Vèsè popilè nan Bib la ki soti nan Ezayi 60

Pataje

Leve kanpe! Ou pral klere tankou solèy. Pouvwa Senyè a pral klere sou ou.

Nasyon yo pral kouri vin nan limyè nou an. Tout wa yo pral kouri vin nan klète jou k'ap leve pou nou an.

Lòt nasyon yo nan fènwa, yon nyaj kouvri lòt pèp yo. Men limyè Senyè a pral leve sou nou! Pouvwa li pral parèt sou nou!

Fanmi ki pi piti nan mitan nou an pral gen mil (1.000) moun. Fanmi ki pa vo anyen an pral tounen yon gwo nasyon. Se mwen menm Senyè a ki p'ap mize fè sa, lè lè a va rive.

Se pa solèy la ki pral klere nou lajounen. Ni nou p'ap bezwen klète lalin lan pou klere nou lannwit. Se mwen menm, Senyè a, ki pral sèvi nou limyè pou tout tan. Se Bondye nou an ki pral leve tèt nou.

Solèy nou an p'ap janm kouche ankò. Lalin nou an p'ap janm disparèt. Se Senyè a menm ki pral sèvi nou limyè pou tout tan. Jou lafliksyon nou yo fini.

Lè n'a wè sa, n'a kontan nèt ale! Kè nou pral bat, nou p'ap konn kote pou n mete kò nou! Y'ap pote richès nasyon yo ban nou. Y'ap sòti lòt bò lanmè, y'ap vin jwenn nou.

Voye je nou toupatou bò kote nou, gade sa k'ap pase! Tout moun pa nou yo ap sanble, y'ap tounen lakay yo. Pitit gason nou yo ap sòti byen lwen. Moun ap pote pitit fi nou yo tankou ti bebe y'ap pote sou kote.

Tout moun nan pèp nou an va fè sa ki dwat. Y'a rete nan peyi a pou tout tan. Tankou kreyòl jaden mwen, se mwen ki plante yo, se mwen ki fè yo ak men mwen, pou m ka fè tout moun wè pouvwa mwen.

Yo p'ap tande moun fè mechanste nan peyi a ankò. Moun p'ap devalize peyi a ankò, ni moun p'ap kraze l. M'ap sèvi nou ranpa, se mwen menm k'ap pwoteje nou. M'ap sèvi nou pòtay, n'a fè lwanj mwen.

Pòtay nou yo ap rete louvri lajounen kou lannwit. Yo p'ap janm fèmen, pou wa lòt nasyon yo ka pote tout richès peyi yo lakay nou.

Y'ap ban nou kantite chamo ki sòti peyi Madyan ak peyi Efa. Nou p'ap konnen kote pou n mete yo. Moun ap sòti peyi Saba, chaje lò ak lansan. Y'ap pwonmennen fè lwanj Senyè a toupatou.

Senyè a pale ak lavil Jerizalèm, li di l konsa: — Se moun lòt nasyon ki pral rebati miray nou yo! Se wa yo ki pral sèvi nou domestik. Nan kòlè mwen, mwen te pini nou. Men, mwen gen pitye pou nou paske mwen gen bon kè.

Mwen p'ap vire do ban nou ankò. Yo p'ap rayi nou. Nou p'ap rete san pèsonn pou vizite nou. M'ap fè moun nou yo toujou kontan wè nou. Y'a fè fèt de tit an tit.

Lòt nasyon yo ansanm ak wa yo va pran swen nou tankou yon nouris k'ap bay pitit li tete. Lè sa a n'a konnen se mwen menm, Senyè a, ki sove nou. Se Bondye pèp Izrayèl la, Bondye ki gen tout pouvwa a, ki delivre nou.