Vèsè popilè nan Bib la ki soti nan Ezayi 62

Pataje

Yo p'ap rele ou Timepriz ankò. Yo p'ap konsidere peyi ou la tankou yon fanm mari li kite li. Y'a rele ou Kèkontan pou Bondye. Y'a rele peyi ou la Bèl madan marye. Paske ou fè Senyè a plezi, l'ap tankou yon bon mari pou peyi ou la.

Jerizalèm, mwen mete gad ap fè pòs sou miray ou yo. Lajounen kou lannwit, se pou yo pale. Se pou yo fè Senyè a chonje pwomès li te fè ou yo, pou li pa janm bliye ou. Se pou yo kenbe l kout jouk la fè lavil Jerizalèm kanpe ankò, pou toupatou sou latè y'a fè lwanj pou li.

W'a tankou yon bèl kouwòn nan men Senyè a, tankou yon bèl foula nan men Bondye ou la.

Menm jan jenn gason marye ak jennfi, se konsa Senyè a pral marye avè ou. Menm jan nonm marye kontan madanm li, se konsa Bondye pral kontan ou.