Génesis 2
2
1Pa vôôs shi' na cotsjaat, shi' lhacôm'a pava yiey ts'ivee vacalhsham. 2Pa napu'yama nalhu pa Dios pa yivaclhitesh pavan yisnatesh, pa t'ichayjop.*xg* 3Lhechesh pa yit'eshem pa is pa napu'yama nalhu shi' ti yinôôclhinita ti nalhu lhasnôyech, lhayaash ti côque nalhu t'ichayjop pa lhcumjayash'e pava yivclanjat.*xh* 4Nôque vachayjayasheshch'e ti vaclan pa vôôs shi' na cotsjaat.
Pa nivacle ti yie' pa vatcôvjiyanjavat Edên
Pan t'aplhuqu'e ti yisnatesh pa Dios pa vôôs shi' na cotsjaat, 5jôjjeclay ampa ca ve'lhaa ca vatcôvjiyanchiyuc'a ampa shta ca nitôlh'e ca t'aclôc'a, lhayaash pa Lhcaanvacle Dios ti jôjjeclay ninasnatesh pa tsha'nu yiey na cotsjaat, jôjjeclay shta ampapu ca natcum'een. 6Taj ti istaaem na cotsjaat ti tôlhshaam pa yinôôt pa yivayit'apee pa vatcac'ovat. 7Pa lhechesh pa Lhcaanvacle Dios pa yisnatesh pa nivacle yitôlhjata jô' na cotsjaat, pa yifuyuqu'e pa lhnaash pa yijutem pa lhamônlhajayash. Pa nôque lhjunash pa nivacle ti nich'a caaj pa lhamônlhajayash.
8Pa Lhcaanvacle Dios pa yicaatjat pa vatcôvjiyanjavat yanshi' pa Edên lhum'ôjinucjulh. Pa lhech yan'e' pa nivacle pan yisnatesh. 9Yitôlhjat'e lhacôm'a pant'ajôôj pava isis aacjuy pavan tô'lha pava isis lhay chituj. Pa lhcachivatshi pa vatcôvjiyanjavat yan'e' shta lhpa aacjiyuc tô'lha pa vatmônlhajayash*xi* shi' shta lhpa aacjiyuc vancatôyjata pa isch'e' shi' pa niysa'.
10Yiey pa Edên tôlhshaam pa tovôc pa yivayit'apee ja vatcôvjiyanjavat. Pa lhech vacôtsôn'e pa yichatjulhch'e pava tovjôy. 11Pa vatjutsa' lhey Pisón, pan yichjop lhacôm'a pan tuc'a'e pa Havila, lhech yie' pa clesanilh cojiyaj. 12Pa clesanilh cojiyaj lhech yie' yaash ti is. Yie' shita pa is ts'ayôjiin lhpa utej c'ayooyshi. 13Paelh tovôc lhey Gihón, pa lhech yichjop lhacôm'a pan tuc'ae pa cotsjaat lhey Cus. 14Vooy peelhcha tovôc lhey Tigris, pa lhech lhum'ôcjinucjulh nash'e pa Asiria. Pa vooy peelh tovôc lhey Éufrates.
15Pa Lhcaanvacle Dios ti yan'e pa nivacle pa vatcôvjiyanjavat yiey pa Edên ca jaspa niclôôsshi shi' ca ninujumatsenesh. 16Pa yiyôjiesha pa yit'esh: “Isjop ca atuj lhacôm'a nava lhay nava aacjicuy yiey na vatcôvjiyanjavat, 17ve'lheey lha aacjiyuc vancatôyjata pa isch'e shi' pa niysa' ya aj ca atuj. Ya aj ca atuj lhpa lha' anôque aacjiyuc, lhayaash ca atujtaj pa lhavaf jayu.”*xj*
18Pa Lhcaanvacle Dios pa yaychavalh'in: “Nintajulhey na nivacle ca ve'lhaasha'ne. Jasnatesh jayu lhpa ca nôveelhvacop shi' ca nefen.” 19-20Nôque lhfanishesh pa Lhcaanvacle Dios ti yitôlhjata lhacôm'a na cotsjaat pava yaquisetes tôyic shi' lhacôm'a pava ajôclôs, pa yicha'jey pa nivacle ca neyiyansha'ne; pava yeyiyanesh ts'ivee pa nintayesh. Pa nivacle yeyiyansha'ne lhacôm'a pava yaquisetes nitôyicla, pa lhacôm'a shta pava ajôclôs shi' lhacôm'a pava yaquisetes tôyic. Taj nive'lhaa pava lhech ca isa'emjop ca nitônôyche'elhsha'ne shi' ca nefenesh pa ca suytajeeshi. 21Pa lhechesh pa Lhcaanvacle Dios pa yijutem pa uj lhanjôti pa nivacle, c'oya ti yimô' pa niclan'e pa ve'lha pava lhavlhis pa yip'ojey shta pa t'asjaan. 22Pa lhech lhavlhi' pa Lhcaanvacle Dios pa yisnatesh lhpa ve'lha nivacche pa yichajey pa nivacle. 23Ti yi'van pa nivacle pa yiqu'imjat ti yit'esh:
“¡Anôque tô'lha na tsitsôt'ajesh yisjaan shi' nava tsitsôt'ajesh yivnus! Lhanquey jayu “nivacche”, lhayaash pa Dios ti tôlhesha pa nivacle.”
24Lhe'naa pa nivacle ti tayjop pa lhtata shi' lhpa lhamimi pa ve'lhaasham jayu lhpa lhjaya, papi napu' yamvatsham pa lhjunashjulh ti ve'lha nivacle.*xk*
25Nan lhjunash pa nivacle lhech lhjunash shta lhpa nivacche pa tsishavatsham'in ts'ivee, taj nitôyey ca nivapenvach ti lhech lhjunash.
Chwazi Kounye ya:
Génesis 2: NIVA
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Nivacle Bible © Sociedades Bíblicas Unidas, 1994.