keam logoek che po keetiigap mbareet; 3ago ki mwa Kamuktaindet kole, ‘Amat oam logoek che po keetit ne mi kwenutap mbareet, amat otwaa, si mobegu.’ ” 4Koleenji ndaret kwondo, “Mobegu iman! 5Amu ingen Kamuktaindet kole eng' peetuut ne koam che po keetoto, koyatagisyei konyekwok, ak ogergeitu ak Kamuktaindet, onai ne myee ak ne ya.” 6Ye kingo keer anyun kwondo kole myee keetooto eng' ameet, ak ko karaaran eng' koonyek, ak kogoochin chii konyoor utaatyet, kobut anyun logoekyik koam; ak kogoochi manong'otyonnyi, ne ki mi tuwai, ko am agine. 7Ki yaatagis anyun konyekwak icheek tuwai ak konai kole mi aach ngor. Ki nabanap anyun sogeegap mogoywet, konapchigei ngoroik che kigermenegei.
8Ak ki kas `icheek Kamuktaindet ne po Toroornatet kowendoti eng' mbar ye kiga kogaititit koskoleny, koistoegei ole mi Kamuktaindet ne po Toroornatet ak kounygei eng' keetiik oriit che mi mbar. 9Ki kuur anyun `Kamuktaindet ne po Toroornatet chiichooto koleenji, “Imi ano?” 10Kowolji chiichooto koleenji, “Kagas iwendoti eng' mbar ak kaywei amu ami aach ngor ak kaunygei anyun amu nooto.” 11koteebee Kamuktaindet koleenji; “Ng'oo ne kamwaun kole imi aach ngor? Ka iam logoek che po keetooto ki ang'atiin ale amat iam?” 12Kowolji chiito koleenji; “Kwonyoo ki igoono ketebi tuwai, ko ineendet ne kagono logoek che po keetit ak ka aam.” 13#2Kor 11.3; 1Tim 2.14 koteebee `Kamuktaindet ne po Toroornatet kwondo koleenji, “Nee ni kaiyai?” Kole kwondo, “Kagoberbera ndaret, ak ka aam.”
14Koleenji `Kamuktaindet ne po Toroornatet ndaret,
“Amu kaiyai kii,
ko kagichubin kosiir kiyagiik tugul
ak tyong'ik tugul che po timiin;
iichuute moeng'ung' ng'wony
ak iame ng'ung'unyek
peetuusyek tugul ko tee isabe.
15 # Ng'a 12.17 Andoi punyondiit kwenung'wong'
inyee ndareet ak kwondo
ak kwenutap iyoteng'ung' ak iyotennyi.
Tuei ineendet meting'ung'
ak isuse aginye kwaryandennyi”
16Koleenji anyun `Kamuktaindet kwondo,
“Atesun miising' nyaliildang'ung' eng' sigisyeng'ung',
isiche lagok eng' ng'wanindo.
Inyali manong'otyong'ung' eng' mageng'ung' ak koboun.”
17 # Heb 6.8 Yeityo Koleenji Adam,
“Amu kegas ng'aleegap kwondong'ung',
ak iam che po keetit ne ki ang'atiin ale amat iam,
ko kagichup ng'wony agobo inyee;
iame che po ng'wony eng' nyaliilda ko tee isabe;
18iiun `ng'wony katook che toorei piich ak che rutei piich,
ak iame ingweek alak tugul che po emet.
19Iame amitwogik eng' kaotigap togeng'ung'
kot koit iweekyigei ng'wony
amu ki kinemunenen yooto;
amu ii ng'ung'uny,
iweekyinigei ng'ung'unyek.”
20Kiguure `Adam#3:20 Adam: Eng' kutitap Yahudik kainet ‘Adam’ ko ‘Chii.’ kwondonyi Hawa#3:20 Hawa: Eng' kutitap Yahudik ko kergei ng'olyoot ‘Saboon.’, amu ineendet kametap tugul che saptos. 21Ak kinapchi `Kamuktaindet ne po Toroornatet Adam ak kwondonyi ngoroik, ak kolaakyi.
22 # Ng'a 22.14 Ak ki mwa `Kamuktaindet ne po Toroornatet kole, “Ogeero! Kagogergeit chiichi ak agenge eng' acheek, ne ingen ne myee ak ne ya.” Ko si mata koyogooito eunnyi kobut che po keetitap saboondo koam ak kosap koigeny, 23ko ki imaanda `Kamuktaindet ne po Toroornatet ineendet eng' mbareetap Eden, si kobiit kobat ng'wony ole ki kinemune. 24Ki oon anyun chiichooto koomaanda ak konde Kerubik kotebee komostap kong'asiis ne po mbareetap Eden. Yeityo konde rootwetap chok ne ilyeli ne tokyingei komoswek tugul si koriip ooreet ne tokyingei keetitap saboondo.
Chwazi Kounye ya:
TAUNET 3: KAPR
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©Bible Society of Kenya, 2019