THILSIEMBUL 4
4
Kain leh Abel
1Chun, Adam in a zi Evi a kuolpih a; tichun nau a vawp ta a, chapa a nei a, “Lalpa panpihna’n chapa ka nei tai,” a ti a. A min dingin Kain a sa a, 2Chun, chapa dang khat Abel a nei kit a. Abel chuh belam ching in a um a, Kain vang chuh lobawlmi ahi. 3Hun chawmkhat zawh chun hiti hi ahi a, Kain chun Lalpa kawma piek dingin lo a thai gah a hun la a. 4Chun, Abel in le a belam hawn laka pieng masapente leh athau hawih diek haw chuh a hun kai a, a that a, a kithawi ta a. Tichun, Lalpa chuh Abel leh a thilpiek achun a kipâk a.#Heb 11.4 5Kain leh a thilpiek vang chuh a kipahpih puoi. Tichun Kain chuh a lungna mah mah ta a, a maisuoh chuh a hung duptha zieng ta a. 6Tichun Lalpa’n Kain kawmah, “Bang dinga lungna na hi? Bang dinga na maisuoh duptha zieng ahi? 7Thil na hihphat leh pawm a um lo ding na him? Na hih phatloh leh vang chuh gitloh kawtkhak bul ah a bawk zing a, na chunga thuneih a ut a, himahleh zo ngêi ding na hi,” a ti a. 8Chun, Kain in anau Abel kawmah, “Lo ah chieh hiti,” a ti a. Tichun, lo a a umlai u chun Kain chun anau Abel chuh a suol a, a that ta a.#Mat 23.35; Luk 11.51
9Tichun Lalpa chun Kain kawm achun, “Na nau Abel khawia um a?” a ti a. Amah chun, “Ka he puoi, ka nau chingpa ka hi a mawh?” ti’n a dâwng a.
10 Lalpa chun, “Bang hih na hi ta’m? Na nau thisan aw chun lei apat in ei uou hi.#Heb 12.24 11Zieziekchun, na khuta pata na nau thisan chukna dinga a kam a na ka leisiet apat hin hansiedawl na hi tai. 12Lei na leh tieng lele lei chun bangmah suoh ta puo’n tin, lei ahin taimang leh vak chavai hung hi ta’n la,” a ti a. 13Chun, Kain chun Lalpa kawmah, “Nei gawtna hi a huoisie taluo a thuok zo puo’ng ka; 14Ngaiin, tuni hin lei chung apat nei nawhdawk ta ngâl a; na mit muh phakloh a sel a um ding ka hi ta a; lei ahin vakmang leh vakvai hung hiding ka hi ta ngâl a; tichun kuole ei mu taphawt in ei that mai in au,” a ti a.
15Chun, Lalpa Pathien chun a kawmah, “Hilo e, kuole Kain that taphawt chuh aleh sagih in a chunga phulak hi’n a,” a ti a. Tichun, mi’n amah a muh u a a thah lohna dingun Lalpa’n Kain chuh a tiemteh ta a. 16Tichun Kain chuh Lalpa kawm apat chun a pawt a, Eden suohlam a Nod#Nod hi “Vakvaihna” tihna ahi gam achun a um ta a.
Kain Suonte
17Chun, Kain in a zi a kuolpih a, chun, nau a vawp a, Enok a hinga. Chun, Kain chun khawpi a siem a, a min ding chun a chapa min chawiin Enok a sa a. 18Enok chun chapa Irad a nei a, Irad chun chapa Mahujael a nei a, Mahujael chun chapa Methusael a nei a, Methusael chun chapa Lamek a nei hi. 19Chun, Lamek chun zi nih a nei a: khat min chuh Adah ahi a, a dang min chuh Zillah ahi. 20Adah in Jabal a hing a: amah chuh puon-In haw a chênga gancha vak haw suonpa ahi. 21A suohpihpa min chuh Jubal ahi a: amah chuh kingkang leh châmngai tum haw chengcheng hun suonpa chuh ahi. 22Chun, Zillah chun Tubal-Kain dakguo leh thik matchâk chichuom chuom sêk pa a hing a: chun, Tubal-Kain suohpihnu chuh Naamah ahi.
23Chun, Lamek chun a zite kawm achun:
“Adah leh Zillah te haw, ka aw ngaithau inla;
Lamek zite haw, ka thugen hi ngaiun:
Ei sukliem ziekin mi ka that a,
Ei zêp thidup ziekin tangval ka that hi.
24Kain phu bawn aleh sagih a a lak ding u chun
Lamek phu chuh a leh sawmsagih leh sagih in la ngêi ngêi in au,” a ti a.
Seth leh Enok
25Chun, Adam in a zi a kuolpih kit a: tichun amah chun chapa a hing kit a, a min dingin Seth a sa a. “Pathien in Abel thasang in chisep ding dang ei guotsak tai, Kain in amah a that ta ngâl a,” a ti a. 26Chun, Seth inle chapa a nei ta a; a min dingin Enos a sa ta a. Zielai chun mite’n Lalpa min a hun sam pan tau hi.
Chwazi Kounye ya:
THILSIEMBUL 4: GANGBSI
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.